Addis Ababa:- Dhagge kaima assitino huluullo gobbate gede qarra kalaqqanni noo daafira ilama sufo noo garinni Itophiyu daafira amaaltanno gede assa hasiissanno yino dhaggete xiinxallaanchi Pirofeeser Bahiru Zewudehu.
Pirofeeser Bahiru Zewudehu Itophiyu Pireesete Uurrinshara uyino xawishshinni; ilama Itophiyu hajo daafira roorenkanni amaaltanno gede assatenni dhagge kaima assitino huluullo roore qarra kalaqqannokki gede loosa hasiissanno.
Itophiyanna Itophiyimma la’’ino hajubba albi yannara leeltinokki huluullonna huwatate qarrubba xaa yannara batidhe leeltanno yiinohu dhaggete xiinxallaanchi; qarrubba amaalammetenni xawo assine gobbanke lopho safo amaddanno gede assa hasiissanno yiino.
Dhaggete harinshonni babbaxxitino qarrubba dino yaa didandiinanni; miicono ikkito dancha loossa sa’u dhaggenni loosante sa’ino yiinohu pirofeeserchu; xa kayinni haaro yannaati; konnira sa’ino foonqenna yekkeero sa’ne ha’ra hasiissannonke yaanni hedosi worino.
Mittoonsitannonkenna lophonkera kaa’litannonke hajubba aana illachishate kayinni mitte doogo kaajjado hasaawa assate yino. Ilama sufo noo garinni gobbansa daafira amaalamanna Itophiyu daafira yaamantino ba’re kaajjisha dagatenna dagoomu hedo roorenkanni bowirtanno gede assate kaa’litanno yiino.
Gobbate hajo aana babbaxxitino doogganni kalaqantino koffeenyuwa tirate sufotenni ilama hasaawisa hasiissannota qummi asse; huluullonna sumimmete hoonge ajishate xawadimmatenni xiinxallote safo amaddino borro shiqishatenni amaalama hasiissannota huwachishinno.
Dhaggenke aana laafa mashalaqqe ikkitukkinni rumuxxitinotanna sayinsitte amado noonsa mashalaqquwa amadatenni borreessanna coyi’ra hasiissannota qummi assinohu pirofeesrchu; aantete dhaggete huwanyootinke aana roorenkanni loosate kaa’litanno dhaggete xiinxallaano maamara uurrinsoonniha ikkasinni maahoyyaanchu gumi hee’rannosi yee agarannota coyi’rino.
Babbaxxino illacha amadinoha hiikku manchino ka’’e wodanisi gede dhaggete mashshalaqqe fincannohanna huluullo kalaqqanno hedo kalaqa ikkikkinni, ilama gatamarara dandaannohanna halaalaanchimmate aana safaminoha dhaggete huwanyoote kalaqa gobbate gatamarshira safo ikkinota pirofeeser Bahiru Zewuduhu xawisino.
Qiddist Gezzaheny
Bakkalcho Wocawaaro 3, 2016 M.D
