Gobboomu deerrinni ikko qoqqowubbate deerrinnino diru giddo loonsanni loossa mixotenni irkisantannoti anfoonnite. Sa’u seeda sannara gobbate mootimma soorrantanni sa’inoha ikkirono gobbate lopho buuxiissanno loossara illacha tuga hoogatenninna murci’ne massangoonnikki daafira gobba buximate giddo keeshshitino.
Gobba buximatenni fushshatenna gutunni jiroo’mate mittu mittunku qansichi yawosi fulara agarranni. Baxxinohunni, dagoomu loosunni calla lopha dandiinannita huwate duucha yannara loosunni ammananno gede assate massagaanotewinni jawa yawo agarranni.
Hanafoonni loossa garunni gumulantanno gede amaalete mini miilla harunsonna irko hasiissanno.
Baadiyyete ikko quchummate deerru deerrunkunni hananfoonniri latishshu loossa agarroonni yanna giddo gumulante dagoomaho hasiissanno horonna owaante uytanno gede assinanni harunsonna irko kaajjite sufa noose.
Sa’u muli dirra kawa gobboomu deerrinni hananfooniri latishshu loossa gumaamma ikkitanno gede assinanni harunsonna irko jawaachinshannite. Baxxinohunni, deerru deerrunkunni hananfoonni pirojektubba mixote garinni gumulantanno gede amaalete mini miilla yanna yannantenni assitanno harunsonna irko; hattono xe’ne noowa rahotenni taashshatenni adhinanni qaafubba kaajjitinota ikkase kaiminni pirojektubba gufidhukkinninna isilanchimma noose garinni gumulantannonna dagoomaho hasiissanno owaante uytanno gede assa dandiinoonni. Kuni rosichi yanna yannantenni woyyaawanni dayno.
Duuchu handaari loossa annimmatenni massaggannori loosu minna heedhurono loossate gumaamimmara duuchunku irkonna harunso kayinni jawa qeecha amaddanno. Konniraati, baxxinohunni deerru deerrunkunni afantanno amaalete minna miilla qooxeessinsara harinsanni loossa yanna yannantenni harunso, irkonna keeno hattono foonqe noowa rahotenni taashshote qaafo adhitanno gede assinanni hee’noonnihu.
Sa’u yannara dagooma gutunni horaameeyye assitannore ikko maatete deerrinni hanafantino loossa mixo baatto kaxxite murroonni yanna giddo hanafante gumulantanno garinni dagate tantano kalanqe loonsanni dangoonni.
Diru giddo loosate mixi’noonni loossa babbaxxitino yanna giddo harunsonna irko assinanni jeefoteno diru mixo gumulsha keeno assate albaanni towaanyo assinanni la’ne keennanni harinsho kaajjite suffanno garinni yawo adhine loosa agarranni. Amaalete mini miillano songo harissanno yannara qooxeessinsara harinsoonniri woy harinsanni hee’noonni loossa noo deerra laisee hasaabbe torbatenni kaajjado midaado sufisiisatenna laafa midaado bade taashshote qaafo adhateno balaxxe towaatansa agarrannite.
Hiitti pirojektubbano mixote garinni murroonni yanna giddo hanafante gooffe dagoomaho owaantete fano ikkitannonna seeda yannara horo uytanno gede hende hananfanni. Kayinnilla, hasiissannota kaajjado irkonna harunso assa hoogate kaiminni pirojektubbate loosi gufi’ranna qoleno isilanchimma nookki garinni loonseenna maassiinsirono harancho yanna giddo horote gobaanni ikkitanna la’nanni harinsho uurra noose. Konni kaiminni, dagoomaho e’noonni qaali garinni loossa isilanchimmatenni gumulantanno yawo adhine loosa agarranni.
Yanna yannantenni dagoomu kayisanno koffeenyiranna danchu gashshooti xa’mubbara kaima ikkannori loossate mixo garunni gumulama hoogate qarraati.
Tenne yannara hanafante noori safote latishshuwa ikkito wolootta latishshu loossa garunni gumulanturo dagoomu xa’morano dawaro qolate dandiisiissanno. Ikkeennano, mite mite qooxeessubbara loossa gufi’rate ikkito kaiminni dagoomu koffeenya kayisanno. Dagoomuno latishsha hasi’ranna xa’mira calla ikkikkinni halama hasiissanno. Loonsoonni pirojektubbano garunni agarooshshe assinanna seeda yannara horonna owaante uytanno gede dagoomuno yawo adha hasiissanno. Roorenkanni kayinni amaalete mini miilla harunsonna irko jawa qeecha amaddanno daafira kaajjite sufa hasiissanno.
Bakkalcho Maaja 10, 2017 M.D
