Addis Ababa:– Kalqoomu mannihimmate qoosso komishiine Aliyye Itophiyu qooxeessira iillitino gawajjo lainohunni xiinxallo assinoommo yaatenni kaphunni fushshitino “ripoorte” cancishaancho HWHT gatissannokkitanna baino su’masino qoltannokkita ikkase Itophiyu Sivil Serviisete Yuniversite Dipilomaasetenna Kalqoomu Xaadooshshi rosiisaanchi kalaa Indaale Niguse xawisi.
Kalaa Indaale Itophiyu pireesete uurrinshara xawisino garinni; xaa yannara kalqoomu mannimmate qoosso komishiine ogeeyye Itophiyaho assinoommo yite faajje assitino “ripoorte” hexxo mura hoogate yite ga’nantanno harinshooti ikkinnina cancishaancho HWHT gaamo gatisate didandiisiissanote. Baino su’masino qolsiissannota dikkitino. Ripoorte faajje assitino gaamono ikkituro cancishaanchu HWHT gaamonte gede Itophiyu diina ikkitinoreeti.
Komishiine faajje assitino ripoorte kaphunni qixxeessinoonnita qalote borronni Itophiyu aana iillinshoonni barshe hawisiisa didandiinanni yiinohu kalaa Indaale; kaphu ripoorte qixxeessatenni gobbatenna dagate aana dhagge habbannokki barshe assinoha cancishaancho HWHT gaamo agarsiisate mixi’noonnita ikkase egensiisino.
Cancishaanchu HWHT gaamo Itophiyu aana iillishshino barshe Itophiyu qansooti kalqoomu dagoomira reqecci assitino. Kunino yaa, ripoorte fushshitu bissa uminsanni cancishaanchu gaamora raga kultanninna womaashshunni irkissanni ledosi keeshshitinoreeti. Konnirano, insanni cancishaanchu ledo qinaabbe Itophiyu aana assitanni keeshshitino barshe xa’misiissannonsakki gede raga hunate hasidhanno yiinohu kalaa Indaale Niguse; kaphunni qixxeessine faajje assinoonni “ripoorte” Itophiyu qansootino ikko kalqoomu dagoominni adhamooshshe afidhinokkita ikkase xawisino.
Tenne ripoortehu kaimu kaa’lote gidenna olu uduunne goddate giddo e’e maaxantinowa baala massite iillishshanninsa keeshshitino gaamo su’mi ba’’anno gede hasidhannokki daafira ikkasinni; badheenni gano gantanni hunote gaamo gatisate wo’naaltanni nooha ikkirono; Itophiyu kayinni komishiinenniha kaphu ripoorteno ikkito so’rote laooshshensa adhitannoha dikkino yiino.
Kaphunni qineessinoonni ripoorte fushshitu bissa uminsanni seeri male gaamooti. Ripoorte fultinohuno seerimale doogonniiti. Konnira, Itophiyu qansooti kaphu duduwinna ripoortera anga uytukkinni afidhu injo baalantenni komishiinenniha baincho laooshshenna gobbanke aana noonsa so’rote assootinsanni adawantanno gede sharrama noonsa yiino.
Kalaa Indaale xawishshi garinni; gobbake tenne yannara gobbansa kaaddino kakkachuullinna gobbaydi dhaggete diinnanni fannoonniseha duuchu dani ola sharrantanni afantanno. Gobbate aana kaino diina sharramateno roorenkani mittimmanke kaajjinshe sharrama noonke yaanni huwachishino.
Komishiine Itophiyu aana harinsoommo yitinoti xiinxallotenna buuxote ripoorte guuta ikkitinokkitanna adhamooshshe afidhinokkita ikkaseno Itophiyu mannimmate qoosso komishiine bero fushshitino xawishshinni egensiissinoti qaangannite.
Amsaalu Felleqe
Bakkalcho Wocawaaro 12, 2015 M.D
