Goofanni noo Wocawaaru aganira kalqete gobbuwa quchummara haammata doogimaru dodanshote heewo harisa rosantinote. Sa`u lamalara 5 km kaayse maaraatooni geeshsha kiirotenni batidhino heewo harinsoonni. Tenne heewo aana Itophiyunna Soojjaati Afiriki Atileetooti gummaamma ikkate dandiitino.
Itophiyu Atileetooti lamunku koo/ tee qeelte sa`ino heewo giddo mitte Xaaliyaanu Quchumira harinsoonniti Tironto Bocu Maaratoone mittichote. “Giraadu Garba” yinanniha kaima assine xintinoonni Tirontote Quchumi turstootu doodhitannohonna kalqete dagganno turstooti daa”attanno baycho ikkino. Konni dhaggete Quchumira garbu mule harinsanniti dirunniti doogimaru dodanshote heewo feestivaale eggennantinote. Aropu kiironni 1907 hananfe harinsanniti tini feestivaale macca atileetootino gattukkinni beeqqaano assanni nooha ikkanna, konni albaanni Qananiisi Baqqalihu, Pawul Teergatininna Isteefeni Baldiinii ikkkite macca atileetooti doddino.
Sa`u lamalara jeefote harinsoonniti taayxe dodansho aana, Itophiyu qansootinna Keenyootu atileetootinna haammatta ikkitinori wolootuno beeqqanno ikkitino. Labballu widonni harinsoonni heewora kalqete maaraatonete shaampiyoonera Atileetichu Taamiraati Tolihu qeelino. Aropu kiironni 2017 Lendenete kalqete Shaampiyoonera Naasete meedaaliya adhinohu Taamiraati, aganaho albaanni Ameerikaho Arigoonete harinsoonni kalqete shaampiyoonera Culqu meedaaliya adhe gobbasi su`ma woshshiishinoti qaangannite. Atileetichu beeqqinotera tenne Bocu Maaraatoonera rosantino ikkadimmasi leellishe qeelletenni jeefisino. Taamiraati Xeertinye gudate adhitinosi yanna woy saate 59:49 ikkanna, kunino basete wiinamu saate ikkite borreessantino.
Tenne dodanshote feestivaale aana harinsanni heewo mereero mittu 10 km dodanshooti. Tenne heewora Itophiyunnihu Atiletichu Muktaari Idiriisihu umiha ikke fulino. Lame hige Memennita seeda xeertinyu dodanshora kalqete shaampoyoone ikka dandiinohu Atileetichu, muli yanna kawa doogimaru dodansho aana leellanni afamanno. Xaaliyaanete harinsoonni dodanshote heewora xeertinye 28:47 ikkitanno saatenni dode hettisamaanosi mereero jawa badoooshshe kalaqe qeelara dandiino.
Keeniyu Atileetichi Weesileeyi Kimutayi Taamiraati hoode e”e laayinki deerra fula dandiino. Jawaata heewisamaancho ikkinohu kuni atileetichi shiima xiqqeessa calla badhera gateeti heewo jeefisinohu. Yugaandu Atileetichi Keeven Kiibeeti sayikkiha ikkanna, Itophiyunnihu Leellisi Araarsihu qole shoolki deerra amade jeefisino.
Seennu heewora qeltinoti xaano Atileeticho Itophiyunnite. Baxxinohunni, Maaratoonete heewora afantinoti Atileeticho Birukitaayiti Deggefeti heewo qeeltino. Atileeticho heewo jeefisse qeeltinohu 1:09:41 saatenniti. Shiimu lipheessi badooshshinni layinkita fultinoti Keeniyitte Atileeticho Iimakowaleeti Cheekiruy 1:09:47 saate borreessiissino. Wole Itophiyu qansitte Atileeticho Dese Anchiniaalu qolte 1:09:58 ikkitino saatenni sayikkita ikkitino.
Kalqete gaangawira harinsanniti dirunniti Bocu Maaratoone dodanshote heewo mereero macca fultinori giddo gaamantino Kaardiifi Bocu Maaraatoonerano, Itophiyu qansooti beeqqaano ikkitino. Weelsi Qaru Quchumira Kaardiifete harinsanniti tini heewo Aropu kiironni 2003 M.D hananfoonniha ikkanna, Keeniyu Atileetooti woyaawino gumi abbitino dhagge noonsa. Tayxe heewo aanano hattonni Keeniyunnihu Jiofrii Koochi 1:00:01 ikkitino saate borreesiise qeelino.
Itophiyu qansooti Keeniyu atileetichira jawa jifo ikkiturono, shiimu lipheessinni badhe gatteenna qeelara dandiino. Konne ikkeenna, Gizeallehu Abejje 1:00:17 ikkitanno yanna borreesiise layinkiha fulino. Cemdeesi Dabalihu qole gobbasi atileetichinni mittu lipheessinni balaxame saayikki atileeticha ikkino. Seennu widoonni, umihanna laayinkiha ikkite fultinori Keeniyu Atileetota ikkanna, Itophiyu Atileetooti Zawuditu Aderawutinna Birhaane Mihiretit saayikkitanna Ontita ikke dodansho jeefisino.
Abrahaam Saamueel
Bakkalcho Wocawaaro 26, 2015 M.D
