Hawaasa:- Hawaasi Quchumira Gobboomu Deerrinni Wiliile Nookki Hodhishshi BarraAddi Addi Ispoortete Dani Millimillonni Ayirrinsoonni
Hawaasi Quchumi shalleetete hodhishshinni seeda yannara egennaminoho. Hawaasi quchumira daga konni albaanni quchumu giddo bayichunni bayicho hodhitannohu shalleetetenniiti. Baadiyyetenni quchuma e`anno dagano barru tuqa shalleette horoonsidhe dagge gangalate marro qaensara hadhanno. Hawaasi gaangaawira noo rosaanono hattonni rosonsa quchumaho harunsitannori xaa gede mine karaayya`e ikkikkinni, rosaanote maate shalleete hi`rteennansa maatensawiinni baxxitukkinni rosonsa rosse hawarro balla ayiddira hadhanno.
Konne ikkeenna, tenne yannara jajjabbunna shiimmaadu quchumma gattukkinni wiliilaamu xexxerisi wo`meenna qaaquullu, ajuno akkaluno gatikkinni xexxerisunni dagganno danonni lubbo baatanni no. Shalleetetenninna lekkatenni millimillo uurriteenna Taraawannokki dhibbi aana daga reqecci yitanni afantanni noo. Konni qarrinni gatate Maa assa hasiissannonkeyya?
Hodhishshunna Loojistiikete Ministeere tenne lamalarano Sidaamu Dagoomi Qoqqowi Mootimma qaru quchumira Hawaasa wiliile nookkita addi addi ispoortete millimillo harissino.
Hodhishshunna Loojistiikete Ministeere Ministercho Dukko Daagimaawiti Mogesiti xawissanni, lekkate doogonna xexxerisu nookki gongo`mishamaaano bude assi’ne barru baala kaameelunna xexxerissunni iillitanno danonna lubbama ajishate qeechise jawa ikkinota huwante, xexxerissanna kaameela horoonsi`rate gadenke ajisha noonke. Konnira, duuchanti quchumma wiliillenna xexxerisu nookki ispoortete millimillo hanafatenni lekkatena shalleetete hodhishshi bude lossatenni tiraafiikete danonna hattono busha diilallote gadi soorro gargarate loosa hasiissanno yite woxaratto assitino.
Xexxerrisu nookki hodhishshi dagate aanno horo la`niro baxxinohunni Hawaasi gedee quchumira haammata turizimete daa”atto noowa illacha tunge loonsiro hattono konne handaara kaajjinshe sunfiro lowontanni danchaho yitino dukko Daagimaawiti Mogesiti.
Konnira tenne xexxerisunna wiliile nookki addi addi ispoortete millimillo battala hananfi yannara basete leelle sokka saayisinohu Sidaamu Dagoomi Qoqqowi Mootimma Pirezidaantichi Kalaa Desta Ledamoho.
Pirezidaantichu sokkasi saayisanni, xexxerisa ooffannori manchi beetti fayyimma aana iillishanno gawajjo batidhinota ikkitino daafira, Qoqqowinkera woy wiliile nookki hodhishsha loosu aana hosiinsanni hee`noommo yiino. Konnira daga duucha yannara kaameelunna xexxerisunni ba`anno lubbo ajishate wiliile nookki hodhishsha horoonsi`ra noonsata huwachishiino.
Hawaasi Quchumi Gashshoti Kantiwichi K/pirofeserichi Tseggaye Tukehu isi widoonni, Hawaasi Quchumira muli dirira albaanni daga baala shalleete hodhishaho horoonsidhannoti ajjanni dagginota qaagiisse, Hawaasi giddo marro hanafisiisate hattono daga fayyimmansa agadhate kaa`litannota lekkaasinu doogo biifino garinni loonse jeefisa quchumanke togoo wiliile nookki ispoortera dooraminoha assitanni nooota buuxisino.
Abrahaam Saamueel
Birra 17, 2015 M.D Hamuse
