Addis Ababa:- Masqalunna Mewuliidu ayyaanna lainohunni amma’note harunsaano hawalle iillishi’ne yaanni Xaphoomu ministirchi Abiy Ahimed (Dr) sokkasi saysino.
Xaphoomu ministirchi amma’note ayyaana ayirrissanno amma’note harunsaanora dancha halchosi xawisanni; haaru diri chibbo haaru garinni xawino diri hanafannoho. Mannootunniti haaro hexxo haaro gede hanaffannote. Masqalu ceicho usurantanno yannaati. Tini yanna Baattote hayisso mudhannote yiino.
Damaru yaa, leda, ledi, kuusi yaate. Damaru soorrote malaateeti. Jaddaasinu sutantanno Masqali baatooshshu malaati widira soorramino; yiinohu Xaphoomu ministirchi Abiy; Damaru, haammata manna gamba asse keeshshiishannoho; Damaru ajinowa ledate; Damaru billaallinoha gamba assate. Base basente xeerti’re nooha gamba assannohonna ledannoha ikkasi xawisino.
Damaru Masqalu ayyaani feeffatora haqqe lendanniho. Haqqe gamba assine chibbo; chibbo gamba assine Damara assinannite. Haqqete xigirra ayii geeshsha billaalituro gamba yaa hoogguro chibbo ikka didandiittanno. Haqqe gamba asse xaadisannohu usuraanchu no. Chibbo gamba yite irkisante uurra hoogguro, Damara dikkitanno. Chibbo mittowa uurrisannohu mereeri haqqichooti. Kuni haqqichi, jawaatahonna gaangawasi noo haqqe duqqa dandaannoho. Tini heelliicho Itophiya riqibbanno yiino.
Haqqe xaadissanno xushsho gede, Itophiyu daga xaadissannoti babbaxxitinoti ayiimma noonke yaanno xawisinohu Xaphoomu ministirchi; Damara gamba assatenni gobbanke gottima adda assate gamaba yineemmo lawishshaati yaanniiti sokkasinni kulino.
Itophiyu chibbote haqqe gede, budu, amma`no, jiro, hornyu, laooshshu, dhagge noosete ikkaseno qummeessino. Xaphoomu ministirchi Abiy Ahimed (Dr.) bero ayirrisami Mewuliidu ayyaana laise amma’note harunsaano baalantera hawalle iillishi’ne yitanno sokka sayisino.
Muxxe Itophiyu Muslimoota! Hawalle Masaalaanchu Mehammedi ilamishshu ayyaanira keerunni iillishino’ne yee; Masaalaanchu ilamishsha ayirrinsanni yannara Misliime daga Masgiida hadhe, mitteenni huuccatto assidhanno. Bayiru masaalaanchu loossa, rosiishsha kullanni. Masaalaanchu lubbote noo yannara noosi shaqqille, shooshanqe, danchummanna gatona yaa kayissanno yiino.
Hiittenne amma’no harunsaano ikkinoommori Itophiyu qansooti konni bayiru ayyaaninni Musliime daga ledo mittoo’mine danchummanna shaqqille woxenke assi’ratenni ayyaanaame heeshshonke jiroo’misi’neemmo. Shaqqillunna danchumma hattono gatona yaa tirtannokki qarri dino. Fushshitannokki buusi dino yaanniiti huwachishinohu.
Ayyaana ayirrinseemmo woyte masaalaanchu Mehammedi atoote wodanchatenna shaqqillu doogo hedatenni saysa hasiissanno yee; marro dancha Damarunna Mewulidu ayyaana ikkanno gede halchosi xawisino.
Amsaalu Felleqe
Bakkalcho Wocawaaro 17, 2016 M.D
