Daga keeraatunni illilleettetenni aane daanno diro seedisse la’anni tayxe Cuuattote Ayyaanira iillishinonsa Kaaliiqira guweenya shiqishshanno.
Waajjuulle uddanonni biiffinori agana labbanni Taawoota dukkisse leeltanno. Cuu’’attote Ayyaani keerunniha mittimmanniha ikkasi lallabbanno. Doogganna gudumaale baalanti Itophiyu baandeerinni biiffe leeltanno. Wedellu Cuuattote Ayyaana ayirrissanni leellishshanni leeltanno.
Taawootta fooliishshidhannowa sa’anno; Cuuammete Ayyaani togoonni iibbino garinni ayirrisamanni no. Tini daa’’atto Addis Ababaho calla ikkikkinni wo’mante Itophiyu qarqartora Ortodoksete amma’no harunsaanonni diru dirunkunni ayirrinsannihu Cuuattote Ayyaani iibbino garinni ayirrisamino.
Keteru Ayyaaninni hanafe Taawootta galtanno basera dukkinse iillishshanno; ammo’note harunsaano.
Sambatu amma’note rosi mini rosaano; ayaanaamma maamarra; amma’note minna rosiisaanonna massagaano; owaataanonna amma’note harunsaano Taawootta dukkisse galtanno basensa iillishshanno.
Amma’note harunsaano faarsitanni, Kaaliiqira guweenya shiqishshanninna keere halchitanni ayirrissanno ayyaanaati. Itophiyu kiristinnu amma’no harunsaanonni diru dirunkunni ayirrinsanniha Cuuattote Ayyaanira leellatenni babbaxxitino sokka sayissinori gobbaydi qansooti mereerinni Siwiidinete Itophiyu Ortodoksete amma’no massagaanchi Bitsui Abune Eeliyaas xawisino garinni; Cuuattote Ayyaani amma’note ayyaanimma agarino garinni ilamate tareessinanni gede ammanaasine animate qeecha fula hasiissannota huwachishanno.
Cuuattote Ayyaana ayirrinsanni basera leeltinori amma’note annuwinna ammanaasineno wo’mante Kiristinnu amma’no harunsaanora hawalle tayxeehu Cuuattote Ayyaanira keerunninna mittimmatenni iillishinonke yitanni sokkansa sayissino.
Kulle gundannikkita baca dhagge afidhinoti Itophiyu gobbanke togooha kalqete amammandannikki dona ikkinoha Cuuattote Ayyaana ayirrinsanni amanyoote diru dirunkunni iibbino garinni ayirrissannotano coydhanno.
Cuuattote Ayyaana kiristinnu amma’no harunsaano faarsotenni, ililleettetenni iibbino garinni Kaaliiqira guweenya shiqishshanni iibbino garinni ayirrissannoha ikkasi wolootu ayyaannanni baxxinohanna Itophiyaho calla togoonni ayirrinsanniha ikkasino gobbaydi qansooti hedonsa dimaaxxino. ‘’Ketera’’ yaa Gi’’iizete qaaleeti; kofe amadate yaate.
Taawootta way noowa fulte galtanno; ayyaanaame sokka sayinsanni; Kiristoosi lawishsha harunsinanni gara baala amma’note harunsaanora kullanninna lallanbanni ayirrinsanni ayyaanaati. Gobbaydi qansichimma noonsari; Itophiyu qansootinna Itophiyu ilama baara widoonni heedhannowiinni ayyaana gobbansara ayirrisate quqquxantani keeshshite dagganno.
Amma’nonna ayirrinsanni amanyootinna balchoomano mittimmatenni ha’rinsanni ayyaanaati; Cuuatto. Konne ayyaana kalqete amammandannikki dona ikke borreessamanno gede gobbate mootimmanna amma’note massagaano assitino sharronni xaa yannara Kalqete Mootimma Uurrinsha Rosu, Sayinsetenna Budu Uurrinshara borreessameenna kalqoomu deerrinni afansha afi’rinohanna gobbankerano diru dirunni iibbino garinni ayirrisamannoha ikkinkunni dirra kiirsiisino.
Ayyanu xaa yannara Itophiyunniha calla ikkikkinni kalqe wo’manti ayirrissannohanna daa’’attannoha ikkino. Gobbanke xaa yannara e’ino jifonni fultannokkiha lawanna gobbaydiri mite mite gobbuwanna gobbansa kaaddinori meessire labbanni heedhe kayinnilla wolootu dhaggete diinnanke ledo halantinori kuni ayyaani gobbankera ayirrisamannokki gede gano gantanni keeshshitino.
Kayinnilla ganonsa hiikkano diiillitino. Ayyaanu iibbino garinni mimmitu ledo ayirrisamatenni, baxillunniha, keerunniha gobbankera keeru teesinoha ikkasi leellishe saino ayyaanaati. Deama hasiissannokkiri hee’riro gobbanke ayirrinyi ba’’annonna kadote gashshooti giddo ubbanno gede goxxukkinni galtanno gobbuwa noota hawa hoogate.
Gobbanke dandaaminsa garinni qarrunna shettote giddo keeshshiishate lowo garinni hixamanyite loossanni afantanni no. Ikkollana, insa gobbankera jawu qarri noo gede kalqete lallabbanni qansootansa gobbankenni agurte fultanno gede duucha yannara kultanninna huwachishshanni keeshshiturono kuneeti gobbankera keeru noota daganke faajjetenni leellishshinonsa.
Sa’u seeda agannara Afiriku Mittimma gambooshsheno gobbankera ha’rinsannikki gede yitanni keeshshiturono xaa yannara Afiriku Mittimma gambooshshe konniicho ha’risate gobbuwa sumuu yaansa lowonta naandannite gobbankera jawa ayirrinyeeti.
Diyaspooru miillano gobbankera dagge ayyaanna sayinsansanna gobbansa towaatte la’’ansa gobbanke amaddino halaale kalqe seekkite huwattanno gede assinoreeti. Itophiyu keereho. Keerulla no; hunote assootira ka’inori dino diynanni. Kayinnilla gobbanke keere effidhe gibbanno diinna giirantanna ninke ayyaannanke mittimmatenni, baxillunninna ayirrisamatenni ayirrisi’nanni hee’noommo.
Sa’u lamalara ayirrinsihu Gannu Ayyaanano ikko be’ro ayirrinse sa’nummohu Cuuattote Ayyaani keerunniha, mittimmannihanna baxillunniha ikkeeti ayirrisaminohu. Itophiyimma mittimmate, ayirrisamate, baxilleho.
Amsaalu Felleqe
Bakkalcho Arfaasa 12, 2014 M.D
