Itophiyu bacu dani noosete;kuni batinyimmate xawishshaati. Babbaxxino akatinni xawino biinfilli biinfille calla ikke gatinoha ikkikkinni jajjabba kalqete barera ayirrinyenna xircho uddisiisinose. Hundinni kayise techo geeshsha ayirrinyu ba’latto uddisiisannase kalqe maala’litanni afantanno.
Itophiyu seeda dirrara heedhinohu mittimmasenna albisaanchimmase agarsiisseeti. Ayirrinyisenninna wolambinatisenni suffanno gede,umisenni sa’e duuchunku kadantino kolidda dagara lawishsha ikkite xabbanno gede qansootise fultino qeechi luphiimahonna kiirre gundannikkiho.
Kuni halaali egemmaminonsakkirinna dirrate loossanno sharrete mixo toltannonsakki daafira giddonna gobbaayidi diinna kayinni mittimmase babbadamooshshunni riqiwate, mittimmatenninna batinyimmatenni kaajjitino cigile daafursate untinokki bale,wo’naaltinokki bunshete assooti dino. Ikkollana kayinni Itophiyu daga ikka mayinnino ayennino roore ikkitinohura sharrensa toltunsakkinni,bunshensa base gantukkinni bero sa’e techo ayirrinyisenni ledo xabbino. Techono sa’e ga’a lupheenyu ilaali aana ofollate hadhase suffino.
Itophiyu bayirroonyi techo kalaqaminoha ikkinokkita,qeela gadese ikkitinota hunda Adiwu oli naqaashete;ko’’atte wodhikkinni 42 kiilo meetire dode kalqete ofoo amadisiise,Itophiyu su’mu qaccetenni qaccete geeshsha woshshamanno gede assinohu Abbebe Biqilihu miqichi naqaashete. Techo lubbotenni hoogirono su’misi waammate iimanniiti noohu.
Bareende Itophiyunnita kulle yiniro,Miruts Yifter,Belayineh Diinsamo,Daraartu Tullu,Faaxuma Rooba,Qenenisa Baqqala,Gezzaheny Abarranna Geexe waami hattono Xirunesh Dibaabanna Genzebe dibaaba….. kulle gundannikkiri techono ga’ano qaangannanna Itophiyu su’mi ka’’anno wote su’minsa ledo ka’’anno bareeddankeeti.
Konni ayirrinyira biifissino,qeelletenni wora’a assitino gobboomu harinshora kayinni biifado Itophiya kalaqqino bareedda oosose assooti dirrate xawanni keeshshino. Wolambinateho olu xawira,mundeensa dunte miqichonsa cancantenna kakkalante mundeensanni kaajjishshino Baandeerinni gotti assitinose. Mundeetenni xawino Baandeeri buximatenni woffi yaannokki gedemiinjaho latishshu aana techono oosose sharrantanni afantanno.
Baandeerinke kalqoomu xawira luphi yee leellanni ayirranno gede Itophiyimmate ayemma qaanganni gede assitanno Isipoortete handaari baxxinohunni Atileetootinke noonsa borreessiissanno qeelle Itophiyu daga hagiirru hindiiddo du’nitanno gede assino. Konne duucha xaphi asse gurdannohu qeelle baalante xopho dagate bayirroonyi fooliishsho kayinni Itophiyu qeelaanchimmanna albisaanchimma buuxisate.
Itophiyu qansooti bare baalate Itophiya qeellete ilaali aana fushshate kakkalantanni uminsa ayemma woy gosansa hedo xiibbeennansa dikkino. Konninni roore Itophiyimma meessaneetinni,dagoomittetenna gosatenni aliidita ikkase huwatteeti ikkinnina.
Konniraati Adiwu ilaalla aana badooshshunna babbadamooshshu nookkiha mittimma kakkalante qeelle baraadhinohu;konniraati Bayiriidi Itophiyu haaroo’mate kofatto halante ijaarte dirrate halchinoonni Abbayi kofo caabbicho burqisate haaqe adda assitinohu;konniraati Atileetootinke meessinsa ayirrinyinni roore gobbate ayirrinyira balaxo uyite gaamotenni halantee sharrante qeelatenni Itophiyu Baandeera albisaano gobbuwanni roore luphi yee assite hindiiddonsa duntanni Itophiyu daga hagiirru hindiiddo heqqifattanni du’nitanno gede assinohu. Tenneeti mittimma;togoote Itophiyu daganna dagoomu halama. Gumuno qeellete!
Mitte gobbara jifama noontennilla,sharramano hattonni. Culku nafa giiratenni jifame huuncameeti xawannohu. Itophiyu dodanno balaxanno;jifamanno,sa’anno yinoommohu konniraati.Kuni diri Itophiyunniho;konne ikkasi buuxate kiilaanchunniwa hara dihasiissanno; 18ki kalqoomu Atileetikisete Shaampiyooni gumi naqaashete. Afi’nanni hee’noommo gumi bareendenkenna qeellenke wora’a asse leellishannoho.
Atileetootinke meessaneetinsanni roore gobbate,dagoominsanna gosoomimmatenni roore Itophiyimmate ba’lattora qalxante sharrantanna;luphi yiino Itophiyimmanke bareendenni qeelle uddisiissannanke Itophiyu daafiranna Itophiyimmate wi’litannanna oso’litanna huwantoommo. Kuni Itophiya berono ikko techo Oosose jawaata sharronni qeeltanni noota buuxisannoho.
Jifo roore kaajjishshinonke;Itophiyunna Itophiyimma jiffannori batidhu kiiro qeelletenni sa’’a rosicho ikkitino. Korkaatuno Itophiyu qansicha ikka hallanyootu woy bikkantino gaamo hajo ikkikkinni gobba qeelaancho assate halaaleeti. 18ki Kalqoomu shaampiyooni aana ikkanni noorinna xawanni nori konne halaaleeti. Konne ikkinohura hiikkunni handaarirano Itophiyu Ooso qeeltanno woytenna baandeera gotti assitanno yannara qeeltannoti Itophiya ikkitinota huwata hasiissanno.konniraati Itophiyu qeeltinohu;albaaggeno qeeltanno. Itopiyu; Doddanno Balaxxanno;Jifantanno Sa’anno!
Bakkalcho Maaja 14, 2014
