Addis Ababa:– Sidaamu dagoomu qoqqowu mootimma pirezidaante kalaa Desta Ledamo Masqalu Demerinna Mewuliidu ayyaannara hawalle iillishi`ne yee sokkasi saysino.
Sidaamu dagoomu qoqqowu mootimma pirezidaantichi kalaa Desta Ledamo baalante Kiristinnu amma`no harunsaano hawalle Masqalu Demeru ayyaanira keerunni iillishi`ne yee dancha halcho sokkasi sayisino.
Masqalu Kaaliiqi manchi beettira noosi baxille xawisino, gatonna cubbunnita maaro mannu oosora uyino hegere xawishshimma noosiha ikkanna Masqalunni baxille, maaronna kaa`lama xawinsanni yiino. Ayyaanna ayirrinseemmo woyte Itophiyimmanke leellisha mimmitu baxilli xawishsha ikka hasiissanno yee pirezidaantichu xawisino.
Masqalu Demeri ayyaana ayirrinsanni gari daga gutunninna mittimmatenni mitte basera gamba yaatenni ayirrisa mitto amma`note amanyoote ikkanna kunino xawoho assinanni amma`note assooti gobbaannino gobbankerano jawa daa’’attote jiro ikke owaatanni keeshshino yiinoha ikkanna; konne muxxe ayyaana balchoomasi agarino garinni ayirrisatenninna dagganno ilamara sayisa xaa ilamanni agarranni jawa mini loosonkeeti.
Masqalu Demeri ayyaana ayirrinsanni amanyooti kalqete UNESCO amammandannikki donnanni mitto ikke egennaminoha ikkasinni naaxxa hasiissanno yiinohu pirezidaantichu; konni korkaatinni haammata gobbuwanni konne ayyaana beeqqate daa“ataano gobbanke wosinimmatenni daggannohura rosantinota Itophiyimmate wosinsira leellinshammonsara hasiisanno yiino.
Ayyaana baxillunninna mittimmatenni, kaa`lamatenninna irkisamatenni, dhuka ajjino dagankenna geerra irkisatenni dancha looso gumullanni ayirrinso yaanni qummeessino.
Pirezidaantichu Desta Ledamo Isilaamu amma’no harunsaano baalantera hawalle 1498ki Masaalaanchu Mehaammedi ilamishshu ayyaanira iillishi’ne yiino.
Masaalaanchu Mehaammedi taalleenyanna ayirrinye leellisha, mimmitu ledo kaa’lama, manchi beetti akata ikka hasiissannota Qullaawu Quraani giddo xawisinota kayise; Musiliime dagoomi Kaaliiqi hajajo ayirrisatenni ayyaana ayirrisa hasiissannota coyi’rino.
Abbebech Maatewoos
Bakkalcho Wocawaaro 17, 2016 M.D
