Amsaalu Felleqe
Manchi beetti kalaqamisinni basetenni base millisanni hee’rate hasi’rannokalaqamaati. Loosi’rateno, rosateno, massagateno babbaxxino loosu akatinni noowiinni kae wole basera millisanno. Baxxinohunni kayinni woyyaabbino heeshsho hee’rate assanno sharrono hattonni baxono giwono gobbasira calla huxxame keeshshannokki gede assitannosi.
Gobbanke mannino hattenne dancha yannara gobbankera duuchante basera millisanni loosi’ranni keerunni hee’ranno. Hakkiinnino sae babbaxxitino gobbaydi gobbuwara ha’ratenni rosunni, duuchu handaari loosinni hakkiicho martinowa maate kalaqidhenna jiro fushshidhe heedhanni noorino bacareeti.
Hiikkiichono hee’niro kayinni meessi gobba geeshsha ikkannori dino. Meessi gobba yaa ayimmate; Ayirrinyeho. Gobba noonke yineeti haxo gotti assine ha’ra dadiinannihu. Mannu albaannino fulle wo’mu wodaninni coyi’ranna hasi’noonni hedono xawisa, xa’ma, qoosso ayirrisiisi’rano dandiinannihu badhe heedhurooti.
Ayino gobbasi kisantaranna meexantara hasi’rannohu dino. Albano ikkiro kadote gashshootinni gobbuwa miicce gashshitinori waajjuullu, insa gobba kayinni danna xiinbe woy hasiisannokki garinni giddoydi hajonsara anga worrara agurina hedo uyinannita nafa dihasidhannoreeti.
Anfummonte gede qansootinkenna gobbanke baxillaano kayinni hiikkiichono heedhuro Itophiyu ayirrinye meexannoha hasiisannokki garinni giddoydise hajora anga worrara hasi’nanni hasatto tiyyidhe giwatenni hiittenne yannarano aleenni gobbanke baca jifo xaaddinose yannara mittimmatenni ka’e gobbansa daafira huuronsa macciishshiishshanni afantanno. Gobbate giddo assinanni hee’noonni sharro qotira ikkansanni lowonta naaxxinoommo.
Shoolente kalqenke raggara heedhinaniri Itophiyu oosonna baxillaano mite mite galchimi gobbuwa mootimmanna tuqu xaadooshshuwansa gobbate giddo heedhenni kaadde gobbansa diigate sharrantannori ledo halamatenni assitanni nooha hunote wo’naalshansa giwa’ne leellisha’ne kalqe Itophiyu ooso gobbansa daafira mageeshshi baxilli noonsaronna sharrotenni duumbara higgannokkire ikkansa leellishshinoonni.
Itophiyimma hiikkiichono hee’niro ayimmankeeti; disoorrantannote. Tini yanna jawa xiiwo assinanninke hee’noonnitanna gobbanke baca jiffa tuncu yitinoseta ikkiturono ruxxi yinummokkinni mittimmankeno hattonni kaajjitanni noote. Xaano jawaatanna albillichono kaajjine mittimmankenna halammenke leellinshummoro diinu hasatto hiikkirano di-iillitanno.
Hiittenne yannarano aleenni mittimmanke kaajjituro xeertoteno ikko mulenke heedhe qarra gantanno diinna mittimmatenni qeelle gobbanke ayirrinye agarsisa baalunke mini loosooti.
Galchimi gobbuwa miidiyubbansanni kaphunni dudubbanni fantinonke olano ikko gobbate giddo cancishaanora hale ikkitanni gobbanke diigate assootinsa hattono canconna gaane albaanni rossinonte gede gaance kaysatenni Ameerikunna wolootu gobbuwano kalaqamannore gaa’lite angansa worate injeessitanni afantanno. Konnirano luphiima qeecha fultanni afantannori hunaanote hale ikkitinori kalqoomu tuqu xaadooshshuwaati. Gobbate giddono ikko gobbaanni heedhanno qansootinkenna mootimmano dhaggete diinnanke ikkitino wolquwa assootinsanni qorophitanno gede assitanni noo millimillo addinta gobba naaxxissinote. Albillichono suffannotanna diinu saalfatannona irraawanno gede assannoho.
Gobbate duuchunku qooxeessira daganke mittimmatenni ka’e dagate dambala kalaqqino. Gobbaanni heedhinoonnirino konni garinni mittimmatenni gobbanke meexantannokki gede assitinanni heedhinoonni sharro dhagge dihabbannote.
Kalqenkera duuchunku qooxeessira heedhinooni qansootinkenna baxillaano Itophiyu ayirrinyi kisamannokki gede kalqoomu mittimma leellishshinanni heedhinoonni. Duuchante basera ka’anni noo xa’monna hedo konni gedensaanni Itophiyu giddoydi hajosera anga wora uurritona; kaphu duduwinni gobbanke diiggara dandiitanno wolqa dino; Itophiyu umise hajora agurranna wo’manti Afriku gobbuwa kadote giddonni fulte wolaphitanno gede sharrantanni noo gobba ikkase leellishshinoonni.
Hananfoonnihu dagate dambali lexxanni ha’ranno. Kalqeno kaphunni dudumbannire calla macciishsha agurte daganke huuronna amandoonni halaale huwattannohu barru muleeti. Koliddu kadote gashshootinni fulte wolambinatensa buuxidhanno gede lawishsha ikkitinoonnihura galanteemmo. Tenne sa’u lamala giddo 29 gobbuwara harinsoonni dagate millimillo dambalinna Juntaho kaa’lite hasattonsa wonshate dodantanno Ameerikiranna Mite mite galchimi gobbuwara Itophiyu kaajjille leellishino giwate dira assitinoonni daafira wodani galati iillo’ne. xaano halaale farci’rate assooti’ne sufo!
Bakkalcho Bocaasa 16 / 2014
