Gobbate daafira bacare yinoonni; borreessinoonni; faarsinoonni; bacareno kulloonni. Qansootu gobbansa daafira yannansa, egennonsa, wolqansa, hakkiinnino sae lubbonsa baattino. Gobbate ayirrinyi dafira assinoonnihu qaraartanno sharronni gobba meexantukkinni wo’mu ayirrinyisenni heedhannonna ilamate raginsanni dangoonni. Kuni baalu gobbate ayirrinyinna waagi jawa ikkinota kulateeti.
Ninke Itophiyu mannirano baxxinohunni gobbanniti tiro luphi yitinota ikkase hundinni hanafe sa’u ilama assitanni dagginoti sharrote dhaggenke halaalaalcho lawishsha ikkite kultannonke. Bi’renni ilama gobbansa daafira baattino waagi albiiiditi ikkito xaa ilama haxonsa gotti assitenna ayimmansanni naaxxite heedhanno gede assitino.
Xaa yannara kayinni dagatenna gobbate gede angankera noo keeraanchimma, keeraanchimma kalaqqinohu uminkenni uurratenna kaajjado ayimmanke afi’noommohu yanna yannantenni worbuullu annuwinna amuwi lubbonsara marartukkinni baattanni iqqitinonke daafiraati. Albaanni sa’u amuwinna annuwu ejjeettonke lubbonsa baattanni gobbanke ayirrinye agarsiissinohu gobba aye richirano aleenni ikkitinota seekkite huwattino daafiraati.
Gobbanke lowo waaga baanteenna ilamatenni ilamate iqqantanni xa hee’noommo yannara iillitinohu dhaggenke yanna giddo gobbate ayirrinye ajishshe la’annori woy gobbate su’minni dadda’litanni hilo loossannorino heedheennaantilla. Gobbate ayirrinyu noonsakkiri; uminsa horora yite gobbate ayirrinye diinaho sayisse uyitinori; godowu meessiha lawanni hee’re ga’manno yinanninte gede ledo heedhenni kayinni gobbansa wolootu diinnara sayisse aate assitanno sharronni haammata gobbansa baxxanno qansooti gawajjantannonna danotenni lubbantanno gede assitino. Xaano togoo assooti gobbankera noolla.
Yanna yannantenni ka’annoti ayimmate ledo amadantino ruukkimma adhite qiqqishante lophitino roduuwinke gobbanna daganke jawa waaga baatisiisatenni gobbankeha dancha macca hunatena shollishate hedde dhaggenke aanano diqillo buurtanni sa’ino.
Baxxinohunni yanna yannantenni gashshootu soorramanno woyte daggannoti soorrote gafa gaa’lite gobba shabbarsatenna uminsa horo calla hasi’ratenni soorrotenni afi’noonni kaayyono angankenni ba’eenna hoongeemmo gede assitino. Kuri hunote bisaa dagatenna gobbate daafira horontanni ayirrinyu nookkiri; uminsa hasattonna horo calla shorritanna illensa danchare la’annokkirinna buqqeensa wolootahonna gobbate daafira danchumma heddannokkiri daganna gobba jawa waaga baatisiissanni sa’ino.
Kuri bainchu assootinsanni buqqeensa tatawantino wolqa dhaggensanni gobbankeha mootimmate biilloonye amadde 27 ale ikkitanno dirrara keeshshitu yannara gobbatenke gawajjantanno gede assitanno gurcho hedonsa dagate giddo fincitanni nmittu mittunku qansichi wodani giddonni gobbate baxilli ba’’annonna gobbasi shotu garinni la’anno gede assitino.
Qaetenna ayimmatenni calla huxxante gobba gawajjitanno hedo rumuxxitanno assatenni kalaqqinori techono gobbankenna daganke hasiisannokki waaga baattanni shettote giddo ubbanno gede assitino.
Hunote gaamo wixxinohu bushu wixi laaleenna techo kuneeti keeraano qansooti mixxitanni afantanno. Qansootu barru barrunkunni mininsanni keerunni fulte keerunni higate shettanni; loosidhe laashshidhinoha mixxate, osiichonsa keerunni lossiratenna rosiisi’rate ga’labbonsa teesseenna hashshu yite hee’rate shettino yannaati. Gobbankera daggino soorrono sufisate jawa guffa ikkitanni afantanno.
Gobba dagannite. Dagano gobbate hexxooti. Gobbanke iillitannose danonna gawajjonni keeraancho ikkitinohu konneeti yine kullannihu dhaggete gafi hoogiserono; xa noohu kayinni roorenkanni heeshshotenna reyote mereero hee’ne shettote giddonni fulate ga’nammanni hee’noonni yannaati.
Gobbanke xaa yannara giddoyidinna gobbayidi diinnanni huxxante qarru giddo uwatenni gatte soorro daggu yannara hexxinummo garinni gobboomu hegeraa’mankenna dancha kaayyonke layi’neemmonna hasi’neemmota keeraancho dancha heeshsho hee’rate dandiineemmo gede mittu mittunku qansichi gobbasi keeraanchimma daafira agarannisi qeecha annimmatenni fulara hasiisanno.
Konnirano xa hee’noommohu akkalunna baincho dhaggenkenni fulle haaro dhaggenni dagatenna gobbate elannore loosate baalunku keeranchimmate daafira albisaano ikka agarranninke. Hasi’neemmo keeranchimma afi’rateno albi ejjeetto annuwinna amuwi giddoyidinna gobbayidi diinna sharrante keeraancho gobba ragissinonketa ninkeno keeraanchimmasenna ayirrinyese agarre aanatanno ilamara ragisa hasiissannonke.
