Abrahaam Saamueel
Dirise 26 ikkanno. Ilante lophitinohu Asoosu Quchumiraati. Uminna layinki rosu dirima Addisi Ababaho harunsitno. Yuniversitete rosose Adaamu Saayinsetenna Tekinoloojete Yuniverstera harunsite Elektirikaalete Injineeeringenni rosse umi digirese adhitino. Rosose jeefisse rossino rosi handaarinni looso afi`ra hattenne yannara jifo ikkinose. Ikkollana, ayi looso loosate qixxaabbe nootena, mitto soofti weerete kubbaaniyi giddo maarkeetingete handaarrinni mitto dironna lee agana loossino.
Wedellite duudhe roso rosa baxxannote. Ayi loosino rosunni irkisama dandiiro gumaamo ikkannota xawissanno. Afidhino tunconni baala roso rosa hagiirsiissannose. Konnira, rossino rosu handaari gobbaanni ikkinohunni maarkeetingete handaarinni qaxarante loossanno yannara loosu woraqataho soorrama noose yite maarkeetingete rosu handaarinni roso harunsite layinki digirese adhitino.
Elektiriikaalete Injineeringenni hattono maarkettingete rosi handaarinnino sa`e maassantinoti techo sewoote gafira wosincho assinoommoti beetto Selamaawiti Alemu yinannise. Loosunna rosunni ammantannoti Selamaawiti Alemuti, umisenni loosate hedde rososeno rossanni heedhe rosaano mine minensa xiinxallisate dandiisissannoha “Fiideli Tiitoriyaale Konselte” yine woshshinanni uurrinsha uurrisino. Looso qaxaramme loosa calla ikkitukkinni meessi loosono kalanqe loosa gummaamo assitanno yiteno heddanno. Konni garinni, umiseha hallanyu looso loosate widira higgino.
Fiidele Tutooriyaalete Konselte Amanna Uurrinshate Loosu Qineesaancho Selamaawiti Alemuti, umise looso loosate heddu woyte balaxe buqqeesera daynori rosaano mine minensa hadhe xiinxalisatenna rosunni jawaachishateeti. Konnira kayinni korkaata ikkinoseri, Adaamu Yuniverstera Shoolki diri rosaancho ikkitino yannara rosu gobbaaani noose yannara mine mine hadhe woy doyte rosaano xiinxallisse miinjunnino umose kaa`la dandiitinohuraati. Hattenne yannara kuni loosi isera gumaamo ikkinota huwatte rosose jeeffisse Addis Ababa dagge hallayna uurrinshara qaxarante loosanno yannarano loosu gobbaanni mine mine hadhanni xiinxallisanni keeshshitino.
Rosose rossanni hattono loosu aana ledote looso assite rosaano xiinxallisate looso loossanni keeshshiturono gumaamo ikkinota buuxxe konni loosi widira wodanase qoltino. Looso loosate ka`anno woyte mittu diri giddo lee ooso noose. Konni aleennino qaaqquulle xiinxallisa hasi`rannohu haammatu manni nootano huwatino. Tenne yannara konne looso hasi`rannohu manni lexxanni dayta, looso halashsha nooe yite hedatenni loosu giddora e`u. Loosu widira eate gumultu yannara “Mitte anganni diggannannina” yite loosoho beeqqaano ikka dandaannohanna hasatto noonsa manna gamba assate looso loossu.
Looso halashshite loosate kakkaasinose coyii maatese widoonni noo hasatto calla ikkitukkinni mine mine hadhe xiinxallissu woyte rosaanote aana noo soorro la”atenniiti yite ammantanno. Salamaawiti, rosaano irkisannoha afidhuro gumaamma ikkanna iilla noonsa deerra iilla dandiitannota buuxoomma yitanno. Mite mite yannara taalo ha`ra dandiitinokki rosaano shiima kaa`lo afidhinori gumaamma ikkitinnota illesenni la`e hagiidhitinotanna konni roortino rasaano iilla dandiitannota ammantino. Konne looso woxu widira soorrine loonsiro horosi jawate yitanno.
Gobbankera baxxinohunni, mittu ali looso loosa rosaminokkiha ikkinoura, rosaano mine mine ha`ne xiinxallisanna rosiisa; roorenkanni loosu yannanni gobbaanni loonsanni looso ikkino daafira ayii mannino loosunni fulanno woyte konne looso loosa dandaannotanna ledote loosono loosate kaayyono lexxitanno yite ammantanno. Konniraati Salamawiiti “Fiideli Titooryaali Konselt” yinanni uurrinsha fantinohu.
Mine mine ha`ne xiinxallisate loosi loosu aana noo mannootinna yuniverstete rosaano loosa dandiitanno looso ikkinohura haammataho loosu kaayyo kalqate dandiisiissanno ytannoti Salamaawiti, loosu aana beeqqaano ikkate hasidhannori yuniverstete rosaano hattono digiretenni maasantinori qoleno ayii loosi aana bobbakkinori hawarro fulte konne looso loosa dandiitanno yite coydhanno.
Rosu qixxaawose Elektirikaalete Injineeringenni ikkinohura, looso qineessate dandiisiissanno tekinoolooje horoonsidhe pilat forme loosse, loossa baala web saaytete suffano gede assitino. Togo yaa “Fidel Tiitoryaale Konselte” yinanni mashalaqqete marawe horoonsidhe ayino hasi`ranno owaante shotu garinni afi`ranno gede assitino. Loosaasine gattukkinni loosoho e`nanninna fullanni woyte malaatissannoha yannate malaate diijitaalete tekinooloje horoonsidhe malaatissanno gede assite woraqataho loonsanni tekinooloojje gatissino.
Owaante hasidhanno maate web- saayte horoonsihde Fiidel Titoryaal Konseltete giddo noore 250 ikkkitanno xiinxalsiisaano mereero beettisira hasiissanno rosiisaancho ko/teenni hanafe konni albaanni noosi dandooshshenna rosicho hattono hasi`ranno rosi daninni xiinxalsiisaano web-saaytete aana doodhe afi`ra dandaannota huwachishanno. 250 rosiisaano Addisi Ababu quchumi giddo babbaxino qooxeessira afantannore ikkitinota Salamaawiti kultino.
Fiidel Titooryaalete ledo loossanni afantannori 250 rosiisaano ku`lite borreessantinori fonqolo adhite ikkado ikkansa buunxe doorroonnireeti. Rosaanote maate oosonsara doodhitanno xiinxlsiisanno konni giddooti. Konnira, Fiidel Titoryaalete konselte, rosaanote doorshunni shiqishshanni afantanno uurrinsha ikkitinohura, oosote maate shiqishshanno hedo heedhurono hattenne hedo adhite hasidhanno owaante shiqishshanno. Owaante qinaabbino doogonni aa dandiinanni gede xiinxalsiisaano qooxeessaho afantannore ikkansa jawa horo uytanno yitino.
Umi deerri rosaancho ikkitino yannarano rosoho baxxino baxille afidhinote. Baxxinohnni, Shallagote, Fiiziksetenna Keemistirete rosira ikkado egenno noote. Mine mine hadhanni rosiissnnohu woy xiinxalsiisannohu saayinsete rosi aanati.
Tenne yannara tekinoolojetenni irkinse loosa yanna, wolqanna woxe gatissannoha ikkanna, tini tekinoolooje loosoho kaa`litannota coydhanno. Lawishshaho:-koroonu fayya taraawo kalaqantu yannara rosaanote minna ha`ne rosiisa dandiinannikkihura, tenne tekinoolooje horonsi`ne on liynete rosaano mine minensa heedheenna roso uytanni keeshshitino.
Hattenne yannara haammatu manni minensa interineete eessirino daafira, diijjtaalete tekinoolojera gamba yitino yaa dandiinanni. Ikkinohura, tenne yannara, “Fiidel Tiitooryaale diijitaale tekinoolooje horoonsi`ratenni” haammata dagara iillisha dandiinonnita kultannoti Salamaawiti, xiinxalsiisaanote ledo ikko maatensa noowa ayii xaadooshsheno ikko baatooshe diijtaalete tekinoolojenni loonsannita kultino.
Mittu xiinxalsisaanchu rosiisaanchira mittu rosaanchinni lamu kumi geeshsha baantanniha ikkanna, xiinxalisiisaanchu dhukisi fajji garinni lamenna sase rosaano amadara dandaanno. Mittu rosaanchi rosaancu ledo keeshsha noosi hyanna mitte saate geeshsha ikkanna, mitte lamalara sase barra callaho. Rosaano kifilete giddo rossino rosinni qolte ledote roso minensa rosanna xiinxallisate irkisha afidhuro gumaamma ikkktanno. Konnira Salamawiiti, uurrinshase riqibbe loosu kaayyo kalaqate komishiinera noo heewora beeqqaano ikitinota xawissino.
Loosu kaayyo kalaqate komishiine heewisiise doortino handaari giddo 20 worbuulli mereero 10 giddora karsama dandiitino. Konnira Loosu Kaayyo Komishiinenni addi addi irko afi`ra dandiitino. Konninni lede, babbaxitino miidiyra Fiidel Tiitoryaale egensiisate kaayyo afidhino. Komishiineno woxu irko assitinose.
Dagoomu qeechase fulate Addisi Ababu Yuniverste ledo mittimmatenni halamatenni loossanni noota kultannoti Salaamawiti, rosaano rosu kalqera heedhe loosu ayyaana rosa dandiitano gede hedatenni Fiidel Tiitooryaalete ledo halante rosu yanna gobbaanni loosa danditanno gede injeesitanni afantanno. Rosaano rosaano ikkite loosu bude rosate roorenkanni dagoomaho owaante uyte miinjansa irkisa dandiitanno. Konnira, ise rosu aana hanaffino looso wolootu uurrinshano togoo looso hanaffuro rosaano umonsa ikkado assate aleenni loosu kalqera karsantanno woyte gumaamma ikkitanno gede assannonsa.
Rosu aana loossanni heedhe rosu aana guminsa woffi yiino rosaano addi addi mootummate rosi uurrinshara doytanni Fiidel Tiitooryaale Konselte uytanno owaante horoonsidhanno gede assate looso loosanni no. Baxxinohunni, bocu woronni guma abbitanno rosaanora maatensara woxe baatte rosiisate dhuki hoogirono, woxu wolqa afidhino hallanya uurrinsha hasatenni irkissannonsa gede loossanni dagoomittete loosi qeechano fultanni afantanno.
Tenne yannara 250 rosiisaano agurranna 12 wedellira loosu kaayyo kalaqate dandiitinoti wedellite Salamaawiti, albillichono looso halashshatenni Addisi Ababu gobbaanni noo qoqqowubba quchummara tiitooryaalete roso iillishate mixo noose. Rosaanote kaa`lanno rosu kaa`laancho uuduunne qixxeesate iillado assateno qixxaabbanni leeltanno.
Addisi Ababu Quchumira noo 80 ikkkitanno mootummate rosi minnara doyaatenni rosaano noonsa ikkadimma fushshite horoonsi`ra noonsa yite addi addi xa`mo qixxeesatenni xa`motenna dawarote heewo harissanno. Tini heewono albillicho kaajjite suffannta xawissino. Rosu minna mereerono kaajjado heewisantanno rosu minna kalaqateno kaayyo aannoha ikkinkota qummi assitini.
‹‹Fiidel Tiitoryaale›› baara widono tenne owaante uytanni noota xawiise, baxxinohunni Amaaru Afoonna Gi`iize oosonsa rossara hasidhanno maatenna Itophiyu qansooti tenne web-saayte horoonsidhe karsantanni noota kult, baxxinohunni Itophiyuha dhaggenna Afoo halashshite rosiisanni noota coydhino. Albillichono kaajjishshe wolootu qooxeessirano sufissannotanna loosu kaayyo kalaqqannota qummi assite hedose jeefissino.
Bakkalcho Ammajje 24, 2014
