– 1.8 Miliyoone ale dagoomu bissa horonsi’raano ikkitino
Qiddist Gezzaheny
Addis Ababa:- 2016 baajeetete dirinni Onte aganna giddo wedellu dancha fajjo owaantenni 800 kumi ali birra gatisa dandiinoonnita Sidaamu qoqqowi Meentu, wedellunna dagoomitte hajubba Biiro egensiissu.
Biirote layinki sooreessinna wedellu handaari sooreessi kalaa Leggese Destihu Itophiyu pireesete uurrinshara xawisanni; amandoonni baajeettete dirinni Onte aganna giddo gumulantino wedellu dancha fajjo owaantenni mootimma fulo assitannoha 823 kume 324 ali birra gatisa dandiinoonni.
Xaphoomunni baajeettete dirinni 1.3 miliyoone ali birra wedellu dancha fajjo owaantenni gatisate mixo amande loosu giddora e’noonnita kayisinohu handaaru sooreessi; onte aganna giddo mixotenni xibbuunni 63% gumulloonnita xawisino.
Amandoonni baajeetete dirinni wedellu dancha fajjo owaantenni 612 kumenna 76 wedella hawadinna 142 kume 279 wedella kayinni arri owaantenni xaphoomunni 754 kume 156 wedella dancha fajjo owaantenni beeqqisiisate hende, xaa geeshsha 847 kume 754 ikkitannore dagoomu bissa horonsi’raano assa dandiinoonnita kalaa Desti uurrinshankera kulino.
Qoqqowoho konni loosinni haanju harumi, fayyimmate owaante, safote latishshi loossa, dooggate tiraafikete hobbaate lendanna minu haaroonso, dhukiweeloota kaa’la, hurbaate itisanna labbino 13 dani loossa gumullanni hee’noonnita lede xawisino.
Wedellu dancha fajjo loossanni beeqqansa dagoomittete ikkitubba bowirsate ragaanni noose qeechi luphiimaho yiinohu kalaa Desti; dagoomuno dancha fajjaaleessimma konni aleenni rosicho assi’ranno gede lede huwachishino.
Wedellu togoo danchummate loossa aana beeqqatenni danchumma rosicho assi’ranna dagoomittete yawo fula hasiissannonsata qaagiissino.
Bakkalcho Sadaasa 18, 2016 M.D
