Canco kayisa,awaawurrenna kaphu duduwinni ilante lophitinonna su’misenni baaliiqqino gobba Itophiya bushiisha HWHT kalaqamu akataati. Cancishaanchu HWHT sa’’u sorosinni rosannokkinna ola hexxanni gobba hunate goo’rosi kassi assi’rate hixamanyanno diina ikkasi faajjetenni leellishino. Keeru woshshatto kaayyo lame sase hinge uyinoonnisita horoonsi’ra giwatenni sa’u sase dirra giddo Tigirayenniti keeraano daga kakkalantanno gede asse sainoti ikka gibbeennasi mootimma uyitino kaayyo qacce qolatenni biilloonyu goo’ro kasseenyira kuneeti wirro ola fani.
Sa’u lame urde yannara Itophiyu su’ma hunate waajjuulle junta horonsi’ratenni waajjuullu guluffanno farado ikkansanni Itophiyu HWHT aana adhanni afamanno qaafo sircho hunate fannoonninna Federaalete gashshooti olu mixonna safonni ikkinota guluffinonsa gobbaayidi waajjuullu juntinni kaphu duduwo fincitanni keeshshitinoti ayerano dimaaxamino halaaleeti.
HWHT kaimisi kaphoho. Konne buuxate kiilaanchunniwa hara dihasiissanno;27 dirra giddo Itophiyu dagaranna qoossora sharramannoha lawanni Meqele mereershira Olu uduunnenne Nadaaje waamanni keeshshinoti fojonsa reqecci assitino. Daganna dagoomu qoosso abbeemmo yaatenni babbadamooshshu buusa danqare karinotino sayinsummo sase dirra giddo dhookkanni afantanno duwantino giira naqqassanno.
TPLF xaano Federaalete mootimmanni assinoonni keeru woshshatto qacce qolte barra 17/2014 M.D soodihunni 11 saate balla ola fantu. Insanni ola fante insanninni Federaalete mootimma qassue yite xawishsha fushshitu. Halange umisenni gante umisenni raartanno yaanno maammaashshu. Ee;TPLF hasatto Federaalete gashshoote kalqete dagoominna mootimmuwanni qasiisse agawo tugisiisatenni shoshshoggitinonna beco ba’ino Itophiya la’’ate.
Gaance kayisa,olu jaddonna kaphu duduwo tareessa cancishaanchu HWHT kalaqamu akata ikkinota buuxissino. Tini gaance kalaqate, awaawuratenna kaphu duduwo halashshate doogosi qarqaraho keerunna ga’labbo xeertidhanno gede, daga wolootta Itophiyu daganni baxxitinoha lawe macciishshamannonsa gede,hudetenni ganantannonna shigiggissanno darammeranna tultaanbera ubbanno gede waalcho fanino. Hundinni adhe dayino akati wirro kaeennasi dagate su’minni olaho,moorahonna kalaqe dogate qixxaawate;gedensaannino moromate doogo ha’ranno gede assinosi. Konni daafira gaance kakkaayisasi bikka sa’e aliyye hajajo gargarooshshu olanto aana dhagge kolishshu mazigabira borreessitino moronsho kalaqi;keeraano qansoota mittimma shakki assi;siati. Jironna jajja horri. HWHT konne duucha assanni hee’reenna Federaalete mootimmanni diriirtino keeru anga gobbate,mootimmatenna dagate keere lawashshi assatenni Halangete gede umisinni gane isinninni raaranni keeshshasi sufisilla.
Techono assanni noohu konneeti. Moronshosinni layinki soodo lame sase marro wo’naale hoogino ola wirro kayise;ola fannie yaanni raara sufe afamanno. Dagate kila giddo suuqame wedellanna qaaqquulle olu xawira giirate soyaanni umosi keeru soqqamaancho asse leellishshate hecheemmo kadanni afamanno. Federaalete mootimma keereho diriirsitino anga qacce qole macca’ya hashuwaho yiino. “Bootu qali” yinannihu gede kaphu duduwinni wedella kakkaayisanni, kalqete rosaanote aana ilaama assine qansie yaanno. Kaphu kaphira tenne amandoommo lamala giddo rosu mine ilaante rosaano gantino yaanni duduwisiisa hawadu giddo rosaano nookkita Itophiyu daga affinokkiha laweennasi duduwisiisanni afamanno. Gobbayidi gobbuwa odeessaanono Farashshonsa TPLF gulufate yite kapho haadhe cancisha hanaffino.
Xa umisi qasino giira umosinni sholooltanno barri iillino. Fulannokki ilaala xiiwanni noota huwata hoogasinni madaarshisi amanyoote ollohisanni afamanno. Itophiyu daga Itophiya gatisate mitto ikkite ka’’a haaro coye dikkino;techono insaantilla; diishshote gede hurru yite idditanno;dagunchu gede cincansa guddino barra HWHT woowwoy ane!!
Olu ayerano dancha ikkinokkita qaaqquullu nafa huwattino 21ki sanira, HWHT doorshansa ola assidhino;ikkollana mootimmate widoonni keeru doorshuwa dicufantino;dibarrino. Keerunna hasaawu doogo giwatenni olanna gaance kayisatenni afi’nanni horo dino;higgannoti dagate xa’mono hattonni.
Bakkalcho Woxawaajje 26, 2014 M.D
