Addisi Ababa:- Fichee Cambalaallate giddo noo budinna hornyubba hattono affini amanyooti tenne yannara gobboomu deerrinni assinanni hee`noonni araarunna amaalate komishiinera jawa irko assannota IFDR Budunna Ispoortete Ministere Minsteeirchi Kalaa Qajeeli Merdaasihu egensiisino.
Minsterchu Kalaa Qajeeli Merdaasihu Bakkalcho gaazeexira uyno xawishshi garinni, “Sidaamu Daga diru soorro ayyaani Fichee Cambalaalla giddoseenni haammata budenna hornya amaddino. Mannaho agurranna saadate nafa baxxino ayirrinye uytannoha ikkase; hattono affinni amanyootinni gibbonna gaance tirate noose amadooshshi jawa ikkinohura; gobbomu amaalammete komishiinera jawa kaa`lo assitanno” yiino.
Kalaa Qajeeli Merdaasihu ledoteno; Fichee Cambalaallate ayyaani Itophiyaho noo budi giddo “UNESCO”te mitto budu dona ikke borreessaminoho. Itophiyaho haammata illete leeltannorinna leellannokki budu donna noota xawisinohu Ministeerchu, Fichee Cambalaalate gedee doni hee`ra Itophiya kalqete dagoomira gotti assannota egensiisino.
“Fichee Cambalaalte doni Sidaamu dagaha calla dikkino;Itophiyunna kalqete donaatinna jirooti. Fichee Cambalaalla kalqete dona ikkite borreessantara assinosehu qaru coyi giddose amaddino haranyubba ikkitinoti” yaanni buuxisino ministirichu. Konne giddose amaddino hornyubba dagate mittimmaranna keerira, danchu akatiranna jawaantete hattono daga rosiissanohura Budu Minsteere kuni budi bowiranno gede agaranna towaata hasiissannota coyrino.
Kalaa Qajeeli xawishshi garinni, Fichee Cambalaallate gedee Itophiyu giddo afantanno donna duucha no; kuri Itophiyu daganna dagoomi mittimma kaajjishanno gedenna budu baadillichu budi giddora e`e karsantannokki gede assate addi addi xiinxallonni irkisate Budunna Ispoortete Ministereenni duucharre aggarrannita coy`rino.
Qajeeli Merdaasihu, ayirrado Sidaamu daga hundunni kayisse adhite daggino umise budinna balchoomi noose jawanna ayirrado dagaati yee; kuri mereerinni Sidaamu dagahu Diro soorro Fichee- Cambalaallate ayyaani albisanna hala’lado ikke Sidaamunniino sae kalqete Dona ikke “UNESCO” maareekkamino donankeeti. konnira konne donanke baxxino garinni illachinshe giddose noo horyna latisanna agara noonke yiino
Fichee Cambalaallate ayyana ayirrinsanni yannara addi addi sokka sa`annota Sidaamu giddono ikko wolootu hattono gobboomu deerrinni giddose noo hornyi dagate mittimmaranna miinjaho jawa qeecha afi`rinota xawisinohu Ministirichu; baalunku konne budenna dona seekkine agaranna latisa noo yee sokkasi saaysino. Ayirrado Sidaamu dagganna Itophiyu daganna dagoomi baalu hawalle Sidaamu daga diru soorro Fichee Cambalaallate ayyaanira keerunni iillishinke yiino.
ABRAHAAM SAAMUEEL
Bakkalcho Dotteessa 20 , 2014 M.D
