Addis Ababa:- Itophiyu 2002-2011 M.D geeshsha diilallote jiro soorronni gawajjantannokki gede tumo qolate 82 biliyoone doolaare woy 598 biliyoone birra fulo assitinota Qarqaru, Dubbunna Diilallote Jiro Soorro Komishiine Komishiinerichi Pirofeeser Fiqaadu Beyyenehu xawisi.
Pirofeeser Fiqaadu tenne lamala gobbate deerrinni diilallote jiro soorro malamate bare aana egensiisino garinni, Itophiyu diilallote jiro soorro harunsiissanni noo xiiwo dandaatenna tumo qolate widoonni lowo geeshsha duushshino guma borreessiisa dandiitino.
Sa’u dirrara dubbu meexammenna dolamme ajishate loonsoonni hala’lado loossanni gobbate dubbu diwo xibbuunni 17.2 anga lossa dandiinoonni yiinohu Pirofeeser Fiqaadu, haanju harumi mixo ragaanni daga beeqqisiisatenni shoolu dirinni kayinsara hendoonni 20,000,000,000 haqqu kaashshi giddonni xaa geeshsha 9,000,000,000 haqqu kaysho kaansoonnita xawisino.
Diilallote jiro soorro dandaate dhuka kalaqqannonna shiimmaadda baatto loosidhenna ce’e galtino daga diilallote jiro soorro dandiitannonna qeelantannokki loossa loosantino. Sagalete wowenna giwirrinni laalchimmara qeechu noonsa batinye pirogiraammanna pirojekkittubba loosu aana hossino.Konni loosinnino batinye manna horaameeyye assatenni quchumahonna baadiyyete heedhanno meentiranna wedellira loosu kaayyo kalaqantino yiino.
2010 M.D geeshsha afamino bikki deerrinni giwirrinnu handaarinni 5.73 meetiriiki toone, wayi, gorsunna wolqate handaarinni 23.55 meetiriiki toone, daddalunna industirete handaarinni 0.017 meetiriki toone, dubbu handaarinni 15 meetiriiki toone, hodhishshu handaarinni 0.34 meetiriiki toonenna quchumu latishshinna konistiraakishiinete handaarinni 0.03 meetiriiki toone kaarboone xaphooma 92.6 meetiriiki toone kaarboone ajisha dandiinoonnita xawisino.
Assinoonni gumulshu buuxo xiinxallo garinni 2002-2011 M.D geeshsha gobba diilallote jiro soorro xiiwo dandaatenna tumo qolate 82 biliyoone Ameeriku Doolaare woy 598 biliyoone birra fulo assase kulino.
Konni gobbaannino dubbu saada latishshinna agarooshshi widoonnino jawaachinshanni sewoo afamase xawisinohu Pirofeeser Fiqaadu, handaaraho baabbaxxino sayinsitte xiinxallonna buuxo, tekinoolooje rumuxxisatenna egensiisate loossa loosu aana hosansa xawisino.
Addisu Adoola
