Hawaasa:- Tayixe harinsanniha 6ki gobboomu doorshi yannara qoqqowoho ga`labbote qarri hee`rannokki gede assate dannunni xaaddanno qoqqowubba ledo qinaanbe loonsanni hee’noonnita Sidaamu Dagoomu Qoqqowi Mootimma Keerunna Ga`labbote Biiro egensiissu.
Biirote Sooreessi Kalaa Alamaayyo Ximootiwoosihu Itophiyu Pireesete Uurrinshi Bakkalcho gaazeexi ledo assino hasaawinni; 6ki gobboomu doorsha harinsanni yannara; cancu, gaance hattono ga`labbote qarri kalaqamannokki gede assate yanna yannantenni kaajjado hasaawa assinanni hee`noonnita egensiisino.
Sidaamu dagoomi qoqqowi Oromotenna Wodiidi daganna dagoomi qoqqowubba ledo xaadannotanna; Sidaamu Oromote ledo calla 21 woraddanna 105 olluubbanni xaadannota kulinohu sooreessu; dannunni xaaddanno qooxeessuwara doorshu yannara mitiimmuwa kalaqantannokki gede mittimmatenni halamme loonsanni hee’noonni yino.
Kalaa Alamaayyo xawishshi garinni; daga huuro uytanno yannarano xaadanno yine hendannire ga`labbote qarra bande injono maati yaannoha hasaanbenna keenne balanxe gargarate qixxaawo assinoonni yino.
Baxxinohunni muli yanna kawa dagate riqiwamaano amaale mini gobba cancishshannoreeti yee gumulinori ‘’Shene’’ nna ‘’HWHT’’’ konne doorsha gufissaranna cancishshara hattono ga’labbo booreessitara hasidhanno daafira; insa milli millo seekkine buunxanninna haruunsinanni hee’noonnita buuxisino. xaphomunni doorshu co’icha, keeraanchonna dagatenni ammanamooshshu nooha ikke gumulamanno gede assate hashsha barra ga`labbote bissa ledo loonsanni hee’noonnita kulino.
Qoqqowohono 6ki doycho doorsha isilanchonna dimokiraasaawe doogo agadhino garinni gumulamanno gede assate deerru deerrunkunni nooti ga’labbote bissa doorsha harinsara albaanni noo loosono ikkadu garinni doorshu basera uurrite hasiisanno uduunni base base iillannonna dagano marte borreessante kaardensa adhitanno geeshsha qarru kalaqamannokki gedenna qooxeessuwate ga`labbo agarsiisate loosono loonsanni hee’noonni.
Dannunni xaaddanno qoqqowubba ledo keerenna ga`labbo teesiisate keeru konfiraanse harinsoonniha ikkanna qooxeessuwate ga`labbote mitiimma xaaddinokkita; hattono albaanni mereeronsa gaance kalaqantannokki gede gargartote olanto agartannowa xaa yannara qooxeessu poolisenna milishu calla agartanno gede assinoonnitano Kalaa Alamaayyo xawisino.
Albaanni kaino gaancenni qaensanni darantinori kiirotenni 66 kume ikkitannori Sidaami daga xaa yannara qaensara higganno gede assinoonni yinohu sooreessu; xaano ga`labbote qarri hee`rannokki gede assate loosi loosamanni noota huwachishino. Xa tenne yannara hiikkono Sidaamu qoqqowi ledo dannunni xaaddanno qoqqowubba ledo olu, cancunna gaance nookkitano huwachishino
Albankeenni harinsanniha 6ki gobboomu doorsha keeranchona dimokiraasaawe assate miteekke qarru kalaqamiro huntinorenna qarra kalaqqannore qorichishatenna gumulo aate hasiissanoha shiloota uurrisate qixxaanbe hee`noonnitano Kalaa Alamaayyo Ximootoosihu lede xawisino. Qarru hee`riro dagoomu qooxeessaho afantanno ga’labbote bissara egensiisa hasiissannotano sokkasi saysino.
Abrahaam Saamueel
