Sidaamu dagoomu qoqqowi mootimma pirezidaante kalaa Desta Ledamohu wo’manku Isilaamu amma’no haruunsaanora hawalle 1442kkihu Id-Al-Fexiri ayyaanira keernni iillishi’ne yaanni dancha halchosi xawisino.
‘’Ayirradda qoqqowinkenna duuchunku gobbanke Isilaamu amma’no haruunsaanora 1442kkihu bayiriidi Id-Al-Fexiri ayyaanira hawalle iillishi’ne!’’ yaateni; ‘’Amma’no hajajjanno garinni busha coye giwatenni; Kaaliiqi ledo ayyaanunni xaadate, hajajosi wonshatenna danchumma assatenni Nebiyyu Mohaammedi sokka gumulate ikkinohura; ayyaanu hagiirri’ne duuchu hagiirre ikkanno gede; wolqa nookkirenna hoogginore qaagatenninna noonkehunni beehatenni wo’munku baxille halashshate amma’no hajajjanno garinni ikka hasiissanno’’ yaateni sokkasi sayisino.
Gobbate deerrinni ikko qooxeessinkerano amma’note ikko wolu babbaxxino korkaatinni sa’e sa’e kalaqantanno gaance hiitte amma’nono irkissannokkita ikkase anfoonnite. Konni kaiminnino Isliminnu amma’no harunsaano baalanti Kaaliiqi hajajo garinni baxillenna mittimma calla rosiisa hasiissanno.
Hattono gobbanke batinye amma’no harunsaano mittimmatenni heedhannota ikkasenni amma’note mereero kalaqantanno gaance gobbano qansootano gawajjate kaayyose lowote. Ikkollana kayinni hayyoollenna ogeeyye annuwanke hundinni adhite daggino garinni konni albaannino batinye amma’no mitte gobbara mittimmatenni mimmito ayirrissenna dandiite hagiirreho ikko dadilleho hattono dagoomittete xaadooshshi baalaho mittimmatenni halantanni dagginoha ikkasinni techono amma’no gaancete buicho di-ikkitanno yino qoqqowu pirezidaantichi kalaa Desta Ledamohu.
Amma’note badooshshi noo gede hee’reenna mimmito ayirrinsummoro amma’note widoonni mitte mitiimma kalaqantara dandiitannokki daafira mimmitu ledo ayirrisama, dandaama, mittimmatenni halama baalunku amma’nowiinni agarrannite yino.
Ayyaanu kaayyonniha, hagiirrunniha, halchinanniri wo’mannoha, iimirano uullarano ikkannoha ikka’nera halcheemmo yinohu pirezidaantichu; xa hee’noommo yanna kalqete daafa ikkinohu koroonu fayya taraawo hala’lite noota ikkasenni lowontanni mitii’mine hee’noonnita ikkase deama di hasiissanno yino.
Konni kaiminnino fayyimmate ministeere wortino wodho garinni mannu haammate mitteenni gamba yee ofollannokkinna songannokki gede hooltanno wodho ikkasenni qooxeessaho mootimmate gede tenne wodho jeefisate gadacho no yinohu kalaa Desta; ayyaana ayirrinseemmo yannara fulle hala’ladu dargira gamba yinanni injo nookkihura xeertinye agarino garinni hasiissanno qoropho assatenni baalunku agarrannisi qeecha fula hasiissannotano amadisiise sokkasi saysino.
Amsaalu Felleqe
