Amsaalu Felleqe
Itophiyu naaxxissanno oosose uytino qajeelshinna massagonni hattono kaajjillunni heewisante sa’u muli barruwa giddo barruwara Ameerikaho Origen harinsoonnihu 18ki kalqete Atileetikse shaampiyooni heewora wara’a yite keeshshitino.
Oosonke shaampiyoonaho assitino sharronni 4 culka, 4 birranna 2 camo xaphoomunni 10 meedaaliya afi’ratenni Ameerikunni aante baca gobbuwara albisa ikkite kalqetenni laynki deerra hattono Afrikunni umikki deerra amadde heewo gumultino.
Adda coyi’rate Atileetikse gobbate mittimmanna daganke halamme leellishshannota ikkitino. La’noonni gumino Itophiyunni gobboomitte mittimma kaajjishannonna konni garinni mittimmanke sufisate doorshu nookki yanna tenne ikkitinota leellishanno.
Atileetootinke duuchanka woyte Itophiya gobbanke albinte gede kalqete xawira albaanni gotti yite leeltannonna ayirritanno gede assitino. Ameerikaho Origen quchumira harinsoonnihu 18ki kalqete Atileetiksete shaampiyoonira afi’noonniti naaxxissanno qeelle Itophiyu qansooti mimmitu ledo ayirrisamatenni, halamatenni, mimmitu ledo macciishshamatenni loossuro hiikko handaarinnino agarranni guma maareekkisiisa dandiitannota leellishannoho.
Konni albaanni dodanshote handaarinni baca qeelle adhatenninna baraarsha baraaranni keeshshinohu Atileeti Hayle GebreSillaaseno Atileetootinkenni afi’noommo qeelle gobbanke mittimmanna daganke halamme leellishshannota ikkase babbaxxitino tuqu xaadooshshuwara farci’rino.
Atileetootinke gaamotenni halante loossinohu Itophiyu qansooti mimmitu ledo halammummoronna baxillenke kaajjishi’nummoro woloottu ayirrissannonketa jawa baycho uytannonketa leellishannohu yaanniiti Atileeti Shaalaqu Hayle GebreSillaase xawisinohu.
Wo’munku Itophiyu daga babbadooshshe kalaqqannori shiimmaadda coyibbanni roore mitto assitannonke hajubba aana illachinshe loonsummoro mittimmatenni sharramme buxima qeelate loonsiro Itophiya lossate dandiinannita Atileetootinke halamme faajjetenni leellishshanno.
Hiittenneno Ispoortete heewonni halamme; halammete giddo kayinni heewo noote. Togoo ikkito luphi yite leeltannohu kayinni baxxinohunni wolootta Ispoortete heewubbanni roore Atleetiksete heeworaati.
Itophiyu Atileetootino tenne Ispoorte heewisamme qeellete iillinanni gara seekkite huwatansanni sa’u seeda dirra kalqoomu heewote xawira leellishshino halammenna qeellenni gobbankera maala’lissanno gumma abbitino. Xaahu Ameerikaho Origen quchumira harinsoonnihu kalqete 18ki Atileetiksete shaampiyoonira afi’noonni gumino tenne Ispoorte wodho seekkine huwata ikkito leellishinoho.
Itophiyu Ameerikaho Origen kalqete Atileetiksete shaampiyooni heewora mareekkisiissino gumi labballu maaaraatoonenni Atileetichu Taammiraati Toola culka; Atileet Mossinnet Gerremew Birra; meentu maaraatoonenni Atileet Goytetom Gebresillaase culka; 10kume meetire meentunnunni Atileet Lettesembet Gidey culka; meentu 5 kumi meetirenni Atileet Gedaaf Tseggay culka; Atileet Daawit Siyyum camo; meentu 3 kumi meetirenni Atileet Worqwuha Geetaachew birra; Meqides Abbebe camo; meentu 1500 meetirenni Atileet Gudaaf Tseggay birra; labballu 3 kumi meetirenni Atileet Lemmeecha Girma birra xaphoomunni 4 culka; 4 birranna 2 camo mitteenni 10 meedaaliya gobbansara afisiisa dandiitino.
Afi’noonni guminnino Itophiyu Ameerika harunsite hattono haammata gobbuwa balaxxe heewo kalqetenni laynki deerra amadde guddino. Naaxxissanno qeellenkerano heewisamaanono ikkito heewisamaano qajeelsitanni, amaaltanninna massagganni keeshshitinori Atileet komaander Deraartu Tullu ledo federeeshinete massagaano fultino yawo albillichono Atileetiksete handaarinni gobbansa riqibbe heewisantannorira jawa badhe ikkannoho.
Atileetootinke maareekkisiissino gumi umonsa calla gotti assite leellishatenninna uminsa horo calla agarsiisi’ratenni roore gobbate horonna qeelle roortanno yite loosansanni gobboomitte mittimmanna halamme la’noonni heewo ikkitino. Itophiyunna Itophiyimma woffi yinoonniwa hee’ne gotti yaa; halammete giddo qeellenoota leellishannoha ikkasinni Atileetiksete heewonni calla ikkikkinni ga’labbotenna latishshu loossanni hattono duuchante handaarranni halammiro qeelle adhanna gobba lossi’ra dandiitannota leellishannoho. Mittimmanke kaajjishi’ne mimmito macciishshinanni loonsummoro qeelleemmo!
Bakkalcho Maaja 21/ 2014
