Addis Ababa:- Sa`u onte dirrara hadhanni keeshshitino “Addis Wog” haaro hasaawubba aana ka`annoti kaajjado hedubba poolisete waacimmate horo aana hossinota pilaanetenna latishshu ministircho Fitsum Aseffa (D/r) xawissu. “Addis weg” /haaro hasaawi/ barubba amadino maxaafi sayinsummo lamala giddo maassamino.
Xaphoomu ministirchi borro mini pirees sekiretariyaatenni qixxaawinohunna 2011 M.D hanafe sa`u onte dirrara hadhanni keeshshitino “Addis weg” /Haarohasaawubba/ha qara qara hedubba mitteenni amadinohu “addis wog” bare maxaafi maassamino.
Maxaafu maasso amuraati aana Pilaanetenna latishshu ministircho Fitsum Aseffa (D/r) xawissino garinni; “Addis wog” poolisete waaco ikke owaatino. Sa`u onte dirrara gobboomu, yannate, poletiku, miinjitte, dagoomitte, ga`labbotenna hobbaatu hajubba handaaru ogeeyyenna hajo la`anno uurrinshuwa soreeyye afantinowa kaajjado hedubba ka`inonna malu hedubba xawinsoonni “haaro hasaawi” hasaawubba hadhino. Mootimma tenne hasaawu barenni ka`ino hedubbano poolisete waacimmara horonsi’ra dandiitino.
Lawishshahono baatto ce`e galtino daga qarrubba ragaanni “hAddis wog” hasaawa assinoonnita xawisse; gorsunna gammoojjite qooxeessubba ministere umose dandiite poolisete irkisante uurritanno gede assinoonnita coyidhino.
Lawino garinni rosu islanchimma aanano “haroo hasaawa” harinsoonnita xawisse; yannate rosaanonna rosiisaano kayissinnota kaajjado hedubba haaro rosu poolisera waacote gede horonsi’ra dandiinoonni yitino.
“Haaro hasaawi” nni hasaawa harinsoonni hajubba aanano haruudde gibirinnunna baadiyyete latishshi poolisenni, dagittete poolisenni, siiviilete poolise rifoorme poolisenni ka`ino hedubbanna kaajjado hedubba waacimmatenni horonsira dandiinoonnita buuxissino.
Xaphoomu ministirchi borro mini pirees sekiretariyatete sooreette Billene Siyyum ise widoonni; hajo dooratenna beeqqisate ragaanni barenniha ontu dirra harinsho qummeessitino.
Sa`u onte dirrara 35 ali haaroo hasaawubba hadhinota coyidhe; hasaawubba doorantino hajubba shiqqannonna kaajjado hedonna dawaro uyinanninsare ikkansa xawissino.
Hasaawu beeqqisaancho ikkasi xawisse; ka`anno hedubbano qarrubbanna malubba illaallissannorenna lellishshannore ikkansano coyidhino.
Billene xawishshi garinni; soorrote kawa sa`u onte dirrara babbaxxitino gobboomunna yannate hajubba aana “haaro hasaawa” assinoonni. Kuri hasaawubba hasaawu budenna hedote aliidimma kaajjishate illachishshinoreetino yitino.
Dhaggete rosiisaanchi Taammiraat Hayile (D/r), Itophiyunniha poletiku hasaawi dhagge kikkisino. Birihaaninna Addis Zemeni gaazeexubba babbaxxitino dirrara wolaphotenni mootimmatenna poletiku babbadooshshi laooshshubbanna hedubba qixxeessitinota qaagiissino.
“Addis wog” hasaawino dimokiraase kaajjitanno gedenna hasaawu bude ikkanno gede umisi qeecha baraasinota xawisino.
Xaphoomu ministirchi dagoomittete hajo amaalaanchi ministir Diyaaqoon Daanieel Kibiret; “Addis Wog” sufo noosihu hasaawu bude kaajjanno gede assanni noota xawisino. Albillichono konni dani hasaawubba qoqqowu, woradunna olluu geeshsha hala`la hasiissannonsata coyi`rino.
Maxaafu 234 qoollanna onte gafa amadinoha ikkanna sa`u onte dirrara babbaxxitino hajubbanni hadhino “Addis wog” hasaawubba mitteenni amadinoha ikkasi xawinsoonni.
Abbebech Maatewoos
Bakkalcho Ammajje 21, 2016 M.D
