Addis Ababa:- Sidaamu qoqqowira bushshu madaabbari moori ledo amadisiisaminohunni angansa no yine huluullammoonni mannoota seeru hundaanni hosiinsanni hee’noonnita Qoqqowu Keerunna Ga’labbote Biiro xawissu.
Tenne odoo qixxeessinummo yanna geeshsha 148 moorunni huluullamoonnire seeru hundaanni hosiinsoonnita xawinsoonni.
Itophiyu pireesete uurrinsha ledo bilbilunni hasaawa assinohu Qoqqowu Keerunna Ga’labbote Biiro Sooreessi Kalaa Alemaayyehu Ximootewoosi xawisino garinni; qoqqowoho xaphoomunni 25 kumi 140 kuntaali bushshu madaabbari mooramino; loosidhe galtino daga madaabbara shiimu baatooshshinni afidhanno gede dandiissate mootimma 28 Miliyoone birra irko assitinnoho.
Konninni, madaabbaru baatto e’’eenna afi’nara dandiinanniha 412 kume kuntaala laalcho hoongoonni yiinohu sooreessu; konne laalcho afi’ne techo noo dikkote waagira soorrineemmero 1 Biliyoone ali woxe hoongoonnita egensiisino.
Konni ledo amadisiisaminohunni assootu aana angansa no yinoonnire 148 manna seeru hundaanni hosiinse buuxo assinanni hee’noonni yiinohu kalaa Alemaayyehu; deerra deerranko afantannori loosu massagaano, woradu gashshaano, gibrinnu ogeeyye, olluu murrootinna baadiyyete loosu harisaano afantannota qummeessino. Moorunni huluullammoonni massagaano biilloonyunni ka’anno gedenna seerunni xa’mantanno gede assinoonni.
Ledoteno, angansa no yine huluullammoonnire 59 madaabbaru daddalaano seeru hundaanni hosiinsiisate ugaanxanni hee’noonniha ikkanna dagano reqeccishatenni halantanno gede xa’mino.
Wole widoonni qoqqowu gobbate keere agarsiisate hixamanye loosanni noota xawisinohu sooreessu; ofollonsa wole gobba assidhe Hawaasi quchumi giddo mine karaayya’e qoqqowunna gobbate keere hunate Itophiyu Telekomunikeeshiine loossannohu gobbaanni Ithiyo-Telekomunikeeshiinete aana womaashshu gawajjo abbitanno tekinolooje horonsi’ratenni haammata Siim kaarde (masmara) attante hirtannore seeru hundaanni hosiinsoonnita xawisino.
Kalaa Alemaayyehu; kuri jaddaaleeyye gobba giddonna gobbaanni halamaano noonsare ikkansa assinoonni qorqorshinni buuxa dandiinoonni yiino.
Kuri jaddaaleeyye seeru hundaanni hosiinsi yannara Itophiyu giddo hallanyootu angara nookkihanna mootimmate angara calla hee’rannoha, mootimmate anganni fuliro lowo gawajjo abbanno uduunnichonna lowo woxe angansara amandoonni.
Jaddaaleeyye Hawaasi quchumira keeshshitinore ikkansa afi’noonni tajenni buuxa dandiinoonnita kalaa Alemaayyehu qummeessino.
Daga minensa kiraho uyitanno woyte karaayya’’anno manchi ayimma buuxxanno gede duu’re huwachishino.
Amadisiiseno, qoqqowo keere agarsiisate loonsanni loosi aana dagate halamme jawate yiinohu sooreessu; daga hiittenne yannarano huluullissanno ikkitubba la’uro ga’labbote bissara mashalaqqe aatenni mootimmate waatira ikkite halamaanchimmansa leellishshanno gede sokkasi sayisino.
Qiddist Gezaheny
Bakkalcho Birra 1, 2016 M.D
