Qiddist Gezaheny
Girma Dhaaba Degefa yaamamanno. Wolayitta Sooddo Yuniversite fayyimmate kolleeje 2014M.D boowe kayse maassamino. Girmi techo la’’ate hodhino xeertinyi shiima dikkino. Heeshshote dirisinni bushanna dancha barrubba laino. Qeelle baraarate jawaantetenni sharramino. Batinye akkimale barrubba dhibba, dadillenna xiiwama tuggesi sa’ino.
Buxima akkimalu garinni gantinohu Girmi qoti kaajjado xissonnino ganame egennino. Heeshshosi dirinni batinye qarru dirra saino. Heeshshosi dirinni kalqe babbaxxino qarrinni yannase soorritanni lowohunni mitiinsitinosi. Heeshsho mitiimma danu danunkunni leellishshinosihu Girmi; bushanna dancha barrubba sayisino. Rososi harunsate kinnanna siminto duhanni barru looso loosino.
Girmi Oromiyu addi zoonera Addis Ababu qooxeessira Mulo Silo yinanni olliira ilamino. Annisi Kalaa Dhaaba Degefanna amasi dukko Aberraash Gutema gibrinnunni heeshshonsa massagganno maateeti. Ikkeennano, heeshshonsa lubbo gargadhatenni disa’inote. Tenne buxima gagaassitanno maate heeshshonni beettinsa Girmi rosate hajo Onte seenninna mittu labballu roduuwisi barru sagale dandaatenni sa’ne illacha uynannita dikkitino. Maatete mereerinni lame seennu roduuwisi calla 8ki kifile geeshsha rossino ikkinnina woloottu rosu muleenni sa’inore dikkitino.
Girmiranna maatesira roso rosa la’minyeho. Isinni oosichu gede kuni yorsiisie, hakku hasiisie yinanniri dino. Girmano anjesinni hanaffe heeshsho yanniweelo qorochishshanninna shetissanni qarru giddoonni kaajjishshe lossitinosi. Anje wodaninni jawaattino heewo shotunni qeelamummo yaannokki gede assitinnosi. Noommohe yaannohu qotisira noosikkihura callisi sharramate gadachosi qotesi diukkissinosi.
Umiti qarru fooliishsho hanaffinohu 1993M.D ikkanna hee’ranno qooxeessira loosidhe galtinori ledo gaamaareeyyete rosi mine e’’e 13 dirisinni mite yee fidale kiira hanafe techo konni gumira gawa’lino.
Girmi 1ki—8ki geeshsha kifiletenni xaphooma rosu mininnino umiha fulatenni rosino. 8ki kifile fonqolo xibbuunni 99.9% ikkino guma abbatenni 9ki kifile sa’ino. 9ki—10ki kifileno geeshshano Sanyote dikko yinanni rosi mine rosino.
Girmi 1ki kifilenni hanafe umosi umisi rosiisino; 1ki—6ki kifile geeshsha boco yanna rosanni roore yannasi maatesi baatto loosanni saysino. 7ki—10ki kifile geeshsha noo rososi harunsinohu quchumaho ikkinohura dureeyyete ooso xiinxallisiisanni heeshshosi xiiwa dandiino.
Rosiisaanotenna woloottu mannooti irkonni rose 10ki kifile gobboomu fonqolo fonqolame Honse ‘’A’’ abbatenni wo’ma 4.00 bixxille borreessiisa dandiino. Caanco yinanni quchumira qixxaawote rososi Abbaageda rosi mine rosino. Konni rosi mine rosanni noo yannaraati ‘’Bagu aana Bakakka’’ yinanninte gede buximatenna callimmate aana xisso xaaddinosihu. Qixxaawote rosisi aana ikkado irko afi’rinokki daafira lame hige fonqolame Yuniversite e’nanni guma afi’rara didandiino.
Rosu baxillira wodanasi uynohunna qaaqqimmasinni hanafe umiha fulanni daynohu Girmi; heeshshosira qara ikkitino yanna aana rosuno mannu gede xooqisi. Mannu baxannorichinni rahe hexxo dimudhannona isino daafurtino cigilesi jawaachishe heeshsho xaano sharrama amadi. Tenne sharronnino qeela dandee hexxo mudhikkinni irko assineennasi sayikki yannara fonqolame 500 ale ikkino guma borreessiise sa’’a dandiino.
Aanteteno, Wolayittu Yuniversitera Fayyimmate saynse kolleeje e’’e umi diro 4.00 bixxille borreessiisi. Heeshshosi diro wo’mankanni shorritanni keeshshitinosi mitiimma xaano fooliishsho uytasira didandiitino. Wole shettote yanna agadhitusi. Heeshsho xiiwate loosanno loossa batinye xissora reqecceessitinnosi. Loosanni keeshshino loossanni kainohunni mulunna wodanu dhibbi xissamaancho ikkino.
Laynki diri rososi xissote ledo sharrame 3.8 ikkino guma borreessiisi. Xaano sharrame rososi sufate hasi’rirono mulu dhibbi korkaatinni rososi murate gadachami. Gobbara ha’re xagisi’ranno gede kulloonnisiha ikkirono hakkeeshshi wolqa noosikkihura babbaxxitino dagoomu bissanni woxe gamba assineennasi gobbara ha’ra dandiinokkihura Xiqur Ambessu hospitaalera xagisi’reenna fayyimmasi aana woyyaambe daggu.
Tenne yannara Yuniversite wirro rosisira higanno gede injeessiteenna co’o yee hurikkinni xissamanni hee’renni rose jeefoteno maassamanno diro 37 ‘’A+’’ abbe fayyimmate kolleejenni faarmaasete rosu golinni Yuniversitetenni Culkunna boowete baraaraancho ikke Fayyimmate Minister Dieetinni baraarsha adhino.
Busha calla doorte uytinosi heeshsho giddo danchummate kuulinni su’mansa borreessitino mannooti dihooggino. Kuri mereerinni la’lamasi, muli jaallasinna rosiisaanosi heeshshonnita busha barrubba ledokki hee’noommohe yitanni sayissinosi buussasiiti. Girmi Faarmaasete loosi aana bobbaha hasi’ranno; konnirano qaru korkaatisi Itophiya gobbasi handaaarunni kalqete deerrinni woshshiishate. Budu xagga yannaasincho doogonni qixxeesse Itophiya kalqete egensiisa hasi’ranno.
‘’Baalunkuri giddoonni sa’’a dandaa danchate. Saysoommo doogo baalanti hagiirsiissinoe. Mannu jawaata dandiiro hexxo sinqesi assi’rironna ajuuja heedhusiro sa’’annokki coy dino; qaru coy cincatenna jawaatate’’ yaatenni Girmi sokkasi saysanno. Jawaate loosa umi rosu heeshshosi qeelletenni jeefisanno gede assitinnosihu Girmi; isi aanaanni sa’inota busha barrubbba techo heedhanno baalira jawaatte yitanno amaale uyno.
Wedellicha Girma Daabiha borreessiisino guminni Wolayitta Sooddote Yuniversite rosiisaanchimmatenni hakko gatisate koyissinosiha ikkanna; albaagge rososi sufisanno gede hasiissanno irko assatenni wedellichu Girmi hasatto albaagisate sheemaate e’ino.
Wedellichu Girmi kaajjillu lawishshaati. Hexxo murrikkinni ronsiro hasi’noonni base iillatenni hoolannori nookkitaa rosiisinonke
Bakkalcho Sadaasa 27, 2015 M.D Hamuse
