Abrahaam Saamueel
Kalaa Isayaasi Jirihu Itophiyu Lekkate Kowaase Federeeshiine Pireziddanticha ikke aanino shoolu dirira masagara wirro dooramino. Pirezidaantichu 138 huuro afi`re wirro dooramino.
14kihu Itophiyu Lekkate Kowaase Federeeshine uurrinshu xaphoomu songo Afiriku Miinju Komishiine Harira harissinoti qaangannite. Songo loosu yannansa guddino loosu gumulsiisaano miilla riqiwateno doortino.
Heme batidhinohu pirezidaantete doorshira dooramaancho ikke shiqinohu Isayaasi Jirihu, Kalaa Melaaku Fantihunna Tokkicha Alemaayyo mereero heewo iibbite keeshshitino. Doortannori uytino huuronni kaima assine 138 huuronni Kalaa Isayaasi Jirihu 94 huuro afi`re qeelino. Kalaa Melaaku Faantihu 27 huuro, Kalaa Tokkicha 17 huuro afidhino.
Doorsha harisate hanafe feeffattote geeshsha jawa hemenna huluullo hattono sumimme hoogge keeshshitino. Konni garinni sufe doorshu barrano jawa yekkeeronna qarra kalaqino. Baxxinohunni, Affaarete Qoqqowa riqiwe shiqinohu loosu gumulsiisaanchi Kalaa Alimiiri Mehammedihu ledo amadame jawu qarri kalaqamino. Dooramaanchu shoole hige doorshaho shiqasi haruunse doorsiissaanno komite giddonni huntinoti qangannite. Ikkollana, qoqqowu tenne hajo songote shiqishe Kalaa Alimiira Mehamedihu dooramaancho ikke sufanno gede wo`ma huuronni gumulloonkanni. Ikkirono, doorsiisaano komite riqiwamaancho loosu gumulsiisaano miila ikke doorama didaandaanno yite hooltu yannanni hanafe qarru kalaqamino. Seera agadhitinokki harinshonni kaino qarra tirate Fiifu riqiwamaano mereeroho e`e doorshu sufanno gede faasho wortino. Konne harunsite doorsiisaano komite doramaancho maayra hooltinoro xawishsha uytino.
Konninni, KAF seeri kaiminni, mittu dooramaanchi 3 yannanni ale dooramara fajjannokki daafira konne harunse kado macciishshate komite gumulo goofimarcho ikkitinota gumulloonni. Konne ikkinohura, doorsiisaano komite songotenni gumulloonni gumulo sa`e sufa dandiitannokkita egensiissino. Ikkollana, federeeshiine agannate gedensaanni wodho woyyeessite wonshate doorsha harissannota qummi assino.
Kalaa Isayaasi Jirihu, wirro dooramasi harunse, “Lowo geeshsha tashshi yiinoe; jawa minu looso uynoonnie” yiino. Songo shiima loosoomo looso`ya la`e konni deerrinni afamishsha uytinoe daafira hagiidhoommo. Daannoha shoole diro mixi`noommohanna hananfoommota baxxinohunni uurrinshate ijaara, Gobboomu Lekkate Kowaase gaamo, ooso`ya gede laeemmore Paayiletete Pirojektuwanna Seennu Lekkate kowaase aana loonsanni hee`noonni hajubba sufisate jawa mini looso uynoonnie. “Konnirano galaxxeemmo” yee xaadooshshu miidiyra hedosi worino.
Kalaa Isaayaasi ledote, “Daanno shoolu dirira massagate jawa minu looso uynoonninke; gobbate horo uytanno hedo adhate ayii yannara qixxaambommoreeti; dooramate yine doortinonke doga kapha dihasi`neemmo; mootummate ledo gamaba yine baxxinohunni Bahir Daarete Istaadiyeeme gooffanno doogo hasa noonke. Baara wido godo`litannoti lekkate kowaase godo`laanonke konne godo`litanna daa”atate anino wolu gede lowo gede qalli yoommo. Hakkonne looso illacha tunge loonseemmo. Tenne Istaadiyeeme jeefisate baalunku sharro hasiissannota ikitinota xawisno.
Kapho dibaxeemmo; kaphe mannu illera uwa dihase’reemmo; konne lame barra quchummaho assinoonni coyi gara dikkino; albillicho togoo looso loosa dinonke. Wole doogonni huuro afi`nara assinanni harinsho dancha dikkitino; kaaliiqi wodana fanonsa yiino. “Irkisaano`ya hawalle tashshi yiino`ne; Isayaasi koma diamadanno” yee hasawasi jeefisino.
Loosu gumulsiisaano ikkite heewisamate 32 dooramaano shiqqinoha ikkanna, konni mereero 9 meentoho. Uynoonni huuro kaiminni Habiiba Sirajjiti Addisi Ababunni 101 huuronni, Fayiza Reshiiditi Somaaletenni 65 huuronni, Bizuaayyehu Jemberuti 63 huuro afidhe loosu gumulsiisano komite miilla ikkite dooramate dandiitino.
Addisu Qaa`misohu Sidamu qoqqowinni, Dr Daagnachew Neggiru Amaaru qoqqowinni, Sherefa Dellecho Wodiidi qoqoowinni, Muraadi Abidihu Hararete qoqqowinni, Aser Ibirhaamihu Beenishaangulte qoqqowinni hattono Ujulu Aday Gaambeellu qoqqowinni doorama daniitino. Goofimarchohono, layinki pirezidaante ikkannoha loosu gumulsiisaano komite mereerinni doorreenna Dr Daanyaachewu Neggeruhu roortino huuronni dooramino. Aleenni doorroonni meenti ledo sufinoha shoole diro Itophiyu Lekkate Kowaase Federeeshine Loosu Gumuslisano Komite ikkite massagganota buunxoonni.
Doorshu jeefisami gedensoonni, Fiifu Pirezidaante riqiwamaanchi konni doorshinni hagiiraammo ikkinota xawise, Pirezidaantichahonna loosu gumulsiisaanora hawalle hagiidhitinoonni yitanno sokka saayise, Itophiyu Lekkate Kowaase lossate irkosi kaajjishe sufisannota coy`rino. Kaafi riqiwamaanchino dooramaanchoho dancha loosu yanna ikkitanno gede yortosi xawisino.
Bakkalcho Woxawaajje 26, 2014 M.D
