Gaazeexu odeessaanchinni
Addis Ababa:- Itophiyu amaalamooshshu komishiine babbaxxitino dagoomi bissanni fultinori ledo Sidaamu qoqqowira Hawaasi quchumira hasaawa assitino. Lallawu kiiro 1265/2014 Itophiyu Gobboomu Amaalamishshi Komishiine uurrisate lallawi fulinota sanade leellishshanno.
Lallawaho worroonni garinni Itophiyaho afantanno babbaxxitino polotikunna hedote massago hattono dagoomu bissa mereero lowontanni hansoonni gobbate hajo aana hedote badooshshenna sumiimme hoogate hajubba leeltannohura; konne badooshshenna sumiimme hooga tirate hala’lado gobboomu dagate amaalamooshshe hanqafaanchimmate doogonni harisatenni gobboomu sumiimme kalaqa hasiissanno.
Gobboomu amaalamooshshi adhamamooshshunna ammanamooshshu noosiha ikkanno gede assitannori mereerinni mittu amaalamooshshenna qineessitanonna massagganno bissa ikkadonna mereerima hedo ikkinohura; amaalamooshshu ikkadimmateninna mereersino garinni massagatenna qineessate dandiisiisano hala’lado adhamooshshu noonsa uurrinshuwa uurrisa hasiissanno. IFDR Bayi’riidi Seeri Quwa 55 Cinaancho 1 worroonni garinni babbaxxino lallawa worroonni garinni onte safote lallawubba lallamboonnita taje leellishshanno.
Amaalamooshshu battalara sasu komishiinerooti hasaawisate leeltinnoha ikkanna; afii fa’note hasaawa assinohu komishiineri Tegenyiworqi Geexu; amaalamooshshu komishiine umi qixxaawote gufo gudde ajanda badde dagate giddora amaalamate e’ara loossanni noota kule; hegeraamo keere gobbate kalaqatenni albaanni mimmitu aana kalaqantino mada hursatenni polotikunna hedote badooshshi noowa heereenna mittoonsitannonke hedora uurrine kaajjadonna diigantanokki gobba dagganno ilamara saysa agartanno yiino.
Komishiinerchu ledoteno, hasaawu hedo dagooma hanqafinoha beeqqamooshshu hala’linnoha ikkanno gede assate looso loonsoonniha ikkana; albillicho gobbanke Itophiyaho hegeraamo keerenna qansootu addaxxitanno gobba kalaqate baalunku dagoomi bissa noosiha hedote ajanda shiqisha hasiissannota kulino. Badooshshe ayirrisa, mittoonsitanno hedo kalaqa, dandaamanna mittimmatenni uurritino gobba kalaqate amaalamooshshu halaale fushshate hasaawa ikkanno yine agarrannitano kulloonni.
Amaalamooshshe Sidaamu qoqqowira lede gobbate 4 basera harinsanni hee’noonniha ikkana; Sidaamu qoqqowirano amma’note massagaano, gobbate geerri, mootimmate loosaasine, wedellu, bisu xe’ne noonsari, Rosiisaanonna woloottu bissa beeqqitinoha konne hasaawa sa’u 2 barrubbara harinsoonnita Qoqqowu Pirees Sekireteriyaatenni afi’noonni mashalaqqe leellishshanno.
Bakkalcho Onkoleessa 24, 2015 M.D
