Addis Ababa:- Sidaamu Dagoomu Qoqqowi Mootimma Rosu Biiro 2015M.D haaru diri umi barri umi kifile rosi haaru rosu budi qixxaawonni faajjetenni hanafami.
Qoqqowu Rosu Biiro rosu amanyooti hadaari sooreessinna biirote miseessa sooreessa ikkinohu kalaa Miliyoon Yossa Itophiyu pireesete uurrinshara xawisino garinni; gobboomu deerrinni rosu haaroonsha assatenni qixxeessinoonnihu haaru rosu amanyooti 2915M.D rosu dirinni qoqqowu deerrinnino tenne lamalara faajjetenni hanafamino.
Qoqqowoho tayxehu rosu dirinni xaphoomunni 1.5 miliyoone rosaano borreessante rosonsa harunsitanno gede
mixi’ne loosu giddo e’noonni yiinohu kalaa Miliyooni; haaru diri umi barri umi kifile rosatenna rosiisate loosi haaru rosu budinni qixxaawinoha ikkanna; rosu hanafo biirote sooreeyye rosu minnara leelte towaanyo assatenni faajjetenni hanafisiissinota kulino.
Rosaano, rosiisaanonna rosu maate baalunku hawalle 2015M.D Rosu Diri ‘’Umi Barra Umi Kifile’’ rosira iilishinonke yitanno halchosino xawisino.
Rosu latishshi loosi baalanta dagoomu bissa la’’annoho yiinohu kalaa Miliyoni; rosu duuchunku latishshiranna lophora xinta ikkasinni handaaraho jawa illacha tunge bilchaatanna gobba tekinolojetenna agarranni lopho widira reekka dandiitanno ilama kalaqate baalunku qeechasi fulanno garinni qinaambe loonsannita huwachishino.
Haaro rosu amanyoote garunni loosu aana hosiisatenni qoqqowoho rosu isilanchimmanna rosaanote guma woyyeessatenni agarroonni gumi maareekkamanno gede qoqqowu mootimma luphiima illacha tuggino hajo ikkasinni baxxinohunni rosu ogeeyye, dureeyye, rosaano maatenna baalante dagoomu bissa beeqqo hadaara gummaamo assate noonsa qeechi luphiima ikkinota egensiisino.
Tayxehu rosu dirinni haaro rosu amanyoote deerru deerrunkunni afantanno rosu minnara loosu aana hosiinsanniha ikkasinni dagoomuno albaanni rossani sa’inore ikko dirinsa rosoho iillinonsa qaaqquulli borreessame rosu kaayyo horonsi’raano ikkitanno gede assate ragaanni agarranninsa qeecha fula noonsatano huwachishino.
Amsaalu Felleqe
Bakkalcho Wocawaaro 12, 2015 M.D
