Tokiyoo 2020 Olompiikete beeqqaano ikkitino gobbubba mereerinni mitte ikkitinoti Itophiyu gumaho agarranni Atileetikisete heewo sa’u Arbe hanaffurono worlidi teekuwaandotenna shalleettete ispoorte beeqqaancho ikkite Olompiikete heedhannose keeshsho mittuno meedaaliyweello gumulantino. Tole shalleettete heewisamaancho Selaami Amehati sai Sambata 137 kiilomeetire heewose tayisse fultinoha ikkanna worlidi teekuwaandotenni tole heewisamaancho ikkinohu Selemooni Tufihu qole sa’u Qidaame layinki doycho heewonni qeelamasinni meedaaliyu heewo gobbaanni ikkasi qaangannite. Ikkollana dhaggete umita ikkitino Tokiyoote Olompiikenni Selemooni mulla angasinni gobbasi di-higanno. Selemooni Tufihu heewotenni dippoloomu baraarsha afi’ratenni Itophiyu dhaggenni umi Atileeticha ikkinno.
Selemooni dippolooma afi’rinohuno beeqqino 58 kiilogiraame heewonni lamalki deerra amade gumula dandaasinniiti. Itophiyu dhagge giddo umi yannara jawa ispoortete battala Olompiike worlidi teekuwaandote ispoortenni gobbasi riqiwinohu Selemooni, heewote yannara gawajjo xaaddeennasi boco gumulo sa”a dandaa hoogirono lekkasi mundiitanna heewo sufe assino sharro batinyu giddo galatamanno assitinosi.
Wolootta ispoortubbanni baxxino garinni hunkee dunatenni sa’ne mundee dunatenna miqicho hiiqqamate geeshsha kakkalo kakkalammara iillishshanno ispoortenni Selemooni meedaaliyaa borreessiisa dandaano hoogirono cinca gudisiissanno kaajjado heewisamaancho ikke shiqasinna dippoloomu deerra amade gumulasi Itophiyu Olompiike dhagge giddo su’misi culku kuulinni borreessamanno assinosi. Qajeelshiishaanchu Maasteri Addisi Urgeessihuno hattonni dhaggete beeqqaancho ikkate dandiino.
Umi doycho xaado sa’u Qidaame 58 kiilogiraame Jaappaanaawichu Suuziki Serjiyo ledo assinohu Selemooni heewo dancha godo’lete hayyo aliidimma amade qeelasi di-hambannite. Bacu-boci gumulo heewora Tunizaawichu Jenduubi Mehaammedi Kahiliinihu ledo xaadinohu Selemooni cinca gudisiissanno heewo assirono bixxilletenni qeelame bocu gumulo sa”a dandiikkinni gatino. Selemooni bocu gumulo heewora lekkasi mundiitanni heedheennanni jeefote geeshsha heewisaminoha ikkanna aantete Reeppeshazhira (Camote meedaaliy xaadora sa’’ate assinoonni heewonni) heewotenni badhera di-yiino. Konninnino kalqete deerrinni Olompiikete komite sumudi hunda heewisamaanchu Ruusiyaawichu Mikaiili Artaamonovinni qeelamirono konni deerrira iillasi umosi naandara hasiissannota batinyu hedonsa uytino.
Selemooni xappooma heewo beeqqitino 16 heewisamaanonni lamalki deerra amade gumulino. Heewote aana Selemooni qeelinohu Kaahiliininna Artaamonovi birrunna camote meedaaliyi qeelaano ikkatenni heewo gumultanna Xaaliyaanaawichu Viito Deeli Akuwiilahu gumulote Kaahiliili qeelatenni culku meedaaliyaa adhino. Selemooni Tufihu Itophiyu Olompiike dhagge giddo worlidi teekuwaandote ispoortenni umi yannara afi’rino lamalki deerra lainohunni tuqu xaadooshshi qoolisi aana hagiirresi “Maganu Galatamo!” yaatenni xawisino.
Tookiyo Olompiikete worlidi teekuwaando 61 gobbuwanni fultino 131 kalqete worba ispoortenyooti sette babbaxxitino kiilo giraammanni beeqqitanno.
Hanafantunkunni techo lamalikki barra amaddinoti 32ki Tookiyo Olompiikete gobbubba batinye meedaaliyuubba mitte higge hoqooqidhanno Atileetikise labbanno heewubba hanafa hooggurono batinye gobbubba heewubbatenni meedaaliyuubba borreessiisate aana afantanno. Eembarri hashshi geeshsha Ameeriku 22 meedaaliyuubba borreessiisatenni balaxaancho gobba ikkitanna, kurino mereerinni 9 culku, 5 birrunna hattono 8 camote meedaaliyuubbaati.
Layinki deerra amaddinoti Chaynuno hatto 9 culku, 5 birrunna 7 camote xaphooma 21 meedaaliyuubba afi’ratenni Ameerika harunsitanno. Qixxeesaancho gobba Jaappaane 9 culku, 3 birrunna 5 camote xaphooma 17 meedaaliyuubba amadetenni deerru shaera sayikki gobba ikkitino. Ruusiyu Atileetooti qole gobbansa heewotenni agawanturono mereerima ikkite harissanni afantanno heewubbanni 5 culku, 7 birrunna 4 camote xaphooma 16 meedaaliyuubba gamba assatenni shoolki deerrira afantanno. Ingilize, Awustiraaliyu, Wodiidi Kooriy, Ferensaye, Koosovonna Ixaaliyu qolte tonnu geeshsha noo deerra amaddino.
Addisu Adoola
Bakkalcho Maaja 22, 2013
