Abbebech Maatewoos
Addis Ababa:- Ogimmatenna hayyote handaarinni loonsanniti kalqote tekinoloojubba gumaho soorratenni gobbayidinni eanno laalchubba riqiwatenni jiroo`mitino gobba uurrisa hasiissannota xawinsi. Loosunna dandoote ministere qixxeessaanchimmanni “Dandoo heewisamaanchimmate” yaanno massagote hedonni onte barrubbara ha`ranni keeshshinohu 3ki gobboomu dandoote heewo sa’u lamalara jeeffino.
Amuraatu goofimarchi aana afaminohu dagate amaale mine mannu jiro latishshi, loosu bobbaasonna tekinoloojete hajubba uurrinshu komite gambisaanchi dokiter Negeri Leenco xawisino garinni; Itophiyu amaddino ajuuja qansootisera jireenya abbate. Baalunku qansootu woyyitino heeshsho heedhara dandiisate. Kaayyo kalaqa, akatubba injeessatenni daga wolootuwiinni agartannore ikkitukkinni uminsa jironninna qansootu wo`naalshinni gobbansa ayirrissanno gede dandiisate.
Dokiter Negeri hasaawi garinni; “Ikkado kalaqamu eltonna injaanno loosu qooxeessi noonke; loossanno kalaqqanno anguwanna rosino wedelli no”; Itophiyu tennera injiitino gobba ikkasenni gumu widira soorratenni duuchunku handaarinni soorrama hasiissanno yiino.
Buxima qeelate baalunku qoqqowubbaranna quchummate gashshootira noo kalaqote ogeeyye wolaphote wolquwaati. Loosu kalqonni, dandootenni, tekinoloojete reekkonni bobbakkino qansooti wo`naalshansa gumu widira soorratenni buximate giddonni fula hasiissanno yiino.
Gobbate gede dagoomitte, miinjaamenna poletiku handaarinni noonke qarrubba sa“atenni gobbanke hasiisannose ayirrinye guggu`litanno gede dandiisa hasiissanno. Qansootuno woyyitino heeshsho heedhara kaajjine loosa ga`ara gashshinannita dikkitino. Deerru deerrunkunni heewisante baraarsha adhitino kalaqote ogeeyye kalqoomu barera heewisamatenna gobba soorrate jawaatte loossara hasiisannotano dokiter Negeri qummi assino.
Loosunna dandoote ministircho dukko Muferiyaat Kaamiiliti ise widoonni; kalaqqanno qansooti batidhanno woyte qarrubbanke giddonni fula dandiineemmo. Konnirano onte barrubbara harinsoonni heewonni 267 ikkitanno qajeelshaano 1 kumi 500 ale qajeelaanora babbaxxino handaarinni dandoote heewo harissino.
10 ajjinokki handaaru mitiimmuwa aana illachishshsino assootunni xiinxallotenna buuxote loossa shiqqino. Kunino gobbate gede handaaraho noo kuusamino dhukinna latate elto horoonsiratenni handaara heewisamaancho assate jawa irkishsha afi`noonniho.
Baxxinohunni gobbayidinni e`anno laalchuwa gobbate giddo laalchinni riqiwatenni gumaho soorrate hala`ladunni loonsanni. Ministircho yitino garinni; ogimmatenna hayyote uurrinshuwa riqiwote laalchuwa laashshatenni gobbayidi soorro gatisa hasiissanno yitino. Handaaru dhuka co`o asse horoonsiratenni gobbate baalloo`mitino lophora kaajje loosa hasiissanno yitino.
Babbaxxino handaarinni heewisante sayikki deerra fultino qajeelaanora, qajeelshaano mittu mittunkura nehaasete medaaliya, sertefikeetenna 60 kume birra, layinki deerra fultino mittu mittunkura birru medaaliya, sertefikeetenna 80 kume birra, umiha fultinorira qole mittu mittunkura culqu medaaliyanna sertefikeete hattono waancu baraarsha baraarsinoonninsa. Tayixe assinoonno Gobboomu Ogimmatenna hayyote heewonni Sidaamu qoqqowi 19 addi addi meedaaliya gamba assi’ratenni umi deerra amade qeelino.
Bakkalcho Onkoleessa 24, 2015 M.D
