Guraage:- Guraagete budi, afuunna dhaggete simpoozeeme Mereerimi Itophiyu qoqqowi Guraagete zoone Wolqixxete quchumira Guraagete budu mereershi harira sa`u lamala giddo harinsoonni.
Ayyaanu aana afaminohu Mereerimi Itophiyu qoqqowi pirezidaantichi Indaashshaw Xaasew (Dr) xawisino garinni; guraagete budi, afuunna dhaggete simpoozeeme dagate dhagge, budunna afuu mittu gari amadonna suudu hee`rannosi gede assitanno yiino.
Guraage sanna kiirsiisino dhaggete, afuunna budu balchoomi noosi dagoomaati yiinohu pirezidaantichu; daga mittimmatenni heera hanaffino gaariwooshi amanyootinni hanafe dhaggensa maareekkate, afoonsa gutunniha assatenna budensa xaadisirate luphiima wo`naalsha assitanni keeshshitino yiino.
Guraagete daga mittimmase kaajjishatenni wolootta daga ledo noose xaadooshshe woyyino garinni kaajjanno gede hanafantino loossa sufisiisa hasiissannotano qummeessino.
Soojjaati Guraagete zoone qaru gashshaanchi kalaa Musxefe Hasen isi widoonni; Guraagete budunna afuu simpoozeeme dagate mittimma kaajjishate ragaanni luphiimu qeechi nooseta xawisatenni; simpoozeeme roduuwimma jawaachishatenni woloota roduuwu daga ledo dirrate mittimmatenni keeshshino xaadooshshe roore kaajjishate kaa`litanno yiino.
Kalaa Musxefe ledeno Guraagete daga looso baxxannota, jawaata, suuqira budese assidhe umise heeshsho woyyeessatenni kayse gobbate miinju gatamarshi hattono daddalu amanyootinni kaajjado dagooma ikkase huwachishino.
Guraagete zoone qaru gashshaanchi kalaa Laaca Gaaruma isi widoonni; Guraagete dagoomi haammata hundi budillaancho balchoomma, ha`nura egenno, afuunna dhaggete ayidde ikkinota buuxise; kuri xiinxallatenna ilamate sayisate kaajjine loosa agartannota xawisino.
Tini simpoozeeme gobbanke fakkanimmara riqiwamannokki qeechi nooseta xawisinohu kalaa Laaca; afuu ayimmate xawishsha ikkinota xawise; Guraagete afii latanno gede, lophannonna ilamatenni ilamate sa“anno gede baalunku umisi qeecha fula hasiissannota qummeessino.
Barraho Guraagete dagoomi bude, balchooma illaallissanno “Emaanda” yaamantino fiilme reqeccote shiqqino.
Odeessaancho fiilme Guraagete Masqalanna Arafa, Xiyya kalqoomu kinchi mayimma, Guraagete amuwi Antirooshiti ayirrinsanni gara, babbaxxitino goshooshubba daafira, Guraagete xawishsha ikkino Adaabina ayyaana ayirrinsanni amanyoote illaallissanno.
Guraagete daga afuu, budunna dhaggete simpoozeeme Guraagete zoone gashshootta, Guraagete latishshinna budu maamari hattono Wolqixxe yuniverisite gutunni qixxeessitino.
Yaareed Geetaachew
Bakkalcho Maaja 3, 2017 M.D
