Addis Ababa:- Hawaasi quchumira 823 miliyoone birre ale fulonni ijaarshinsa muli yanna giddo hanafamino 18 rosu minna deerru woyyeesso piroojekitubba mereerinni gama gooffinota Quchumu Rosu Biddishshi xawisi.
Biddishshu sooreessi Birhaanu Dessaaleny (Dr.) xawisino garinni; quchumu gashshooti rosu minna deerra woyyeessate adhino murciraanchimmanni ijaarshinsa hanafamino piroojekitubba giddonni lamalunnihu goofino.
Piroojekitete ijaarshi ledote rosu kifilla amadinoha ikkasi kule; ijaarshuno sa`u lame dirrara gumulaminohu deerrinsa manaado ikkino umi dirimi rosu minna giddo ikkasi coyi`rino.
Rosu kifilla ijaarshi rosaanote kiiro biddi assatenni injaanno rosu qooxeessa kalaqate dandiisanno yiinohu sooreessu; piroojekitete mereerinni 20 rosu kifilla amadinohu Taaboori umi dirimi rosu mini haaru ijaarshira tayxe rosaano e`annota xawisino.
Gattino 11 sase dirima afidhino fooqe ijaarshi piroojekitubbano babbaxxino deerri aana afantannota xawise; amandoonni dirinni wo`munni wo`ma jeefisate loonsanni afammannita coyi`rino.
Xaphooma 18 halshshote piroojekitubbanni ijaarranniti 360 ledote rosu kifilla gooffe owaante aa hanaffanno woyte mitte doychonni 18 kume rosaano haa’rate dhuki heerannonsata egensiisino.
219 miliyoone birre ale ikkitino fulonni mitto gallanni rosu mini ijaarsha hananfoonnitano Biddishshu sooreessi coyi`rino.
Hattono quchumu gashshooti rosu mini deerra woyyeessate loosino sasu dirimi ijaarshinni rosaano adhate qixxaawo assinoonnitano xawisino.
Rosu mini akatoomunninna egennotenni bilchaattino qansoota kalaqatenna rosu dirinni luphiima guma borreessiisate mixo amandoonnitano xawisino.
Hawaasi quchumira 42 balaxote uurrinshunniti, 44 umi diriminna 14 layinki dirimi rosu minna afantannoha ikkanna sa`u lamala Sanyote barra rosu faajjetenni hanafamino.
Abbebech Maatewoos
Bakkalcho Wocawaaro 17, 2016 M.D
