Qiddist Gezaheny
Addis Abeba:- Gobboomu deerrinni 2015/16 goyirete laalchinni 508 Miliyoone Kuntaali ali laalcho agarrannita Gibrinnu Ministere egensiissu.
Gibrinnu ministere Fiqaaqunna agadu gidi deske sooreessi kalaa Fiqaadu Biredahu xawisino garinni; federaalete deerrinni 2015/16 goyirete loosinni kilaasteretenna rosamino gibrinninni dimbanni 16 Miliyoone hektaare baattonni 508 Miliyoone kuntaali ali laalcho agarranni.
Kalaa Fiqaadu xawishshi garinni; tayixe goyirete laalchira hasiissannota balaxote qixxaawo assinanni hee’noonni. Gobbate gede dooramino 12 gidu dani aana qasiisote looso gumullanni hee’noonni yinohu kalaa Fiqaadu; goyirete yannanni 16 Miliyoone hektaare ali baatto gidunni diwate mixo amandoonnita xawisino.
Qamade, Hayixe, Gaashe, Badala, Bashalnqunna woloottu gidu dani aana illacha assatenni qasiisote loosinni lattanno gede assinannita xawisino. baxxinohunni gibrinnunni balaxote qixxaawo fooliishshonni loosantanno loossa tittirotenni amande loosu giddora e’noonni yinohu kalaa Fiqaadu; goyirete loosinni 8.8 Miliyoone Hektaare baatto qasiisotenni latinsanni yino.
Gobbate gede kilaasteretenni lattanno baattonni calla goyirete laalchinni 299 Miliyoone kuntaali ali laalcho afi’rate hendoonnita kulinohu sooreessu; kilaateretenni laashshinanni laalchi yanna yannatenni lexxanni dayinotanna sai diro noowiinni 6.2 Miliyoone hektaare baattonni qasiisote latishshi 8.5 widira lossate dandiissanno loossa loosantanni afantanno yino.
Loosidhe galtinorira hasiissanno e’’o yannatenni shiqishate irkonna harunso assate, dandoote qajeelsha aate, mekanayizeeshiinete owaante shiqishatenna dikkote mittoo’ma kalaqate hasiissanno irko assinannita xawisino.
kilaasterete, gorsunna qasiisotenni latinsanni baatto hasi’noonni horora hosiisate federaaletenna qoqqowubbate hasiissanno qixxaawo assinanni hee’noonnita egensiisino. Sai goyirete laalchu dirinni 13.9 Miliyoone hektaare baatto wixunni dimboonniha ikkanna 394 Miliyoone kuntaala laalcho gamba assa dandiinoonnita kayisino.
Bakkalcho Onkoleessa 24, 2015 M.D
