Mannu ooso ayirrado kalaqama ikkansanni agarranni ikkinnina di shinanni;konne assoote gimbeemmo. Wodananna surre hidhannohu poletiku amanyooti gatamaramanno gede huuccatto assineemmo’’yaanni Itophiyu kaatolikete amma’no mini phaaphaasete songo xaphoomu borreessaanchi dokter Abbaa Teshoome Fiqrehu egensiisi.
Dokter Abbaa Teshoome baxxinohunni uurrinshinkera xawisino garinni; ‘’Manchi beetti ayirrado kalaqamaati; ayirradore agarranni ikkinnina di shinanni. Konne assoote giwatenni aleenni loosunni leellishannoha, wodananna surre hidhannoha, baalanka qeelaano assannonkehanna soorrote widira eessannonkeha poletiku amanyoote gatamara hasiissannonke ‘’ yino.
Assoote giwatenni calla di uurrinseemmo; ikkitotenni soorramme, maaro e’ne, halaalaancho farcotenna keeru doogo harunsa hasiissannonke yinohu dokter Abbaa Teshoome; ‘’ikkanni noori amma’note annuwa huluullisannohonna yaachishannoho ; huuccatto assi’neemmo, konne assoote gimbeemmo’’ yino. Mannu ooso ayimmansanninna amma’nonsa korkaatinni darantanno, keeraano qansooti reyitanno; la’annonsakki hajonni dano iillitanninsa afantanno; kuni uurra noosita huwachishinno.
Hunote kakkayisannorinni, olu giddora eessannorinninna babbadooshsheho kakkayisanno coyinni seejjamatenni woyyaawino coye kalaqate Itophiyu daga halama hasiissannonsa yinohu dokter Abbaa Teshoome; Itophiy baattora ilamino qansichi Itophiyu haja la’annosi, callichu poletika massaga hasi’rannohu hee’rara dihasiisanno yino.
Ikkanni noori gobbanke aana kolishsho bassa tugannoha, qansootu lubbotenni hee’rate qoosso xiiwannoha ikkasinni hajo la’annonsa baali uurrite wodancha hasiissannonsata qummi assinohu dokter Abbaa Teshoome; gobbate, manchi beetti qoossora kaa’lannoha woyyaawino poletika abate kaa’litanno doogonna haasaawu doorsha harunsa hasiissannota xawisino.
Amanyootu noo poletika, miinja, dagoomittete , amma’notenna budillaancho heeshsho hee’ra dandiinummoro daga hagiirrunna baxillunni hee’ra dandiitanno’’ yinohu dokter Abbaa Teshoome; kalaqammoommohu roduuwimmatenna maatete gede ikkine hee’rate ikkinninna qachunni, amma’notenni, budu babbadooshshinni huxxammammora ikkinokkita qummi assino.
‘’Maganu suudinni kalaqamanke ammannummoro mittu mittunku roduuwaho; konne buunxeemmohu loosunnino roduuwinke darantannokkinna reyitennokki gede agarrummorooti’’ yino.
Poletiku ledo amadantino hajubba no; doorshuno shiqe afamanno; koroonu xissono kalqete aana iillishshanni noo gawajjo yaachishshannonke yee; Konni korkaatinni mitte lamalara huuccatto lallamboonni; kalaqaanchunna mimmitimke ledo giwammoommo hajo aana maaro afi’rate amma’note minna huuccattotenni sayinsoommo’’ yino.
Kalqe mittimate widira hadhanni, roduuwimma kaajjitani, dagoomittetenna miinju gamba yitanni hadhanni noo yannaati. Ninke hee’noommo akati huluullisanno’’e, yaachishanno’’e, maganu alba umbe huuccatto assi’neemmo gede kaayyo calla ikkikkinni gadachinonketa la’neemmo gede assinonke yino.
Hajo la’annonsa baali ga’labbi yite gobba danotenni gatisate sokko noonsata qaagiissinohu dokter Abbaa Teshooma; baalanka mereersinohanna mittu mittunku qansichi qoosso agarino poletika gumultanno gede xa’mino.
Mootimma dagate qoosso agarantanno gede ; qansootu reyitannokkinna arantannokki gede woyyaawinoha poletiku amanyoote gumultanno gede, qoossonsa agarantanno gede, qansootu keerunni hee’ratenna millisate , fule e’’ate qoossonsa agarsiisate tungoonni eegge fultanno gede xa’mino.
Qiddist Gezaheny
Dotteessa 21, 2013 M.D Hamuse
