Addis Ababa: – Sidaamu Dagoomi Qoqqowi teessaano Abbay Kofatto shoolki dooycho waa wonshate mixo jeefo ganasenni jawu hagiirri maciishaminonsata xawissino; Kofatto ijaarante jeeffuro dagate jawa hexxo noota kulte; Kofatto ijaarante jeefo ganta geeshsha xaano woxunni ikko wolqatenni qeechansa fultannota buuxxissino.
Kalaa Taaddesse Yenehu Harooreessu Woradi teessaanchooti. Abbay Kofatto shoolki dooycho waa wonshate mixo jeefo gantino daafira addintanni tashshi yiinosita xawise; tini kofatto ijaarante jeeffuro Itophiyu dagara jawa hexxo ikkitinota xawisino.
Kalaa Taaddese tini Abbay kofatto jeefo ganta geeshsha woxisinnino ikko wolqasinni umisi qeecha fulannota kule, dagano uminsa qeecha fultanno gede kakkaayisate looso loosannota buuxisino.
Abbayi kofatto ninke Itophiyu dagara baxxitino tiro afidhinote yiinohu wolu Hawaasi Quchumi teessaanchi Kalaa Qabbanni Dikaaleho. Isino hedosi woranni, Abbay Kofatto ijaarantanni noo baychi geeshsha mare illesinni towaanyo assinota kule; mittu Itophiyu qansichi gede shoolki dooycho waa wonshate mixo jeefo gantino daafira hagiirru macciishaminosita hasaawino.
Kalaa Qabbanni, Alba tenne kofattora aganu damoozasi baate boonde hidhe umisi irko asse qeechasi fulino. Xaano Kofatto jeefo ganta geeshsha irko assanni qansichimma`ya dilaala fuleemmo” yiino.
Tenne jawa Pirojekte ijaarre jeefo gansiisate geeshsha iillisha, Kalqete dagoomi aana Itophiyu dandaannotanna jawa gobba ikkasi leellishannota Kalaa Qabbanni lede xawisino.
Albihu Itophiyu Xaphoomu Ministerichi Mellese Zeenaawihu, olluubbatenna kalqete gobbuuwa xiiwo badhera qolatenni, Abbay aana pirojekte loonse waa kofatenni daga tunsichu giddonni fushsha noonke yee Itophiyu daga qacetenni qacete geeshsha kakkaayisatenni Badheessa 23, 2003 M.D baayridiita Abbayi kofatto safinoti qaangannite.
Hanafote yannara Gibitsenna kalqete gobbuwa, tenne kofatto ijaarre jeefo gansiinsannikkiha lawinsarono; Itophiyu daga kiisenni fulino womaashshi callunni jawa ikkitino kofatto ijaarre xaa yannara jeefo gantanno gede assinanni hee`noonni. Tenne jawa pirojektete loosi haammatu jeefo afi`reenna lame terbaayne loosu giddora eessine caabbicho burqinse horonsi`ra hananfoonni; olluu gobbarano hirre eono afi`ra dandiinoonni.
Tayxeno shoolki dooycho waa wonshate mixo jeefo ganteenna sa`u lamalara Dr Abiy Ahimedihu Itophiyu dagara, “Hawalle tashshi yiino`ne” yee sokka saayisinotino qaangannite. Tenne harunsite qoqqowubbate pirezidaantootino hagiirru sokka saayisse kofatto jeefo ganta geeshsha qoteho uurritannota buuxxissinoti qaangannite.
Abrahaam Saamueel
Bakkalcho Wocawaaro 10, 2016 M.D
