Hawaasa:- Sidaamu Dagoomu Qoqqowira baatto loosidhe galtino daga laalchonna laalchimma lossate kaa`lannonsaha bushshu madaabara xaa geeshsha guutino afi`ra hoogatenni laalchunna laalchimate aana huluullo galtinonsate mite mite teessaano xawissino.
Bidhattonsanna macciishshammensa ku’lituri giddo mittu shabbadiini woradaati. Shabbadiini Woradira mite mite loosidhe galtino bissa su’mansa xawinsara hasidhinokkiri Bakkalcho gaazeexira xawisinonte gede, ninkewiinni hasiissannoha baatto hawuudhate looso jeefinse wixa baattote karsine feffante agadhinummorono; madabaaru anje korkaatinni layinki doyicho tunganni Yuuriya hoogatenni tultaamboommo yitino.
“Woradu Irshunna Kalaqamu Jiro Borro Mine marre xa`minanni yannara ninkewa xaa geeshsha madaabbaru dieinonke” yite dawarate ka`a mittore kaa`late dandiitinonkkita xawisse; abbinanni yinanna agadhine hee`noommo ikkininna woyyaawinore dila`noommo yitino. Insa huluullo garinni, madaabaru loosidhe galtino dagara garunni iillinshe beeha hasiissanna seerimalete daddalaanora uyneenna mitte kiilo 65-70 birrinni hidhate gadachantinotaati xawissinohu.
Woradu Irshunna Kalaqamu Jiro Borro Mine marte marro marro xa’mitanno yannara madaabbaru nookkita dawarturono, Seerimalete daddalaano kayinni jajjabba suuqqara wodhite faajjetenni hirtanni nooha ikkasi woxarattotenni kultino. “Madaabbara adhate borreessamme yineenna borreessammi gedensaanni uynoonketi 10 kiilooti; konne adhate duucha yannara raataamboommo”yitino koffeenya ku’lituri.
Tenne hajo aana Shabbaadiini Woradi Irshunna Kalaqamu Jiro Borro Mini Sooreessa Kalaa Eeliyaasi Ayyeleha bilbilunni xa’minoommo xa’mora; “albaanni daayno madaabbara loosidhe galtino dagra ajo bati’ro iillishate wo`naalloonniha nafa ikkiro xaa yannara hasatto lexxitanni daate korkaatinni madaabaru anje noota kule; mitte lamala gedensaanni eanno daafira qarru tidhamanno yiino. Madaabaru xaaddotenni dagate iilla hasiissanna seerimalete daddalaano anga einota daga xawissanni noota kulinohu Borrote mini sooreessi; tennera buuxo assinanni yiino.
Sidaamu Qoqqowi Irshunna Kalaqamu Jiro Biiro, Giwirinnu Shiqqo Dayrektoreete Dayrekterichi Kalaa Lexxi Laggasihu isi widoonni; hawadi yannara giwirinnu shiqqo giddo mittu bushshu madaabbara ikkinota xawise goyretenna hawadi yanna qoqqowu hasatto garinni 209 kumi kuntaali hasiissannohu giddo 102 kumi madaabari shiqinoha ikkanna; yuuriyu qole 130 kumi giddo 29 kumi kuntaali callu shiqinota buuxisino.
Kalaa Lexxi Xawishshi garinni, qoqqowu hasatto garinni bushshu madaabbari lamunku dani ikkadu garinni shiqinokkita buuxise baxxinohunni Yuuriyu madaabbari anje kalaqantino; anje tirate madaabbara mitte lamala giddo qoqqowa eessaate wo`naallanni hee`noonnita Dayrekterichu coy`rino.
Qoqqowu giddo nooha bushshu madaabbara beehate widoonni qarru dino; beekkannori mittimmate maabaraati; loosidhe galtinori woxensa baanke eessite silipensa amadde marte adhitanno yannara mannu batinyi noohura tuttugamanna anje noota kulinohu kalaa Lexxi Leggessehu, konneno biddi assate loonsanni hee`noommo yiino.
Sidaamu Qooqowira mito mito baycho daga bushshu madaabara seerimalete daddalaanowiinni 65-70 birrinni suuqqate marte hidhitanni noota xawisino. Kuni hiitto ikkara dandii yine xa`mineenna Kalaa Lexxi dawaranni, ninke qoqqowi garinni madaabbara beekkannori seerunni fajjo noonsa mittimmate mamarra ikkitinota xawise, suuqqatenna addi addi dikkora madaabbara hirtannori seerimalete daddalaano noota kulino.
Tenne seerimalate daddalaano badate saiha lamu agani giddo opireeshiine loonsoonnita kulinohu Dayrekterichu, loonsoonni buuxonni bande gargarate looso loonsoonniha nafa ikkiro; xaano wo`munni wo`ma qarru tidhaminokkita huwachishino. Doogimale bushshu madaabara daddalaanote saayisse hirtino giwirinnu latishhsi ogeeyyenna mittimmate maabbarra aana qaafono adhinoonni, adhinannino hee`noonnitano Dayrekterichu, kulino.
Sa’u lame lamala albaanni loonsoommo odoonni qoqqowoho gammoojjeeme baattora dooramino wixi anje leeltinota loosidhe galtino daga naqqanse sa’noommoti qaangannite; tenne lainohunnino dayirikiterichu “Qoqowu deerrinni mite mite gammoojjete woraddara dooramino wixi anje no; tini anje kalaqantinohu gobboomu deerrinniiti yiinohu Dayrekterichu, qoqqowaho noo hasatto wonshate 79% anga xibbuunni iillishate wo`naalloonnita egensiisino.
Kore seerimalete daddalaano qoqqowu mootimma calla gargartannoha ikkikkinni, deerru deerrunkunni noo woradate massagaanonna daga halante baincho looso loossanno daddalaano reqecci assite fushsha noonsatano kulino.
Bakkalcho Onkoleessa 24, 2015 M.D
