Itophiyu baca jifo la’ino. Gobbate giddo keeru hee’rannokki gede assatenni hanafe latishshasenna lophose hunate dodantanni keeshshitinori giddoonnino gobbaannino haammatu diinna noonka.
Abbayi (Bayiriidi Itophiyu haaroo`mate) kofatto loosidhannokki gede baca sharre loonsoonni. Woxu kaa’lonna liqoo afidhannokki gede barra hashsha daafuriweelo loossino. Ikkollana, dagatenna mootimmate wo`naalshinni pirojekituwa suffino ikkinnina diuurritino. Keerenna latishshanke gufisate wo`naalsha assitu ikkinnina heddinoti dikkitino.
Hasattonsanna yortonsa insa hedo gobbaanni ikkase masissunsata kalqete ba’re aana Itophiya ajanda assi’rate geeshsha iillitu.
Tennenni hexxo mudhitinokkiti murci’raano daga kayinni noonsa woxe taysidhe fushshitanni; egenno noosihu egennosiinni; wolqa noosihu wolqasiinni tenne pirojekite adda assate mittimmatenni sheemaate e’’e loosu giddora e’’ino.
Itophiyu latishshinna lopho egemmantinonsakki diinna seyose ikkikkinni umbese la’’ate halchite ka’’atenni Abbayi way lagi du`namanno gobbuwa luphiima gawajjo iillishannonke yitannotenni haaroo’mate kofatto ijaarshano ikko waa wonshate hajo ga`labbote amaale minira massitanni keeshshitino.
Tenne hajo kalqoomu bidhatto lawisateno millimillo assitanni keeshshitino. Baxxinohunnino Gibitse miilla gobbuwata sumiimme sa’’atenni xaano hajo ga’labbote amaale minira massa diagurtino. Ikkollana, Itophiyu Abbayi way laayyo gobbuwa miicate hedo noosekkita buuxisiissino.
Gutunni lanto; gutunni horonsi`no yitino; xaano tenne uurrinshase kaajjishshe suffino. Itophiyu halaale amadde dagasenna mootimmase addaxxite; waajjishiishshannosere baala badhera qolte tugge murciraano ikkitino daganna massagaanosenni xa iillitino deerrira iillishshinose qaafo mite yite hanaffino.
Lame yite suffe sayikkiha waa wonshate looso seyootenni jeefissino. Tini bayira qeelleeti. Dagannia qeelaanchimmate macciishshammeno luphi assitanno seyooti. Luphiimanke aana afi`noonni luphiimaati.
Dhaggete borro aana borreessine worranniti tenne yanna Itophiyi bareendete dhaggeeti. Kuni Itophiyu daga jawaaantenna kaajjilli techora calla ikkikkinni ga’arano hendanni jajjabba pirojektuwara xawishshaho. Kalqeno rosiisannoho.
Woloota dandiinannikkire labbanno latishshubba hanafatenni calla ikkikkinni loosanna jeefisa dandiinannitano leellishshanno hincilaallooti. Itophiyu daga jifote giddo ikkiteno borreessiissinoti haammata qeelle no. Haanju haruminni kalqete lawishsha ikkanno deerrinni loosonke gumulloommo.
Uminkenni sa`ne olluu gobbuwa diilallote gade soorrora qeechansa fultanno gede massagaano ikkine harunsaano ikkitanno gede assa dandiinoommo. Kalqete xawira kullanni lawishsha ikkate iillinoommo. Arri qamadenni, gorsu irshinni mixi`noonnita gumulloommo.
Kalqe qamadete anjenni shaa’maltanno woyte ninke kayinni anganke gootarinke widira qolloommo. Wole gatteenna Atileetiikisetenni afantino qeelle jifo baala sharramme qeela dandiineemmota leellinshoommo gottimmaati. Hiikko dani jifo giddono ikkine jifo sharramme qeelleemmo daga ikkanke loosunni buuxisiinsoommo.
Tini hagiirsiissanno qoleno naaxxisiissanno seyooti. Ikkollanna, tennenni naaxxine gonxeemmoha ikkikkinni xaano albillichono xaaddannonke mitiimmubba qeelletenni fullanni luphiimanke ledo qaanfeemmore ikkanke buuxisiinseemmote.
Gobbankera liqoonna kaa`lo ho`litino kalqoomu uurrinshuwa lede giddoonninna gobbaanni ikkite hunote wolquwa halante jiffuse woyte gaggabbu ikkinnina diubbino. Mittimmase ikkikkinni babbadamase, hattono diigamase heddenna mixidhe loossino. Baalanta jifo sa’inohu kayinni hayyotenninna egennotenniiti.
Baalanta jifo sa`inohu oosose bareendennninna massagaanose ikkadimmanniiti.
Gobboomunna gobbaydi qarrubba ragu ragunni dirantu woyteno hatteenne baala mitiimma sa’’atenni hasidhanno Jireenyu gottimma widira fulate dandiisiissanno loossanni kayinni hoolinonkeri nookkihura xaano albinte gede xaaddanno sarraaqo tattaysatenninna sa’’atenni maala`lissanno gumma borreessiinsanni birxicho fulleemmo.
Abbayi kofatto saynsummo lamalara laynkiha wolqa burqisate looso hanaffino. Batinye kalqete gobbuwa kuni loosi gumulamanno yitanno hedo dinonsa. Hasattonsa baala konni garinni ikkanno yitannota ikkitukkinni loosamikkinni la’’atenkanni.
Tenne hasattonsa adda assate qole gufisatenninna sharre loosatenni halantanni keeshshitino. Ikkollana, ajuujasenni miliqqi yitanno mootimmanna daga dino. Roorenkanni jifo mittimmatenni, cincatenninna halamatenni kaajjineemmo gede korkaata ikkitinonke.
Bakkalcho Woxawaajje 12, 2014 M.D
