Addis Ababa:- Dijitaalete miidiy ogeeyye gobboomu amaalamme ha’rinsho aana dilaalinsaha ogimmate qeecha baraassanno gede Itophiyu Gobboomu Amaalamme Komishiine xa’mitino.
Komishiine tenne lamala hanafora dijitaalete miidiy ogeeyye ledo assitino hasaawi aana Komishiiner Mulugeeta Aggo xawisino garinni; gobbate gede leeltannota sumiimme hoongubba amaalammetenni tirate loonsanni hee’noonni. Dijitaalete miidiy aana noo ogeeyye ha’rinsho irkisatenni agarranninsa qeecha baraasa noonsa yiino.
11 qoqqowubbaranna lamente quchumu gashshootubbara gobboomu amaalammete songora beeqqaano dooratenna sirnya gamba assate loossa gumulase qaagiisse; Tigirayete qoqqowo ha’rinshote beeqqaancho assa lendeenna gattino loossa gudate heedhanno ha’rinshora dijitaale miidiiy qeechasi fulanno gede xa’mino.
Dijitaale miidiy gobboomu amaalamme ha’rinsho aana hee’rasira hasiisanno qeechi aana hasaawu kaimi borro shiqishinohu Komishiiner Ambaye Oogato (D/r) umisi widoonni; dijataalete miidiy ogeeyye gobboomu amaalammera annuwa ikkatenni ogimmansa tenne bayi’ra gobboomu timo seyoora uminsa widiidi dilaala baraassanno gede woshshatto assino.
Ha’rinsho hasi’nanni garinni jeefisantanno gede baalanti qeechamaano annimate qeechansa fula noonsata kule; dijitaalete miidiy ogeeyye gobboomu amaalamme ha’rinsho kaa’litannota mittimmate odeessishshubba qixxeessatenni amaalammete ha’rinshora injiitino akatubba kalaqa hasiissannonsata huwachishino.
Dijitaale miidiy gobbate gede kalaqantino sumiimmete hoonge amaalammete widira abbatenna ha’rinshote beeqqitinokki bissa ha’rinshonniwa dagganno gede assate ogimmansa horonsi’ra noonsa yiino.
Dagoomittete miidiyinni kaphu mashalaqquwa tareessinanna anfannita qaagiissinohu Komishiinerchu; dijitaale miidiy mittimmate sumimme kalaqa dandiissannota dancha hedubba kalaqatenni baalanti hajo la`annonsa bissa hasaawu widira dagganno gede umisi qeecha fula hasiisannosi. Shiqqi assitannonna gobba albira qaafissanno hedubba aana illachisha hasiissannotano coyi`rino.
Barete Komishiine xaa geeshshi ha’rinshosenni gumultinoti qara loossa, xaaddino mitiimmuwa, adhinoonniti tirote hedubba hattono gattino loossa hasaawu beeqqaanora shiqqino.
Hasaawu beeqqaanono komishiine dijitaale miidiy komishiinete loosi aana jawa beeqqo assanno gede kaayyo kalanqoonnikkita buuxisse; qeecha aate wo’naalshubba heedhurono ikkado ikkitukkinni keeshshitinota kayissino.
Batinye odoono macciishshamme leeltannonsarenna sumimmentenni roore huluullo kalaqqannore ikkansa qummeessite; aantete komishiine kalaqqannonsata injiitino akatubba horonsidhe ogimmate qeechansa fulate hixamanye assitannota buuxissino.
Demmellaash Demmeqe
Bakkalcho Onkoleessa 14, 2017M.D
