Manchi beettira kalaqamunni hasiissanno qara qra hasatto rosu maxaaffa aanano borreessanteenna ronsoommo. Woyi,sagalenna gallanni mini. Wolootta kayinni hasiissannota manchi beetti kalaqamunnino ikko hee’ranno heeshshonni rosinori noosi. Fayyimmate uurrinshuwa,Rosu minna,doogganna buussa manchi beettira qara hasattonni di xe’inoreeti.
Mootichu kaaliiqi diilallo,Arrishsho,Agananna waa kalaqmamunni manchi beettira baatooshshiweelo uyino kalaqamaati ;hattono hee’nanni baatto.
Ikkollana mitootu manchi beetti hundaanni no daafira mootimma duuchankare gashshitanno gede kaaliiqi fajjo ikkino. Mootimma gobba gashshate heewisantannowote dagate e’anno sheemaati giddonni minu tuqishshi,wayi iillo,doogganna rosu minna iillo taashshite iillishate e’anno sheemaatta giddonni kullannireeti. Ikkollana mereeroho gattanna la’nanni.
Rosu manchi beettira hasiisanno coyi giddo mittoho;dooggatenna buussate gatamarshino hattonni. Kayinnilla mannu safote latishshi injo hasi’ranno daafira quchuma timbiliqanna la’nanni. Ee;quchumu duuchunku safote latishshira injiinoho yine hendanni.
Ikkina qachuma daggannori baadiyyete ilantino qansootaati. Quchuma fulihuno baadiyete daga deamanna daa’’antanni. Kuni kayinni duuchare afi’neemmo dagara taalo iillo assa hoogate qarraatina dagate e’neemmo sheemaati loosu aana hosa hasiissanno. E’noonni sheemaatino loosunni leella hasiissanno.
Mootimma gashshate dooratanno wote e’anno woyyo giddonni dagate heeshsho woyyeessa, minu iillo adda assa,dooggate latishshi,wayi iillonna rosu minna gatamarshinna isilanchimma kullannireeti. Ikkollana aleenni afantanno massagaano loosonsanna e’ino sheemaate gumulsiissannohu eelaanni gaantanno ogeeyyenna massagaanonni ikkasinni loosu baatto kaxxanna dila’nanni. Konniraati e’noonni sheemaatinna dagate hasatto taala hasiissanno yine yekkeerammannihu.
Sa’nummo sasenna shoole dirra giddo Itophiyu gobba babbaxxitino jifo giddo keeshshitino. Koroonu Vayirese kokke qalxite heedheedheenna bagu aana bakakka yinannihu gede Aliyyeenni
Juntu kayisino olinni gobba addintanni jifantanni keeshshitu. Kawaanni juntu,ka’aanni Koroonu fayya,wole widoonni gibbayidi gobbuwa xiiwo Itophiya jiffanni keeshshitu.
Ikkollana, jifotenni beqqi yitannokki Itophiyu daga kawaanni kaaliiqi kaa’lonni koroona sharrantanni wole widoonni juntu bagado sharrantu. Hattonni junta guluffe keeshshitino galchimi gobbuwa babbaxxitino miinju agawo tugganna tenne duucha xiiwo qeelletenni sa’inoti di hambannite.
Kuri baala jifo giddo keeshshitino Itophiyu gobba Bayiriidi Itophiyu haaroo’mate kofatto umi gafi caabbicho burqisatenni ittisinoseri dino. Jajjabba pirojekitubbanna gatamarsha maassiisatenni di ittisinose.
Qeelle bagado sharrama calla ikkitinokkita tayixe Itophiyu daga faajjetenni kalqete leellishshino. Ikkollana qarru aana qarra ledate hasidhanno giddo heedhe Itophiyanna dagase gawajjate hasidhanno bissa di hooggino.
Baadiyye hinge ha’nanni wote ama buusu ta’eenna shiphitanna la’nanni. Seeda doogo jawa gambayicho bayidhe hodhitanna la’’a haaro dikkitino. Doogotenna Ambulaansete qarrinni ilaancho reretenni dunke haratenni xaano di fulloonni. Kuni baalu ikkannlohu dagate e’noonni sheemaate ragunni fula hoogatenni ikkinota maanxanni halaale dikkino.
Ikkireno ikkeenna tini hee’noonni yanna jireenyunnite yine lallambi eega mitu itanna mitu hudi’re galannota ikka di hasiissanno. Mitu kassi yee galanna wolootu goo’ra di hasiissanno. Konnirano mootimma dagate e’ino sheemaate caaqqi yite la’’a hasiissanno yanna tenneeti.
Itophiyu kalaqamu eltonni wo’mitinote;ikkollana dawanna dawaawano loosanni keeshshino addi addi gashshootinni afidhe heedhe hoogginota xorshidhanni goodhinota,xuudhitanni bullitinota ikkite keeshshitino. Qaalu ammanamooshshu asaleetina daga safote latishsha loonsanni’ne yaanno sheemaatinni calla hexxotenni heedhannokki gede mootimma e’ino sheemaatenna woyyo eeli geeshsha halaalunni dirrissatenni e’ino sheemaate ragunni fula hasiissanno!
Bakkalcho Dotteessa 6, 2014 M.D
