Pirezidaantitte SaahileWorqi, Tookiyo 2020 Olompiike beeqqitanno luukaanete gaamo geego assitino. Itophiya jawa assitinose maalalote oosose mereerinni Atileetootu albisaano ikkansa Pirezidaantitte SaahileWorqi coydhino. Roomu Olompiikera Maaratoonetenni hanafantino bilicci yitanno qeelle bareedu Abbebe Biqilihu mulla lekkanni dode qeelatenni dhagge loose saino yitino.
Abbebe Biqilihu faale harunsatenni batinyu Itophiyu Atileetooti Maaratoonete 10,000 nna 5000 meetire qolchanshote heewo qeelatenni Itophiyu su’ma gotti assitinotano coydhino.
Atileete Koloneele Daraartu Tulluti Baarseloonu Olompiikera qeelatenni umi meyaa kolishsho Afiriku qansitte ikkatenni xaphooma kolidda daga lawishsha ikkitino yitino.
Kuri Atileetooti qeelaanchimma Itophiyiimmate qeellete baanatto ikkitinota xawisse tayxe Olompiikera beeqqitanno Atileetooti tenne diqeelammemmo giddonsa gashshidhanno gede xa’mitino.
Itophiyu sa’u 65 dirrara Olompiikete handaarinni 54 Meedaaliyaa afi’raseno xawisse konni giddonni 22 Culka ikkinota qummeessitino. Aantete Itophiyu Olompiikete heewisantanno handaara halashshatenni Culka abba wole illachase ikkara hasiissanno yitino.
“Ki’ne qeela Itophiyu qeelaati” yitinoti Pirezidaantitte Itophiyu qeelanno gede irkisantenna halante loossanno gede woxaratto shiqishshino.
Tookiyo-Olompiikete beeqqitanno Atileetooti Itophiyu daga uytinonsa maganyenna yawo fula noonsa gede coydhe; Itophiyunnita maalalote dhagge sufisiissanno gede woxaratto shiqishshino.
Itophiyu baandeeri Tookiyoote gotti yee wele yaanno gede, gobba su’mise danchummatenni woshshamanno gede hattono Culku taraawo dhagge suffanno gede yawonsa fultanno gede maganye yitino.
Jeefoteno Itophiyu baandeera luukete uytino.
Olompiikete gaamo geegote amanyooti aana Itophiyu Atileetikisete Federeeshiine Pirezidaantitte Komaandercho Atileete Daraartu Tulluti, Itophiyu Olompiikete Komite Pirezidaantichi Dr Ashshebbiri W/Gorgisihu, Woganna Turiziimete Ministeere Ministeercho Dr Hiruuti Kaasawutinna woloottuno woshshatto assinoonninsa wosini afantino.
Bakkalcho Maaja 8, 2013 M.D
