Amate urchi hakku shamu shaqqadu masino;moolino! Amate anjichi qoorino. Ama anjichose tuffe qoorino unuunase qansite ise rossukkinni rosiisse ise duubbukkinni duushshite oosose rosiisse baa baayicho iillishshino.
Maate rossinokkiti oosonsa rosiissannohu woyyaabbino heeshsho heedhanno gede halchiteeti Rossukkinni rosiissino maate techo gobba owaatanno yite ilte baa baayicho iillishsheenna insa godowi masannonna moolanno wote gobbate baashe dirritannota hawa di hasiissanno.
Daddalaanchi raadoonetenni kalqoomu deerrinni ikkannore ola ikko moolle macciishshatenni hendoonnikki waaga ledanna baadiyyete amuwwinke zayitenna shaqqadore aguina qarqaraho leellannore afi’ranno gara hooge moola tima quruuxanna la’nanni hee’noonni.
Yuukureenetenna Ruushiyu oli kalaqami 2ki barra zayitetenna qamadete bullee waagi amandannikkiwa iilli. Daddalaano shaqaxa eessidhannohu 6 agani albaanni ikkirono korkaata agadhite waaga leddanno do’nootu daddalaano hendoonnikki waaga leddeenna amuwinke hinqaato coommishidhannore hoogge qatume gala hanaffunkunni barru kiirami.
Amate godowi masino;moolino. Hakku shaqqadu godowi ile iillishinohu, duuwikkinni duushshanni rosiisinohu moollenna qatume amaddeenna qoorino. Maxine,laambu,sukkaarenna zayite,hattono qamadete bullee amandannikkiwa iilla nkottimmate aana boddimma ikkitino. Ikkina mine uduunne maaxxanno daddalaano
mamoote ittaraatikka? Yitanno xa’mo galtannoe wote,do’nootunna mooraano ataachidhanno ikkinniina di-ittanno yaanno qaale macciishsheemmo wote jawaateemmo. Ee,do’nootunna honqooqootu hattono mooraano ataachidhanno ikkinniina di ittanno.
Mootimma zayitenna babbaxxitino gooffanno shaqaxxa qaraxu nookkiha eessate sheemaate e’u lamalara hendoonnikki waagi lexxinoti di hambanni halaaleeti. Zaayitete faabirikka qasantanna ikkinniina xorshinannanna waaga ajinshanna la’’e di egennoommo. Mootimma kontirobaandetenni “kageeshshi zayite seerimale hodhinsanna amandummo” yitanna ikkinniina amadantino sukkaare ikkito zayite hiitte bale e’annoro di anfanni.
Eeggo maganoho! Tenne sa’u lamala giddo hendoonnikki garinni zayitete aana waagu lexxi. Waagu lexxa huluullissino daga mootimmate flute raaru. Mitte lamalara cancinsheenna gobbayidinni miliyoonnatenni bikkinanni zayite gobba giddora e’inota tuqu xaadooshshira lallambi.
Coyi kayinni “Saa noo’’e iima;adose kayinni afe di egennoommo” yaanno maammaashsha ikkino. Ee;zayite dagganno;higguwa di anfanni,sukkaare e’anno horonsi’raahu ayetiro kaaliiqi afo! Hajajote dikki’ra hayyootinso hasi’ni gede dikki’rate hayyooti? Yine xa’minara Itophiyu keeraanchonna hasi’ni gede dikki’rate fajjanno bayi’riidi seeri wodho. Wole widoonni waaga bikkine konni waaginni hirinna hidhi yinanna anfanni. Ee;karsancho dikki’rate miinji hayyo lawanno. Mootiomma mitte lamalara waaga fushshituro aantino lamalara duuchunkuri sutaminoha anfanni.
Ayetiyya waaga dirrisannohu?yiniro dino! Xa daddalaano feceleeqqanno gede assinori maati yiniro mootimmate sooreeyye daddalaanotee ledo seeda anga wortinota leellishanno.
Konniraati amate godowi mole hee’reenna godowakki wonshi’rattohu mootimmate massagaanchinna daddalaanote ledo karsante amuwa meexattohu eemarami yoommohu. Ee;eemarami.
Amate godowi masino barra noottowi ruqano ikkannohe;ittanna hudiissannohe;agganna goo’riissannohe.
Amate godowi qoorino;atehu kayinni fucuruuqe misino. Ama kaaliiqira kultino barra anjichikki kokkete moolannohe,ittanna hudiissannohe;iimano uullano bushshannohe! Daddalaanchohoronna mootimmate loosaasinchootiro xawa giwa geeshsha mannu umosi baxannoha ikke mittowa hige kumbuuleenna gobbate hude ubbinoha labbanno.
Hude ubbino yinannikki gede malxifatanni itannohu reqecci yee leellanno;duumboommo yinannikki gede hudi’rinohunna kallinohu kuneeti! Ikkina angansa daddalaanote ledo burduuqqe xurtino mootimmate sooreeyye yee’e yaa di hasiissanno? Kaaliiqi wayi baattoote giddonni burqannohu 1 litire wayi 12 birra e’i. ukureenetenni abbineemmokki mlukkuwate quuphicho 10 birraati. Shaanu gatinni xinqinannihu iillinannikkiwa iilli.
Kuni maganu hanqootinso baashete!!! Ikkireno ikkeena do’nootu daddalaano eemaramme. Kawaanni mootimmate loosaasine ka’aanni daddalaanote hanqafaano umo’ne qorqorre! Geexaanote maamari massagaanonna zayite beekkinanni bissa kaaliiqa waajje. Dayinoha taalo beekke;halaalunni iillishshe.
Yaareed Geetaachew
Bakalcho Badheessa 15, 2014 M.D
