Abebech Maatewoos
Hawaasi quchumira 20 miliyoone birrinni duucha ispoortete mereershsha gatamaarrannita quchumu gashshooti egensiisi.
Quchumu budu, turizimenna ispoortete borro mine layinki sooreessi kalaa Xilahuni Kaawiso, quchumu wedelli ispoortete xawo assitanno hoshsha hiitte yannarano gumunni dukkisantinoha ikkirono; jajjabba ispoorte harinsanni dargu anje no yino.
Kunninni ka`inohunni quchumaho, qoqqowoho ikko gobbate gede handaarunni afi`ra hasiissannonke horo di afi`noommo yaatenni coyirino.
Kunni korkaatinni kisaaru giddora e`noommo gede macciishshamannonke yiinohu kalaa Xilahuni, baxxinno garinni ispoorte baxille, mittimmanna keere lallambannita jawa doogo ikkite hee`renna kunni aana kaajjishe loosa hooga digaraho yiino. Qarruyi ka`inohunni Itophiya kalqete bare aana woshshiishshara dandiitanno muxxe ikkitino wedelli dhuki maaxamino yiino.
Kunni daafira kuri coyibba hedote giddo eessatenni mereershsha gatamaarsa hasiissanno gede ammannoonnita xawisino.
Xaa yannara ispoortenna ispoortenniri kalqete luuphima ikkino woxu bikka millissanni nooha ikkanna, Itophiyu tenne gangalatu industire giddo massagaancho ikka hoogase mararsannoha ikkasino egensiisino.
Gobbate deerrinni ispoortete uyinoonni illachi ajaho yiinohu kalaa Xilahuni, labbanno ispoortete mereershshuwanna yanna sayinsanni darguwa gatamara dagoomittete, polotikunna miinjaho gotti yitino horo noonsatano buuxisiisino.
Bakkalcho Ella 10, 2013 M.D
