Itophiyu daga diinaho jawaattino mittimmate cigile nooseta naqqasate xeertonniha Adiwu qeelle calla kullanni hee’ra dihasiissanno;sa’u lame dirra giddo HWHT gobbaydi wolquwa balba’lenna halame fanino ola irraawisa muli barri naqaasheeti.
Itophiyu daga Itophiya diigatenna billa biinxa fushshate hasidhanno bissara kaayyo aannokkita Xaaleena mittimmate cigilenni baqqi yaannokki gede assate mittimmate cigile diriirsitinota kalqe naqqassino. Koliddu bareedda ikkansa waajjuulleho naqqasate Afriku giddonni lawishshunni kayinsanni gobbuwa giddonni Itophiyu albisa su’ma amaddinota ayno afino halaaleeti.
Sa’ino bareendete dhagge calla kullanni dihee’neemmo yitino Itophiyu daga Cancishaancho HWHT buluuloho qolatenni lame higge Itophiya diigamatenni woxxitunkunni shiima agannalla kiirantino. Ikkollana, xaanoTPLF assinoonni araarunna keeru woshshatto giwatenni hawado agare ola fanate qixxaawanni noota mashalaqqe faajje assitanni afantanno.
Sa’u lame yanna urdenni mannu lubbo ba’ino;qansootu qaensa hooggino. Ama higannoe yite rosu minira sokkino qaaqqi doogote juntu qodhaanonni abbalamino. Roso gude looso amadannoe yitanni annu nookki ooso lossidhino ama suusase la’ukkinni mullawa abbalamanno gede HWHT assinannikkita assino.
Tigirayete daga Itophiyu dagaati;roduuwankeeti yaatenni lame sase hinge araaru woshshatto assinoonni. Ikkollana poletiku goo’riissinonsa TPLF keere dirrisate woshshatto qacce qolte gobba diigate qodhite ka’ino oli Tigirayete wedella waaga baatisiisino; qaaqquullu olammanni hayyo rossinokkiri olu xawo fulte higgukkinni gattino. Amate hindiiddo qoortukkinni wirro sayikki yannara olu dibbe gana waaga baatisiissannonsata huwata hasiissanno.
Tenne lamala giddo addi addi hasaawa me’ichote arrawihu Geetaacho Raddihu eeli geeshsha dirre daga hasaawisanna leellishshanno fotonna Viidiyo fincantino. Geetaachora albu baaliiqino;hasaawu beeqqaano albi kayinni qoorino. Hudete nigi albinsara leellanno;hanqu xirchino hattonni. Isira mayi bushshusiyya? Tigirayete daga hudensa cincite keere dirrisate assinoonni gambooshshe laweenna gamba yitino. Kayinnilla xirchinsa leellishannohu “Olu ikkonke” yitinotaati.
Olu danchi dino. Olaho gaaddannori buxane Tigirayete dagaati. Olunni tirfidhannori Geetaacho Raddihanna Debiretsiyooniuu labbanno olu hayyo burqisaanooti. Ikkireno ikkeenna Tigirayete daga busula hasiissannohu xaati. Gattinore tole wedella wirro gudara HWHT olu dibbe gana hanafino.
Xa Itophiyu daga mitto ikka hasiissanno yannaati.TPLF rumushshunni ba’’anno gede yanna iillitinoha labbanno. Mittimma Diinge Itophiya Billaallisate Hiixata Gumiweelo Haaqeeti! Haaqe haaqetella. TPLF Shoole kilo amadate mixo haaqe ikkite gattanno gede taaga sai lamu oli yannara leeltino mittimma naqaashete. Hatti cigile techo dihuru’mitino. Adiwu yannara leeltu bareende techo dishoshshoggitino. Hakkawari cigile techo dihuru’mitino. Diinaho badhe higganno cigile,kolossi yaanno xirchi Itophiyu dagara dinoo dhaggeeti. Giddoydi babbaxxa giddo amaxxatenni diina irraawisse leellishshino daga xaano futakku gede umanni noo cancishaanchu TPLF gaamora jirsanke tungeemmo yannaati.
Itophiya hemetenninna billaallisatenni gashsha rossino TPLF techono 27 diri giddo qajeelsitino soqqamaanonsanni mereero e’e burduuqqanni afantanno. Xaano insa soqqamaano co’o yitinoha dilabbanno. Mitowa amma’note minna giirsiisatenni Amma’note poletika kayisate wo’naaltanni;wolewano kaasse hadhino sirchunna gosate uticho kikkisatenni hattono dannunni korinni mimmito billaallisatenna gaance kayisiisate wo’naaltanni afantanno.
Itophiyu daga kayinni giddoydi babbadamooshshe giddo amadde diina shorrate mitto ikkite sa’inoti ayerano dimaaxantino dhaggeeti. Ee;xa diinu gobba horraranna billaallisara qixxaawino. Itophiyu daga kayinni ilamate bashshoo annuwinkenna akaakkanke gede gobba sufisate mitto ikka hasiissanno yanna xaati. Hatti cigile jawaatto! Kaaliiqi gobbanke agaro!
Bakkalcho Onkoleessa 11, 2014 M.D
