Abebech Maatewoos
Bayinye maala`lisannohanna agaran nikki ikkitubba aana afamannohu Tookiyo Olompike Itophiyunniri mitte yanna qeelletenni mitte yannara kayinni lame laisannorinni dukkisante Tookiyote keeshsho jeefisate aana no. Itophiyu tenne Olompikera rosamino garinni Atleetikisetenni batinye meedaaliya gamba assitanno yine agarrannita ikkiturono xaa geeshsha culka, birranna camote Meedaaliya afidhino.
Harinsoonniti 800 meetire heewora beeqqitinoti Atileeti Habtaami Alemuti 6ta ikkatenni heewo gumultino. Itiyo elektiriikete kilawe atileete ikkitinoti Habtaami gobbase riqibbe beeqqa hanaffinohu A.K 2015 ikkanna, beeqqitino ba’re kalqete atileetiikise champiyoona hattono wo’munku Afriki godo’leraati.
konni dirirano ko garinni Port Laandete harinsoonnihu kalqete mini giddo heewora 6ki deerra amadatenni diploomu baraarsha adhate dandiitino. Riyo Olompikerano labbanno heewonni beeqqite kalqete chaampiyoonera hattono mini giddo Chaampiyoonerano duucha yannara gobbase riqiwatenni rosichu noose atileeteeti. Habtaami Biheeraawe gaamo deerrinni beeqqitino heewora Meedaaliya borreessiisa hooggurono yanna duuchate e`anno sa’’aate woyyeessitanni daase kayinni tenne heewora woyyaabbino hedo uyinannise gede assinoho.
Filote heewubba aanano woyyaawino dhuka leellishatenni gumulote iillitinotiha ikkanna, kunino ise heewisantannohunni heewisante qeeltanno yine hendanniri mereerinni mitticho ikkitino. Meedaaliya adhate kaajjado heewisamaancho ikkitannota leellishannohonka. Umikki filote heewora doddinohu 2:01,20 sa’’aate ikkanna, gaamosenni layinki deerra amadatenniiti bocu jeefo heewora sa`inohu. Barrubbate albaanni beeqqitino bocunni gumulate heeworano Itophiya riqiwatenni hojjise furduggi yite dodatenni gaamosenni 1:58, 40 ikkitino yannara layinki deerra amadatenniitinka sa’’a dandiitinohu.
Haranchonna mereerima xeertinyera atleeticho Habtaami hojjisenni Itoyophiyunna Afriku riqiwamaancho ikkatenni heewote aana beeqqitino. Ikkollana kayinni baxxinohunni Ameerikunna Ingliizete atleetooti kaajjilluni qolchatenni heewisantinose daafira meedaaliya adhitanno yine hendoonniha hooggino. Atleetitte heewote kaiminni kayse danchu gumunni jeefisate dandiisannose garinni doddurono jeefote kayinni hettisamaanose qolchite sa’’a dandiitinokkihura 6ta ikkite 1:57:56 ikkinohu umisenni witiitte borreessiissino sa’aatenni dippilooma afi’rate dandiitino. Kunni garinni Habtaami tenne heewonni Olompikete dippiloomu deerra borreessiissino umi Itophiyu atileete ikka dandiitino.
Itophiyu baxxinohunni egennantino 5 kume meetire xeertinye labballu filote heewo tenne lamalara harinsi wote mittichu atleetichi calla jeefote heewora sa’’asi batinye Itophiyu daga hanqisino. Umikki gaamonni beeqqinohu atileet Milkkeessa Mengesha 13:31:13 ikkitino sa’’atenni dodatenni 6ki deerra amade woyyaabbino saate borreessiisasinni jeefote heewora Itophiya riqiwannoha callicho atileeticha ikkino. Wole gaamonni kayinni lame atileetooti beeqqitanna; eembarra 3 kume meetire kubbaasincho sa’’ate beeqqinohu Geetinnet Waale 9ki deerra amadinohura jeefote heewora sa’’a didandiino. Wolu atileetichi Nibret Melaakino 14ha ikke jeefisasinni labbanno heewonni filote saikkinni gatino. Kunino heewonnihu kalqete Chaampiyoon Muktaar Idriisi lede Sanyote barra 10 kume meetire qeelaanchi atleet Selemoon Baaregga hakkiicho Tookiyote heedheenna beeqqate kaayyo afi’ra hoogansa Itophiya labbanno heewonni rosamino guma borreessiissannokki gede assino saalfachishannoha ikkasinni batinye manna hanqisino.
Eembarra hashshu mereero harinsoonnihu labballu 1500 meetire jeefote heewora sa’’annoha filate gaamo 1te heewisaminohunna 9ha ikke gudinohu atleet Saamueel Teferra woyyaabbino saatenni aantanno doyichora saino yitanno mashalaqqe fulturono mashalaqqe fultinohu 3kki gaamo heewo gumulantukkinni ikkinohura gaamo 3tenni assinoonni filote heewora woyyaabbino saate borreessiinsoonniha ikkasinni Saamueel Tafarrihu saikkinni
gatino. Gaamotenni 1-6 geeshsha fultanno atleetuwa sa’annohunna gamotenni woyyaabbino saate noonsari 6 atleetooti saatensa la’neenna aantanno doyichora sa`anno filaancho heewora woyyaabbino heewo la’noonnihu gaamo 3 heewora 1—10kki deerrira noo atleetooti woyyaabbino yannanni aantanno doyichora sa`ino. Konni garinni 1500 meetire filora heewisantinori Saamueel Abaate 5kihanna Taadese Lemi 2kiha ikkatenni aantanno doyichora sa`ino. Olompiikenniti atleetiksete heewubba bero barri yannarano heewo suffinoha ikkanna Itophiyu beeqqitannohu 3 kume meetire kubbaancho meentu heewora guma borreessinara dandiinanni yine agarranni. Togoo xeertinyi heewonni lamu atleetooti Itophiya riqibbe 9 dirira albaanni Londenete Olompiikera borreessinoonni dhagge ledate doddanno. Filote Meqides Abbebe 9:23.95 3ha fulte sa`inoha ikkanna; Zerfe Wendimaagenyiti kayinni 9:20:01 saatenni 4ha ikkatenniiti jeefote heewo karsantinohu.
Londenete Olompike Itophiyu dhagenni togoo xeertinyi heewonni umikki yannara seennu atleetenni Soofiya Aseffa birru Meedaaliyi borreessaminota qaangannite. Kalqete atleetikise Chaampiyoonera Doohaho gobbase riqibbinoti Meqides Abbebe, hakko dirinkura harinsoonnihu Afriku chaampiyoonera culkunniha meedaaliya goowaho wodha dandiitinoti wedellitte atileeteeti. Xeertinyunni Biheeraawe woyyabbino saate borreessiisatenni 9:02.52 umiseta assidhino atleetitte Diyaamendete Liigerano woyyaawino guma borreessiisa dandiitino.
Labbano heewonni Doohu kalqete atleetikise chaampiyoonera gobbase riqibbinoti wedellite atileeticho Zerfeno berohu jeefote heewora haaro coy leellishshara dandiitannota hendoonni. Hengilo harinsoonnihu sa’’aate wonshate harinsoonni heewora xeertinye 9:16:95 doddinoti atleetitte gobbate giddo 20 diri woro norira dancha saa’aateeti. Konni xeertinyira woyyaabbino qeellete dhagge noonsari Keeniyu Atleetoota ikkitanna beroo barri heewora kayinni Itophiyunniri meedaaliyu hewisamaano ikkitanno gede assitanno kaayyo hala`lado ikkitannota kalqete atleetikse balaxote hedose wortino.
BakkalchoMaaja 29 / 2013
