Addis Ababa:- Sidaamu afii miidiyunniha ikkara annuwinke yannara lowo halchonna gooro no yaatenni qoqqowu pirezidaantichi kalaa Desta ledamo xawisi.
Qoqqowu pirezidaantichi Kalaa Desta Ledamo sa`u lamala giddo Sidaamu biroodkaastiing korporeeshiine SBC safama laise sayisino sokkanni xawisino garinni; tenne halcho wonshate yanna yannantenni loonsoonni loosi lophanni dayno.
Sa“i lamalunna settu diri giddo Sidaamu afii raadoonetenni sae televizhiinetenni coyi`nanna keeshshinota xawise; ikkollana kayinni hala`lado diilallote yanna afire coyi`ramanni dikeeshshino yiino.
Sidaamu qoqqowunni tantanamate sharro kaajjitanni daggu yannanni kayse seeda saate sokka sayisa, daga afiisenni mashalaqqe macciishsha hattono budesinna ayimmasi filiqqisanno miidiya kalaqidhinota qaagissino.
Pirezidaantichu kalaa Desti; qoqqowo ikkini gedensoonni Sidaama gotti assanno miidiya kalaqate mixi`ne loonsanni keeshshinoonnita kayse; jawa Sidaamu Biroodkaastiing corporeeshiine SBC umosi dandiino biifado ijaarira hattono giddoydi uduunne wonshine loosaasineteno injoo kalanqe miidiyu uurrinsha safi`noonnita xawisino.
Miidiyu widoonni nooti dagate halcho konni garinni higasenni Sidaamu daga hawalle hagiidhitinoonni yaatenni pirezidaantichu; miidiyu Sidaamu dagaha ikkinohura daga hedose qarrantukkinni filliqqisa dandiitanno yee ammanannota huwachishino.
Ledoteno miidiyu ogeeyye dagate geeshsha iillite hasiisanno garinni dagate hasatto xorshatenni dagate rosicho uyitanno yine agarranni yiinohu pirezidaantichu; daga miidiya horonsidhanno gari mimmitoho rosicho aannonna qarra tirannoha ikka hasiissannota qummeessino.
Miidiyu albi annuwinni adhine dangoonni budenna balchooma ilamate egensiisatenni sufisiisa hasiisanno yaatenni pirezidaantichu sokkasi saysino.
Hawaasi yuniverisitera Sidaamu afii rosiisaanchi Maatoos Weldegiyorgiisihu isi widoonni; miidiyu dagate hasiissanno mashalaqqe yannatenni iillinshanni dooga ikkasi xawise; muli yanna giddo safaminohu Sidaamu biroodkaastiige korporeeshiine afuu lophoranna fakkanimmate jawu qeechi noosita coyi`rino.
Tenne harinshonni dagoomu mereero budu kaajjannotanna bude soorrira kalaqantanno yee; dagoomu umisi afiinni dagoomittenna poletiku mashalaqqe afiranno doogo ikkitinota xawisino.
Wole widoonnino miidiyu babbaxxino garinni bude kaima assitino boohaarrete kaayyo kalaqanno yaannohu rosiisaanchu Maatoosi; baca daga rosiisatenna iillate jawa doogo ikkinota ammananno. Xaphooma rosu egennora, dagoomittete heeshsho soorrateno jawiidi qeecha fulannota buuxisino.
Miidiyu dancha ikkitino harinshono ikko dancha ikkitinokki harinshuwa badatenni daga doorshu doogo harunsitanno gede kaa`lannota coyi`re; dagoomu mimmitu ledo sumuu yee hee`ranno gede assanno waalcho ikkinotano xawisino.
Jeefoteno Sidaamu biroodkaastiing korporeeshiine xa hanaffino garinni yannillicho, babbaxxitino amado nooseta kaajjado qixxaawo qineessatenni afuu, budu lophora mootimmawiinni irko xa`matenni, fullahaano beeqqisatenni hala`ladunni loosa hasiissannota rosiisaanchu Maatoosi qummeessino.
Abbebech Maatewoos
Bakkalcho Maaja 3, 2017 M.D
