IFDR gargarooshshu olanto tantannoonnihu baattote, Horophilu, baarunna Sayberete kifilla heedhannose gede assineeti. Tenne handaarrara olanto yannate ledo ha’rannoha teknoloojete guma horonsidhe umonsa kaajjishshanno gede ; hedote aana xawadimma heedhanno gedenna bikkantino jironni gummaa’mitanno gede assine uurrinsoonni.
Gargarooshshu olanto gatamarshihu illachu olanto poletiku paarte riyoote alamenni la’’antinota ikkitannokki gede woshshamansa dagatenni doorantino riqiwaanora calla ikka noositanna massagantannohuno bayriidi seera calla kaima assite ikkinota leellishanno. Ledoteno gargarooshshu olantohu qaru illachi gobboomu mittimmase kaajjitinota, gobbate mootimma gashshootu amado wolambinaatenna mittimma hattono dagate keeraanchimma hiittenne giddoydinna gobbaydi ganonni gargara dandiitanno gede assine qajeelsinoonni. Ikkollana sau sase soorrote dirrara albaanni noo tantano loosunni keennanni woyte tenne massago xiiwanno garinni mitte paarte calla owaattanno gede assinoonninkanni.
Konnirano Birra 24, 2013 M.Dni umise gargarooshshu olantonni fultinorinna HWHT qara gumulsiisaano gargarooshshu olanto miilla jaallansa aana iillishshinoti waajjishshanno gano lawishsha assine adhinanni. Aliyye gobbate kifile hajajaano aana iillinshoonni gano gedensaanni mootimma adhitino seera agarsiisate gaadinni cancishaano HWHT 15 barrubba giddo miqichinsa hiiqqameenna, qara qara massagaano rewotenna usuraho aamantanna gattinori fincante goda e’’ansa qaangannite. Xaa yannara gobbate yaaddo ikkitannokki deerra iillitino. Konninnino gargarooshshu olanto gobbate halenna irko ikkansa leellishshino.
Ikkollana mootimma Tigraye ga’labbisatenna wirro uurrisate looso loossanni keeshshituhu gedensaanni mannihimmate qarri lexxannokki gede; aanino diro sagalete anje kalaqantannokki gede loosidhe galtinorira irshu kaayyo aate callinsanni ola uurrisate muro saysatenni olanto Tigrayetenni fultanno gede assitinno. Xaphoomunni qoqqowoho fooliishshote (badhe higge uurrite huwattanno ) yanna aatenni daga woyyannosere hedde muro uyitanno gede kaayyo aate yite mootimma ola uurrisate yawonni wo’mitinota mittu widiidi muro sayissinoti anfoonnite. Ikkollana cancishaano HWHT qaaqquullenna geerra gamba assite qoqqowu giddo qarra batisate looso loossanni qotehono sircho hunate gano iillishshanni, jironna jajja gawajjitanni, batinyoota qaensanni shorritanni, gobbate keerunna ga’labbo heedhannokki gede assate loossanni afantanno.
Wole widoonni EFDR gargarooshshu olanto mootimma ola uurrisate muro sayissuhu gedensaanni olanto wirro tantanatenna qajeelsate istraateeje kalaqqe looso hanafansano dihambannite. Konninnino ikkado olanto gatamarshi kaiminni uurrinsha yannaasincho olaantote sayinsenninna hayyonni ogimmate ikkadimma buuxantinota ikkite gatamarantino. Kunino gobbanna daga tugginonsa yawo ikkadimmatenni fula dandiitannotanna gobbate keere agarsiisate murci’raancho ikkite gobbansa diinunni gargara dandiitanno olanto ikkitanno gede dandiisinoho.
Itophiyu gobbate gargarooshshu olanto haaro tantano amaddino qara soorro mereerinni islanchimma hedote giddo wortinotanna Teknoloojetenni irkisantinota olu hayyo horonsi’ra gargarooshshe yannaasinchonna gummaamo assitara dandiitino. Olanto dhukansa wirro Teknoloojetenni irkisamino qajeelsha gatamara cancishaanonnita gobba diigate sokko ittisatenna gobbate safote latishshi agarooshshe roorenkanni kaajjishate woyyaawino dhuka kalaqqino. Baxxinohunni xa gobbate babbaxxino gobbate qooxeessira leellannoha keeru hoongi qarra harunsite olanto konni deerrinni dhukansa gatamadha dandaansa worroonni e’’onni la’nanni woyte hagiirsiisannoho. Olanto buqqeetenni, mannimmate ikkadimmanni, olu qixxaawonni, babbaxxitino olu hayyo loosunninna hedotenni adha dandaansa gummaamonna ikkado assitanno.
Olanto adhitinoha olu saynse rosicho loosu aana hosiisatenni Junta lede wolootu gobanke keerira guficho ikkitino bissa diigate murci’raancho ikkitinota loosunni leellishshanni afantanno.
Xaphoomunni gobbaydi wolquwanni iillinshara dandiinanni gano gargadhatenna gobba giddo seeranna gobbate mootimma xiibbara wo’naaltannori hattono dagate wolambinate xiibbanno diinna sharrantannota ikkado olanto kalaqate harinsho kaajjite sufa hasiissannose. Korkaatuno olanto dagate wolambinatenna wolambinatu xawishsha ikkinoha bayriidi seeri amanyoote diinunni, cancishaanotenninna wolqa horonsidhanno wolquwanni gargadha goofimarchu sokkooti.
Bakkalcho Birra 11, 2014 M.D Hamuse
