Addis Ababa:- Gobboomu amaale qineessate co`icha keerenna keeraanchimma buuxa hasiissannota albihu Wodiidi qoqqowi pirezidaantichi Kalaa Abaate Kisho buuxisiisi. Gobbate sufamaancho keeri buuxamanno gede baalunku umisi qeecha garunni fula noosi yino.
Kalaa Abaate Kisho baxxinohunni Itophiyu pireesete uurrinshara yuno xawishshinni; gobboomitte amaale harisate hendoonnihu gobbate giddo tirama noosi qarri hee`rasinniiti. Yanna baalate kalaqantanni noo qarrubba kaimino sumuu yaa hoogate qarrubba hee`ransanniiti. Mootimmano hajote ragaanni wirro wirro higge xawishsha fushshitino; mite mite qooxeessubbarano qaafo adhitanni afantanno yino.
Duuchunku aleenni kayinni sumuu yaa hoogate qarrubba tirate addi furcho ikkinoha gobboomu amaale harisate co`icha keerenna addaxxisiisanno keere kalaqa baalunku yawo ikka hasiissannota coyi`rino.
Mootimma qansootu keerenna keeraanchimma agarsiisa balaxote loososi ikkasinni tenne lamala giddo beeraawe keeraanchimmate amaale mini tenne hajo lainohunni fushshino xawishshi konni biso ikkinota coyi`rinohu Kalaa Abaate; xaa yannara qansootu keeraanchimmanna gobboomu mittimma jifanni noo qarra kaimisinni tirate gobboomu amaale harisa furchote. Konnirano mootimma addi illachinni loosa agarantannosi yino.
Kalaa Abaate xawishshi garinni; keeru wolootu qaccete da“aataano ikkite mootimmate bisinni calla buuxisiinsanni hajo dikkino. Keeru duuchunku ledishshi gumaati. Xa leeltanno qarrubba garunni tirama hoogguro gobba fultannokki shettora eessitara dandiitanno. Ikkinohurano keeroho balaxo aatenni loosa hasiissannota huwachishino.
Xa gobbate leellanno garinni rumuxxitino gibbonna giwansho dagate mereero nookkita xawisinohu Kalaa Abaate; boode polotikunna ninke fullahaanote yiteemmeri sharre qarrubba iibbabbitanno gede korkaata ikkitinota kaysino.
Gaance kalaqantu, mannu lubbami, daga darantu, jajju diigami yitanno duduwo macciishsha hoogate baalunku keeru qote uurra hasiissannote. Lawino garinni gaancenna huno qitiissate rakkanno bissano albansa keerehonna dancha ikkitino dagoomu assootubba widi ra wirri assitara hasiisanno yino.
Dagoomu mereero mashalaqqe doodhatenna bade horonsi`rate rosicho lossa hasiissannotano coyi`rino.
Keeriweelo gobba, gabba ikkite uurritannokkita mitte yannara ayirradda ikkitinori xaa yannara kayinni Addis Ababu doogga aana la`neemmonsare Sooriyu daga la“a ikkadote yinohu Kalaa Abaate; konni kaiminni amma`note annuwi, gobbate geerri, abba gadootu, polotiku manninna fullahaanono daga xaadisate gutunni loosa hasiisanno yino.
Gobboomu amaale komishiineno xa`mo noosihu baalu bagadosi heeshshi assatenni xa`mosi amade amaalete shiqa gede doogo injeessate yawo fulara hasiisanno yino.
Kalaa Abaate xawishshi garinni; xaa yannara mimmito kaa`late harinsho duushshitannota ikka hoogasenni qarrantino dagara assinanni kaa`lono mittu widinni calla ikkatenni sa“e dagittete xinti hee`rasira hasiisanno.
Gobbate gede keeshshinoha dagate xaadooshshe kaajjishate ga`labbi yitino qooxeessuwara heedhanno dagoomu kifilla mannu anga loossinonna kalqote danonni gawajjo iillitinonsa daga towaatantanno gede assa wolootu qarra huwattanno gede assa rodiimmate macciishshamme kaajjishanno. Baxxinohunni aliyye oli korkaatinni qarru aana ubbinorenna moollete korkaatinni gawajjo iillitinonsa dagara kaa`lo assa kalaqara dandaanno xadooshshi luphiima ikkinota coyi`rino.
“Hawalle Sidaamu Daga Diru Soorro Fichee Cambalaallate Ayyaana Keerunni Iillishi’ne “
ABBEBECH MAATEWOOS
Bakkalcho Dotteessa 20 , 2014 M.D
