Itophiyu gobbanke sa’u seeda dirrara lophose gufisannori xaadannase keeshshitino. Gobbanke diigge bebbeeqqate hasidhinnori gobbaydi wolquwa raga baala huxxite amaddara wo’naaltanni keeshshitino. Kadote gashshootinsanni aliidimmansa leellishateno duucha yannara horritinose. Gobbaydihuno ikko giddoydi diinna duucha yannara gobbanke aana jawa qarra kalaqqino. Ikkirono kayinni dhaggesenni mitte yannarano diinnate anga uyite diegennitino. Dhagge farcidhannohuno; baatto kadino halaalino leellishannohu horritinose diinna baala worbimmatenni qeeltanni saalfachishshanni dagginotaati.
Ikkollana techo ninke yannarano gobbanke diigatenna ayirrinyese shollishate hattono dagase billaallisatenna qasiisotenni xaandanniwa baala baattose horrate diinna qodhite ka’ino. Xaano jawa sharro hasiissanno yannara hee’noommo. Gobbate ayirrinye agarsiisa jawa waaga baatisiissannote; mannu lubbono ba’ara dandiitannote. Miinjunna jajju aanano jawu qarri kalaqamara dandaanno. Ikkirono gobbanke aye qarrirano guluphite angase diuyitanno. Worbimmase dhagge huntanno wolqano diheedhanno. Techono beroonte gede worbuullu oososenni dhagge loossanno. Diinnase saalfachishshe qeelle adhitanno. Ayino kade gashshasera dihasidhanno.
Albaanni sa’u dirrara gobbanke gashshitu bissa mereero hedotenni sumuu yaa hoogate mitiimmuwa kalaqantinota kaima assidhe Xaaliyaanuno Itophiyu daga ga’retenna boosaalluni babbadanni mito mitono borojju gede kiiranni kadotenni gashshate wo’naalino. Ikkirono Itophiyu qansooti gobbansa ayirrinyira yite lubbonsa sayisse uyitannore ikkitinohura qeelante digaltino.
Yanna baala gobbate gashshaano ledo babbaxxitino hedonna uminsa horo agarsiisi’rate assitanno sharronni mimmitu ledo sumuu yaa hoogate qarri kalaqamanni saino. Xaano la’nanni hee’noonnihu konneeti. Gobbate hajo aana mimmitu ledo sumiimme kalaqa hooganna mittimma kaajjishi’ra hooga gobbate ayirrinye kisiisannoha ikkinohura gobba kisantanno woyte koshise kisamino diishsho gede mittimmatenni uurra ga’ara yinannikki hajooti. Kuni techo ka’ne hananfoonniha ikkiikkinni albaannino babbadooshshe agurre baqqinatunni mittimmanke kaajjishi’ne babbaddankeranna gobbanke diiggara hexxitino diinna saalfachinshe qolloommo doogooti.
Itophiyu manni baxillaanonsara yite umonsa sayisse uyitannoreeti; mittimmankenna halaalehonna taalleenyaho mittimmatenni uurrine leellinshoommoreeti. Horrantenna xiiwante ninkewa shiqqinore baala haa’ne meessoonsi’ne, ayirrinsenna hanqanfe, techono gobba heedheennansanni gobbansara keeru baeenna horrante shettote giddo noore haa’ne maatenke assi’ne ledonsa hee’neemmore ikkanke hawa dihasiissanno. Kunino ikke hee’reennanni diinu yanna baala gobbanke keeraanchimmanna latishsha gufisara goxicho bae galanno. Mimmitu ledo kiphammeemmonna gaancu kalaqamanno gede assate umtinokki bale dino. Wo’naalshinsano gumulo diganino. Xiibbe tuggankera hasidhinori mittimmankenni kajjine sharrammoommo daafira uminsanni ubbella gattino. Tini mittimmankenna worbimmatenni kaajjine diinnankera anga aa hooganke kaajjitella suffanno. Xaano ikkiro gobbaannino ikko giddoonni heedhe mittimmankenna gobbanke diiggara wo’naaltannorira dawaronke mittichote. Gobbanke ayirrinye agaratenna agarsiisate mittimmanke kaajjishi’ne uurrineemmo. Ama gobbanke e’ino qarri giddonni fulte wolaphotenna hasi’nanni jireenyi widira reekkantanno gede sharrammeemmo.
Afinnokkinkerino ikko affe heedhe habbinonkeri baxillaanonkeno ikkito diinnanke qaaggaranna affara hasiisannori hee’riro Itophiyu dhaggesenni ayeerano anga uyitannokkitaati. Ninke Itophiyu manni borojjimmatenni galate qeelamme diinnankera anga diuyineemmo. Keeraanchimmatenna talleenyaho hattono gobbanke dannanna qasiiso meexate wo’naaltanno wolquwa hekko kalaqate goxxukkinni galturono; waajjishiishshannonkeri haammatturono techono ikko ga’ano anganke diuyineemmo. Albinni hanafe yanna baala miiccankeranna hasidhinore ninke kayinni mittimmanke kaajjishi’ratenni qeelloommonsa. Hiikko ragaannino dagginonke diinna saalfachinshe qolloommohu mittimmankenniiti. Tayixeha ejjeettote qeellete barri ayyaana ayirrinseemmo woyteno worbimmankenna mittimmanke macciishshantannanke ikka hasiissanno.
Danchummatenna baxillunni shiqqannonkerira kayinni dawoe bushshu yine adhine koyisi’neemmore; qarrantinorira iillneemmore; horrantinore haa’ne meesoonsi’neemo daga ikkanke dhagge farcidhanno. Gobbankera diina ikkite daggannorira kayinni meyaa daguncho gedeeti. Itophiyimma yaano konneeti. Diinnanke giddoonnino gobbaannino heedhe heddannohu gobbanke ga’labbo booraabbeenna gobbanke diinnate sayinse uyineemmo daga lambeennansaati. Babbaxxitino hedonni babbadooshshu hee’riro nafa gobbanke ayirrinyira baalunku hedo mittete. Worbuullu ejjeetto ama ikkitinoti Itophiyinke ayeerano angase diuyitino; albirano diwaajjineemmo; anga diuyineemmo!!
Dotteessa 28/2013
