–Aananno Baajeettete Diri Geeshsha 130 Sinna Iillishate Qixxaabbino
Yaareed Geetaachew
Addis Ababa:-Sidaamu Baanke wo’ma Baankete owaante aa hanaffinoti,xaa yannara 31 sinna fante looso hanaffinoha ikkanna;aantete 130 sinna iillishshe duuchante gobbate kifillara fanate qixxaawo guddinota xawinsoonni.
Itophiyu Pireesete Uurrinshanni ledo keeshsho assinohu Sidaamu Baanke Pirezidaantichi kalaa Taaddese Haxxiya; Sidaamu Baanke kaapitaale lossatenna iillose halashshate mixo amande loonsanni hee’noonniha ikkanna;aanino baajeettete dirinni duuchante gobbate kifillara xaa geeshsha noota 31 sinna lendanna,130 sinna Fannanni yiino.
Muli barrano Addis ababaho,Zuwayete,Sha ashamannete,Wolayitta Sooddotenna Dillu quchummara 10 sinna fanate qixxaawo gooffinotano qummeessino. Baadiyyete dagooma owaata hasiissannota ammanneemmo yiinohu kalaa Taaddaese;xaa yannara Addis Ababahonna Addis Ababu gobbaanni 31 Sinna fa’nante owaante aa hanaffinotano buuxisino. Baanke sinnase halashshatenni bacu Itophiyu qansootira loosu kaayyo kalaqqinotanna kalaqqanni nootano coyi’rino.
Kalaa Taaddese xawishshi garinni;Sidaamu Baanke dikko hiiqqite eatenna heewisamaanchimma halashshate,Itophiyu Maaneejimentete Inistituutenni ledo halamatenni Baankennita dikkote xiinxallo assitanni afantanno. Gede’nine dikkote karsama umiseta ikkitino horo afidhurono;dikko hiiqqine eate guffa xaaddara dandiitannotano coyi’rino. Xaadannore baala hiiqqine sa’ne gummaamo ikkatenna guffa ajishate dikkote xiinxallo addintanni hasiissannota ikkase buuxisino.
Sidaamu Baanke safantinohu Mootimma Mayikiro-Fayinaansete uurrinshuwa Baankete widira lopha dandiitanno yaanno lallawa kaajjisha harunsite ikkinota xawisinohu Pirezidaantichu;Baanke Mayikiro-Fayinaansete noo yannara baadiyyete dagooma owaatate ajuuja sinqisidhe techora iillitinota huwachishino. Konninnino 70 anga ikkanno qeechi Sidaamu qoqqowiha ikkanna;30 anga Akisiyoonootaho hirroonniha ikkasi kulino.
Yannaasincho Baankete owaantenni hanaffanno Sidaamu Baanke,mittu owaatamaanchi duuchante sinnara owaante afi’ranno hayyonna wolootta Baankuwanni ledo bilchaata xaadooshshu hayyo kalanqeenna ikkinota kulinohu kalaa Taaddese;Baanke Teelebirre ledo xaadisatenna Moobayilete baankiinge hanafisiinsanni hayyo giddora eessate loossanni nootano xawisino.
Baanke umose yannaasincho assatenni gobbayidi Baankuwanni ledo loosate sumiimme assinoonnita xawisinohu pirezidaantichu;Jibuti,Turkenna Ingilaandete Baankuwanni ledo sumiimme malaatissinota buuxisino. Sidaamu baanke xaa yannara guuta Baankete owaante aa hanaffinoha ikkanna; Baankimmate widira wo’munni wo’ma lophitinohu sai Ella 2014 M.dirooti.
Bakkalcho Onkoleessa 24, 2015 M.D
