Addis Ababa:- Awuroppu mittimma tayxe gobboomu deerrinni harinsanniha 6ki doorshi harinsho dilaeemmo yaasi umisi ammanaminokkiha assannosita Tigrayete dimokiraase paarte murrichinna Itophiyu haaroo’mate kofatto loosi qineessate gobboomitte amaale mini qaru dayirekterichi Dr Aregaawi Berihe xawisino. Doorshu aanano ikko daganke aana kalaqannori nookkitano hattonni.
Dr. Aregaawi xawishshi garinni Awuroppu mittimma albaannino ikkiro HWHT paarte massagaano tuqu xaadooshshuwa baalanta fugge amadde woloota hettisamaano paartuwa riqibbinore usuru mine eessite doorshu wo’munni wo’ma qeelloommo yitanni faajje assitanno yannara adhitinoti taashshote qaafo dino. Kuni assootinsano mittu dorshu yannara calla ikkikkinni sayinsummohu ontunku doorshu yannara la’noommo halaaleeti. Tayxe doorshi harinshono dange dila’neemmo yaa abbitannori mitturino nookkitaati buuxisinohu.
Tayxe 2013M.Dra 6ki yannara harinsannihu gobboomu doorshi gobbankera dancha soorro, keerenna ga’labbo abbannoha ikkasi ammanneenna qixxaawo assinanni hee’noonniho yinohu Dr Aregaawi; Awuroppu mittimma doorshu harinsho dilaeemmo yaasi kayinni Juntunna wolootu gobbanke keere hasidhannokki bissa hekko kalaqqeennansa shettinoha lawisannota qummi assino.
Juntu gaamonna dukkisaanosi gobbaydi gobbuwa tuqu xaadooshshuwa baala horonsidhanni kaphu duduwo fincitanni afantannotanna Awuroppu mittimma togoo hedo amaddanno gede kiirotenni qubbuchunni kullanni mannootansanna woxensa horonsidhe konne diassitanno yaa didandiinanni yino. Ikkirono mittimma gara ikkinokkihanna gobbankeha yannate akata hedote giddo worinokki garinni amadino uurrinsha ikkinotano huwata noosi yino.
Adhine dangeemmo yitinohu tuqu xaadooshshuwa uduunni gobbanke telekoome nabbabbannokkiha ikkasi aleenni mayimmasino anfoonnikkiho. Konneno umose dandiitino gobbara fajjo-weelo adhe e’’eemmo yaa gobbanke mishatenna ayirrinyese shollishate gede la’nanniho.
Awuroppu mittimma dagge doorshu harinsho la’eno hooggennano doorshinke aana abbannori mittu qarrino nookkita leellisha dandiineemmohuno baxxinohunni gobbate giddo millissannori siivike maamarra dhukansanna qoosonsa garunni horonsodhe adhitino eeggo garunni fula dandiiturooti yinohu Dr Aregaawi; tenne kaayyono horonsidhe doorshu harinshono garunni la’’a dandaa noonsata kulino.
Dagano diinna heddanno garinni ikkikkinni ayirrado ikkinohu gobbanke budenna balchooma agadhino garinni huuronsa hasidhanno paartera aatenni gedensaannino dayino gumi aana koffeenyu macciishshaminsaro seeru bissawa ha’ratenni doorshu gumulo lainohunni seeru aana worroonni wodho kaiminni dawaro afi’ra dandiitannota qummi asse togoonnino ayimmansa leellisha noonsata huwachishino.
Amsaalu Felleqe
