“Dimokiraase yaanno qaale tirranni wote “dagatenni dagate,dagagate giddonni fulinohu daga massaganna” yitanno yaatto amaddino dhaaddo tiro aa hoongirono. Tayixe umi yannara kiirotenni 6ki gobboomu doorshi kalqe maala’litanno garinni gumulaminoti muli barri qaaggooti.
Dr. Abiyi Amaalete mini tayixe doorshinni xoxxorraamo ikkanno yee hedeemmo yaanni xoxxorraamo ikkarano hasattosi ikkinota xawisinotino qaangannite. Ikkollana dr.Abiyi hasatto doorshu halaalaancho ikkeenna hettisamaano paarte Paarlaamaho e’e daga riqibbe dagate qarra reqecci assitara ikkirono coy galchameenna hasattosi gede hettisamaano paarte ajjino. Paartete beeqqo aja JIreenyu paartera qeelle labburono daga ammantinonsa doogo sheemaatenna jawa asale duyisiisa labbanno.
Dagate jawa xa’monna duhanu bayirame 27 diri ale keeshshinonsa. Itophiyu daga keere gooriitin;canco caaccaabbino. Gaance shigiggidhe keeshshitino. Mussinnunna mooru shigiggisheenna owaantete babbaxxitino uurrinshubba hara ruxxi yite keeshshitino.
Xa,jireenyu Paarte konni qarrinni fushshitannonke yitino Itophiyu daga xaana xeenaho yitukkinni,arrishshoarrishshote yitukkinni,kaardensanni “ane sayisannoe,m assagannoe,latisannoenna bainchu loosinni gobba hursannoe” yitanno paarte doodhitino. Jireenyu paarte kuri baca dagate xa’mo dawarate eeli geeshsha noo qarra balaxxe buuxo assa hasiissanno.
Eela dirriniro olla ollaaho ayimmate kaarde/matawoqiya/ adhate nafa la’anno qarri shigiggisannoho. Mussinnunna muishshu hakko hanafanno. Dagate owaattara daga fushshitanno fushshaatonni damooza baantanninsari dinye batissanni tulteessitannna sa’ni yanna xa konne ikkito.
Techo Itophiyu pireesete uurrinshara Sidaamu qoqqowinni mite mite teesaano hedonsa wortanni kayissino hedo halaalu birxichaati. Sidaamu seeda dirrara sharramanni keeshshino umisi umosi gashshate xa’mo higginohu konni soorrote gashshootinniiti yite,konne halaale hawa barshete yitino. Ikkollana uminke umonke gashshate hasattonke alba wodiido yinanni mittu gimbooli giddo xaanxeenna latishshunni gede’ninoommo yitino teesaano,xa mitu barrinni duuchuri wo’monke yine ikkikkini albaage Jereenyu paarte hanaffinonte gede eeli geeshsha dirratenni owaattannoke yine hexxotenni dhoodhinoommo yitino. Ledoteno “amma’noomma afale qaltitinoe” yaanno maammaashsha ikkannokki gede ammanne doodhinoommo jireenyu paarte su’mise gede daganke hudetenna babbadamooshshunni,cancunna gaancete danqarinni fushshite jiroo’mate widira luunceessitankera eeggo uyinoommo yitino.
Sidaamu qoqqowi Jireenyu paarte borro mini sooreessi isi widoonni; daga jawa asale uyitinonke yee; qoqqowoho Jireenyu paarte 100/100 anga qeeltinohu soorrote gashshooti seeda yanna dawaro qolasinni ikkirono sooreeyyete dhinyi looso uyitinota xawisino.
Techo duuchuri injeenna dikkino Itophiyu daga JIreenyu paarte doodhitinohu. Kayinnilla hananfoonni soorrote caabbichi bakkalchu gede hala’le xawanno yitanno hexxonni doodhitinota wocawaaro 2014 m.d 5 diro massagate sheemaate e’anno mangiste eeggo noonsata huwata hasiissanno. Konne huwata hoogguro 5 diri kontiraata gudde layinkimeeshsho heewisamate ka’anno wote daga huuronsanni qorichishshannonsatanno timbiliqqe flute doodhitu gede timbiliqqe fulte fondolchite tuggannota mittu xiqqeessirano daema dinonsa.
Xaano Jreenyu paarte aliiditi eeli geeshsha dirrite dagate qarra towatte tira hoogguro,kaphu riippoorte qonqolchite buuxa hoogguro wirro hatti batte higgara dandiitanno daafira eeggo uyitino dagara eeli geeshsha dirrine halaali keeno assatenni gobba hanaffino soorrote doogo sufisa Itophiyu lophoranna dagganno ilamara ba”annokki malaate worate. Konni daafira daga ammante doodhitino Jireenyu Paarte ammanamooshshensa halaaliha assite “amma”noomma afale qalxitue” yaatto soorra hasiissanno!
Bakkalcho Maaja 8, 2013 M.D
