Diru tuqa atileetoota riqibbanno bareedda nooseti gobbanke, memetenni maaraatoonete widi heewora reekkantinore haaruudde beeddahe afidhino. Lowo jifo noo maaraatoonete heewonni umi yannara beeqqaano ikkite gumaamma ikkitino bareedda atileetoota, kalqe dhaggeeffattanni noonsa. Dhaggennihanna kalqete deerrinni pilaatineemete deerra uynoonnihu Amisterdaamete Maaraatoone, olompiketenna wolootu memete heewonni egennantinore atileetota xaano maaraatoonete heewoni ayirrinyu aana ayirrinye lexxite qeelletenni kalqete leeltino. Lamunku koo/teenni hettisamaanonsawiinni roorte leellannansanni roorrimma adhite gobbansaha su`ma kalqete xawira gotti assitino.
Tenne heewo balanxe agarroonihu seennu widoonniiti. Konnira korkaata ikkinohu, Mereerimu Maaraatoonera Memete heewonni egennantinori ispoortete maate hagiirsiisinori bareedda mitteenni albansa maaraatoonete widira qoltino daafiraati. Gumaamma ikkitino Memete maaraatone gede doogimaru heeworano qelletenni gumaamma ikkitanno yine hendeemmo daafiraati. Heewote aana maaraatoonete gadi noonsa atileetooti batinye saatera xeertinye albaanni hige massagganni noori Itophiyu atileetoota ikkansanni, Bocu Maaraatoneera duucha yannara heewisante gade afidhinoti Tsehay Gemmechuti, 33ki km geeshsha heewo massagganni keeshshitino. 35ki km gedenoonni kayinni, Riyo Olompiikera bareeda Atileeticho Almaazi Ayyaaniti, alba higge buuwatenni fatalakki yite fulte massagaanchimmate baycho adhite qeela dandiitino.
Almaazi lekkase alba qolte ledde xeertinyunniha goofimarchu xuruura albisaancho ikkite kadde 2:17:20 ikkitino saatenni eatenni Amisterdaamete wiinamu saate ikkite borreessantinose. Konne calla ikkikkinni, wolenti Itophiyu bareeda Atileeticho Yaalemzerf sayikki deerra amadde jeefisse Hambergete Maaraatonenni sase lipheessa balaxxe Itophiyu riikeerde umiseta assi`ra dandiitino. Kalqetenni qolte 7kita wiinamu saate ikkitinohura Atileeticho maaraatoonete harinshose qeelletenni hanaffino. Awuropu kiironni 2016 Riyo Olompiikera 10 kumi meetire xeertiyne wiinamu saate seeda yannara hiiqqannohu hoogeenna keeshshitinota woyyeessa dandiitinotinna su`ma fultinoti Atileeticho Almaazi; 1500 meetirenni camote meedaaliya adhano dandiitino. Ikkollana, gawajjotenna ilate korkaatinni seeda yannara heewote aana leeltukkinni keeshshitino.
Awuropu kiironni 2015 na 2017 kalqete Atileetikse Chaampiyoone 5 na 10 kumi meetirenni gumaame Atileeticho ikkatenni Kalqete Atileetiksenni hakko diro doorantino Atileeticho ikkitinoti qaangannite. Dirrate gedenaanni, sai aganira Boco Maaraatoone heewo aana beeqqaano ikkitu gedensaanni maaraatoone doddino. Atileeticho qeellete gedenaanni, “Coyi’rate qaalu dinoe; kuni anera jawa gumaati; Olompikeete gedenoonni gawajjame keeshshoomma; galte`ya, qaaqqi`yanna qajeelaanote gaammonni konni suusira iilla dandoomma” yitino.
Wole maaraatoonete heewo umi yannara dodde gumaame ikka dandiitinotinna doogose qineessitinoti Genzebe Dibaabite. Almaazi harunsite eatenni 2:18:05 ikkitino saatenni laynkita ikkite qeeltinoti Atileeticho Almaazi kalqetenni 20 doorantino atileetooti giddonni mitte ikka dandiite xaanni maaraatoonete doogose feyaa dandiitino. Wole bareedanna jawaata hettisamaancho ikkitinoti heewo massagganni keeshshite gobbase ooso qeeltara jawa qeecha fultinoti Tsehay Gemmechuti, sayikki deerra amaddino. 2:18:59 ikkitino saatenni ea dandiitino. Iseno Boco Maaraatoonenni wo`ma Maaraatoonera e`e assitanno heewo xaanni gumunni hanaffinota buuxissino.
Keeniyunnihu atileetichu Tuttiisi Kipiruuti, qeelara jawa heewo assirono ontu lipheessinni badhera hige laynkiha ikke fulate dandiino. Jawa qeelate heewo noo dodanshora sase lipheessa calla badhera hige Keeniyu Atileeticha harunse sayikkiha ikke fula dandiinohu Itophiyu bareeedi Atileetichu Baazzezew Asmaareeti. Jawaatu Atileetichi Keeniyu gaamo dhoose fatalakki yee fule insa qeeltannokki gede assa dandiino.
Abrahaam Saamueel
Birra 10, 2015 M.D Hamuse
