– Amaaru daganna Gargarooshshu Olanto Qote Uurritannotano xawissino
Addisi Ababa:- Lamunku quchummate gashshootinna qoqqowubba Amaaru qooqwira ga`labbote qarra kalaqqino bissa assoote effidhe gibbino. Amaaru daganna gargarooshshu olanto ledo uurritannotano buuxissino.
Addis Ababunna Diredaawu quchumma gashshootta hattono Affarete, Sidaamu, Oromiyu, Somaale, Wodiidi Galchim Itophiyi, Harare, Beenshangule Gumuze, Gaambeellunna Wodiid Daganna Dagoomi Qoqqowi Amaaru qoqqowira kalaqamino ga`labbote qarri aana xawishsha fushshitno.
Qoqqowubba xawishshinsa aana egensiissinonte gede, Amaaru Qoqqowira keere gibbanno wolqanni ka`ino gaancenni xaadino ga`labbote qarri qoqqowu daga aana gawajjo abbanni no. Ga`labbote qarra kalaqqino bissa loosinsanni eemarama hasiissannonsaata qaagiissitinori qoqqowubba, qarra keeru doogonni tira hasiissannota sokka saayissino.
Gobba diinunni agaratenni waaga baattanni noo gargarooshshu olanto aana iillinshanni jaddo adhamooshshu nookkita ikkitinota qoqqowubba xawissino. Gobbaydi horraasinenninna gobbate giddo keere gibbanno wolquwanni assinanni xagarro, gobbate wonqo ikkino gargaroshshu olantonninna wolootu gobba baxxanno Itophiyi ledo ikkatenni sharrama noota qummeessitino.
Gobbate wolqa ikke lubbote waaga baatanni noo gargarooshshu olanto su`mi aana diqqillo buuratenna su`ma hunate looso mittimattenni effi’ra hasiissannota egensiissino. Olanto kisa yaa gobbate utiwimma kisate gede kiirranniha ikkannohura, mootimmanna daga bareedda gargarooshshu olanto qote uurratenni gobbate mittimma kaajjishatenni albi annuwanke mundetenni keeshshiishshino gobba dagganno ilamara saayisa hasiissannota qoqqoubba xawishshunni kultino.
Qansootu kaayissannota qoossotenna horote xa`muwa mittimma diiggannokki garinni hattono gutunni jiro laashshinanni horinyi aana kaima assine qarra tira hasiissannota qaagiissitino. Ge`ne hasaawatenni wolootu Itophiyi daga qoossonna horo ledo xaaddino gutu dawaro aa agartannota qummeesssitino.
Qodhote sharronni higganno dawaro mitteno dino; mootimma ayi xa`mo heedhuro keeru doogonni dawaro uytannota ammantanno; ikkinohura, ayi xa`mo keeru doogonni shiqinsheenna caalu hundaanni hasaambe dawaro afi`ra hasiissannota qoqqowubba egensiissino.
Itophiyu egennaminohu mittu dhaggenfantanni hornyi mereero dagate giddo kalaqantanno dagoomu, miinjunna polotiku widoonni sumumme hooganna babbaxxitino gaance tirranni balchoomi noo gobba ikkitinohura, togoo qarrino kalaqamanno yannara togoo hornya horoonsi`ra hasiissannota xawissino.
Amaaru qooqwi daga, sai oli abbino gawajjonni fultukkinni qoleno yanna hawado ikkasenni baatto loosidhe galtino daga irshu looso loossanno yannara ga`labbote qarri kalaqama gobba badhera higge hadhanno gede assannota qummeessitino.
Qoqqowubba egensiissinonte gede; hiikkono Itophiyi qarqarira keeru boorawanno yannara Itophiyu keeri ba’’annota huwante baalunku Itophiyu daga albi annuwanke gede techono mootimmate qote uurrite konne gobba diigganno bissa looso effidhe giwatenni gobbate keere buxiisiisa hasiissannonsata dhaantino.
Abrahaam Saamueel
Bakkalcho Woxawaajje 4, 2015 M.D
